Fautuaina Fa’atonusili tausisi tulafono fa’a faigaluegaina tagata

Na fautuaina e le afioga i le Kovana ma le Lutena Kovana afioga i Faatonusili o Matagaluega ma Ofisa a le malo i le fonotaga a le Kapeneta i le vaiaso na te’a nei, ina ia mulimulita’i i tulafono o ta’iala e fa’atatau i le fa’a faigaluegaina lea o tagata faigaluega a le malo, ina ia mautinoa e leai se fa’afitauli e ono alia’e mai i se taimi o i luma.

O lea fautuaaga mai le afioga a Lolo Matalasi Moliga ma Lemanu Peleti Mauga, na tu’uina atu lea i afioga i Fa’atonusili ina ua mae’a ona fautuaina i latou i le taimi ma le aso e tatau ai ona tu’u aloaia atu a latou tusi fa’amavae mai galuega sa tofia i latou e galulue ai mo lenei 4 tausaga o le a mae’a.

“A o outou sauni e tu’u aloaia mai a outou tusi fa’amavae i le aso 15 Tesema, ma te talosagaina ma le afioga i le ali’i kovana lo outou mamalu ina ia aua ne’i faia ni suiga i totonu o lau matagaluega e ono a’afia le tautua a le aufaigaluega pe a e tuua le nofoa”, o le fautuaga lea a Lemanu.

Saunoa atili Lemanu e fa’apea, o popolega i ni suiga e toe faia fa’anatinati e se Fa’atonusili a o lea ua oo i le taimi na te tuua ai le nofoa, e ono avea lea ma auala e tele ai fa’afinauga i le va o tagata faigaluega ma le tagata lea o le a tofia e avea ma Faatonusili le tumau.

“Taoto pea tulaga o lo o i ai lau matagaluega i le taimi nei, aua afai e toe filifilia oe e toe fai ma ta’ita’i, o le a faigofie ona e toe tula’i mai ma fa’aauau pea lau auaunaga, ae afai e i ai ni suiga e faia faatatope, e ono avea lea ma auala e a’afia ai le tautua a tagata faigaluega i le lumana’i”, o le saunoaga lea a Lemanu na lagolagoina e le ali’i kovana.

I le mataupu i le fa’a faigaluegaina o tagata faigaluega fou, na taua e Lolo ma Lemanu i le kapeneta le tatau lea ona mulimulita’i i tulafono ma fa’aiuga ua mae’a ona tu’uina atu, e taofia ai le tatalaina atu o le avanoa mo le fa’a faigaluegaina o tagata fou, se’i vagana se manaoga tupito ma taua o lo o tula’i mai i totonu o se ofisa, ona fa’atoa mafai lea ona fa’atino lea tulaga.

Na taua e Lolo i le kapeneta le mae’a lea ona ia fa’ataoto i ta’iala ma tulafono e fa’atonutonu ai tulaga o le fa’a faigaluegaina o tagata faigaluega, e tatau fo’i la i le kapeneta ona mulimulita’i i ai.

Saunoa le ali’i kovana e fa’apea, e le o se mea amiotonu le fa’a faigaluega o ni tagata fou e aunoa ma le uia o ta’iala ma tulafono e mafai ai ona fa’a faigaluega tagata i le malo, ona o le popolega i le ono aafia ai o le malo i lalo o le tulafono, aemaise ai o le fa’afitauli o le fiu o le tagata fou e fa’atali lona totogi ae le o mafai ona maua, e mafua mai ona e le o i ai lona igoa i totonu o le polokalame.

I le faaiuga o le fonotaga a le kapeneta, sa toe fautuaina ai e ta’ita’i o le atunu’u afioga i Fa’atonusili, ina ia silasila toto’a i auala e fa’amalosia ai tulafono ma ta’iala ua mae’a ona fa’atula’i e fa’afoe ai le malo.