To’alua ua molia vevesi na tula’i mai totonu toese Tafuna

E to’alua ali’i ua tu’uaia e le malo i le mataupu lea na tula’i mai ai se vevesi i totonu o le toese i Tafuna i le fa’aiuga o le vaiaso na te’a nei, ina ua fa’ao’olima ni ali’i pagota se to’alua i se isi ali’i pagota ma manu’a ai o ia.

O ali’i e to’alua ua molia e le malo i lenei mataupu e aofia ai Manu Lefatia ma Samuel Wright, lea ua tu’uaia nei i laua i le moliaga mama o le fa’ao’olima i le tulaga tolu, ma ua toe tolopo nei le la mataupu e toe valaau i le aso 28 Tesema, 2016.

I le mae’a ai ona teena e Lefatia ma Wright o tu’uaiga fa’asaga ia te i laua, na fautuaina ai loa i laua e le afioga i le Tama’ita’i Fa’amasino ia Gwen Tauiliili-Langkilde ina ia aua ne’i o la toe solia se tulafono a le malo, a ia avea i laua ma tagatanu’u e usita’i ma tausisi i tulafono a le malo.

E $200 le tupe na totogi e tatala ai Lefatia i tua, ae o Wright, lea o lo o taofia pea i totonu o le toese i Tafuna mo le tuliina o lana fa’asalaga fa’a falepuipui e 15 tausaga, ua fautuaina o ia e le fa’amasinoga e aua ne’i ona toe taumafai e fa’afeso’ota’i le ali’i pagota sa a’afia i lenei mataupu.

O le mataupu e pei ona tu’uaia ai Lefatia ma Wright na alia’e mai i le aoauli o le aso Sa na te’a nei, Tesema 4, 2016, ina ua talosagaina e Leoleo o le toese le Ofisa o Leoleo i Tafuna mo se fesoasoani, ina ua le mafai ona fa’ato’a filemu se vevesi na tula’i mai i le va o ni ali’i pagota o lo o taofia i totonu o le toese.

Na taunu’u Leoleo ma latou molimauina ai le to’atele o pagota o lo o laulaututu solo ma feofeoa’i i totonu o le lotoa o le toese, ma fa’atonu ai loa Leoleo o le toese ina ia toe fa’afo’i uma pagota i totonu o latou sela, ae o le taimi lea o lo o fa’alogoina ai le alaga leotele mai o le ali’i pagota o Larry Samatua ma ia tu’uaia se ali’i Leoleo o le toes i le le fa’atinoina lea o ona tiute.

O le ali’i pagota ia Samatua o lo o taua i fa’amaumauga a le fa’amasinoga, o ia lea na manu’a i le vevesi na tula’i mai.

Na avea le faigata ona usita’i o pagota i le fa’atonuga ina ia toe fo’i uma i totonu o latou sela ma itu na talosagaina ai loa se fesoasoani mai isi vaega o Leoleo, ma aga’i atu ai loa isi ta’avale Leoleo e fa i totonu o le lotoa a le toese, e aofia ai ma le Loli a le Vaega Fuimu i Tafuna, ma amata ai loa ona vaaia le usita’i o pagota ma aga’i i totonu i o latou sela.

Na taua e le ali’i pagota na a’afia ia Samatua e fa’apea, o le vevesi na amata mai i le aso To’ona’i, Tesema 3 ina ua alu e asi lona nephew o Siaumau Siaumau Jr o loo taofia i le isi falepuipui.

Na taua e Samatua i Leoleo e fa’apea, ao la talanoa ma Siaumau Jr, sa fa’afuase’i ona si’isi’i i luga le leo o Siaumau Jr ia te ia, ma mafua ai loa ona ia fesili i ai i le mafua’aga ua soona leotele atu ai fua ia te ia, ae o ia (Samatua) o loo tiga lona ulu i le tele o fa’afitauli o loo tutupu i le latou aiga.

O le taimi lea na tu atu ai loa i luga ia Wright ma fesili atu ia Samatua, po o ai o lo o fa’atiga i lona ulu, sosoo ai ma le savali atu o Wright ua fa’afetoa’i lona fatafata ma le fatafata a Samatua ma fai i ai, “O le a! O le a! Tago e tu’i a’u”, ae sa tali atu i ai Samatua ia Wright, “Tago e tu’i muamua a’u”. E uma loa le tala lea a Samatua ia Wright, ae savali atu loa ma Lefatia ma tu’i Samatua, ma mafua ai loa ona alu i le atoa Samatua i fafo ma tamo’e aga’i i le fale o loo loka ai o ia, ae sa tuliloa atu e tama a Lefatia, peita’i sa mafai e pagota o lo o taofia fa’atasi ma Samatua ona latou fa’ato’afilemu le mataupu.

I le taeao o le aso Sa na sosoo ai, Tesema 4, 2016, na alu atu ai Samatua i le Ofisa o le Toese mo le failaina o lana tagi fa’asaga ia Lefatia, ona o le mataupu lea na ia tu’iina ai o ia, peita’i sa fautuaina o ia e onosa’i se’i aumai uma i latou sa a’afia i le vevesi e toe teuteu le mataupu.

Ae ina ua toe fo’i Samatua i le fale o lo o loka ai o ia, sa ia vaaia ai Wright ma le ali’i Leoleo o le toese o savavali sa’o atu lava i le itu o lo o i ai Samatua, seia oo i le taimi na latalata atu ai, ona vaaia loa lea e Samatua o le ali’i Leoleo o le toese ua la’a ese, ina ia maua ai le avanoa o Wright e osofa’i a o ia, ma tu’i ai loa o ia e Wright ma lavea ai lona isu, peita’i na vave le toe oso atu o le ali’i Leoleo ma fa’ato’afilemu le mataupu.

E pei ona taua i fa’amaumauga a le fa’amasinoga, e lei maua se avanoa e fesiligia ai e Leoleo ia Lefatia po o Wright e tusa ai o le mataupu sa tula’i mai.