E LE O OE O SE SULI MONI - Vaega XVII

E pisi lava le teineititi o Ianeta i le tapenaina o le fanua ma fa’atino ona tiute masani o aso ta’itasi, ae o lo o fealualua’i mai lava i le fogafale i luga le fafine saua o Mekala ma talanoa i le telefoni, ao ona mata e le misi ma le vaega o le fanua lea o lo o galue atu ai le teineititi. Ua lagona e Ianeta le amata ona vevela mai o le la i le taeao, o lea na fa’atafa ai loa i lalo o le isi laau paolo ma koma ai mo ni nai minute, se’i toe tau maua sina malosi e fa’atino ai le galuega, ae na avea lea ma itu na manatu ai le fafine o Mekala, ai ua lagona e le teineititi pologa le fia inu, o lea na ia savali ai loa i totonu o le fale ma aumai le faguvai, ona toe savali mai lea i fafo i le vaega sa fealualua’i ai ma valaau mai i le teineititi, “Shhh, avaku lau faguvai lea e fa’ama’imau aku ma oe”, e fai lava tala a le fafine ma tago ua togi mai le faguvai i lalo i le mutia, peita’i e le i ano i ai Ianeta, ae sa tu pea i lalo o le paolo o le laau ma koma ai mo le tau sailiina lea o se isi malosi e fa’aauau ai lana galuega.

A o pisi Ianeta i le toe fa’aauauina o lana galuega, na fa’afuase’i ona ia fa’alogoina le u tetele mai o se ta’avale, ma ia vaaia ai ni ta’avale fou lava se lua o lo o aga’i atu i totonu o le lotoa, o le taimi muamua fo’i lea ua ia vaaia ai ia ta’avale ua afea lo latou aiga. O le isi ta’avale na alu atu sa’o lava ma paka i luma o le tama’i fale lea o lo o nofo ai, ae o le isi ta’avale na paka i luma tonu o le fale a le ulugali’i mauoa, ma ia vaaia ai le oso o le pa’u pito i tua o le ta’avale lea i lana faguvai o lo o ta’atia i le malae ma pa ai. O lona naunau e fia iloa po o ai nei tagata, na mafua ai ona tu le teineititi ua le toe gaioi ae ua taula’i atu nei lana vaai i le ta’avale lea o lo o paka mai i luma o le tama’i fale o lo o nofo ai, e lei umi ae ona vaaia loa ni ali’i tino lelei se to’alua e tofu ma le suti uliuli ua tulioso mai i fafo ma le ta’avale, ma savavali loa aga’i i le fale o le ulugali’i o Mekala. O le isi ta’avale lea na oso i luga o lana faguvai, e to’alua ni tama’ita’i lalelei na tulioso mai ai, ma ia vaaia ai le savali uma o i latou ia i le fogafale i luga o le fale. Ua le iloga se mau fesili e felavasa’i solo i le mafaufau o Ianeta, ua ia le mautonu fo’i po o ai nei mau tagata ua aga’i atu i lo latou aiga, ma oso ai fo’i ma lona ua popole ina nei faia e le fafine saua o Mekala se gaioiga le alofa e aveese mai ai o ia mai le aiga, ae ave i se isi nofoaga mamao e tu’u ma atili ai ona nofo pologa.

O le tu tonu o le la i le aoauli, le taimi vevela ma ua lagoana fo’i e le teineititi pologa le vaivai o le tino, lagona le fia ‘ai ma le fia inu, na tonu ai loa i lona manatu e sili pe a fa’amuta lana galuega ae fai sina malologa se’i aulia le malu o le afiafi, ona toe fa’aauau lea o lana galuega o le tapenaina lea o le otaota o le lotoa ma fa’amama le vao ma le lapisi. O le vaivai tele o le teineietiti o Ianeta na mafua ai ona taoto i lalo o le laau paolo sa koma ai ma usu usu ana pese sa a’o i le aoga. Na pei lava o lo o pepese le teineititi pologa ma manu felelei o loo ofaga i luga o le laau, ona o taimi uma lava e usu ai e le teineititi upu o le pese, na te fa’alogoina ai fo’i manu ua pepese, e foliga mai o lo o malamalama lelei i upu o lana pese, ma ua avea uiga o lo o fa’aali ane e manu felelei ia te ia ma itu na ata ai le teineititi ma oso lagona fiafia i lona loto ma fa’apena ane, “Pei lava o lea e mafuta mai si o’u grandfather i le nofoaga lea ou te taoto ai”, o mafaufauga fai vavale ia o Ianeta na te’i ai lava ua fa’agalegale moe, ma moe mo’i loa. E lei iloa e le teineititi le taimi na gase ai lana moe, peita’i o le isi vaaiga na iloa e Ianeta ina ua ala, o ia o loo i totonu o se ta’avale o loo alu i luga o le auala i se saoasaoa uiga ese le mata’utia. O le te’i o Ianeta i le tulaga lea ua o o i ai, na mafua ai ona nofo i luga ma ia iloa ai, o le ta’avale lea sa paka i luma o lona tama’i fale, o le ta’avale tonu lea o loo ave ai o ia, lea o lo o fa’afoe e ali’i tino lelei e to’alua sa ia vaaia na tulioso atu i fafo ma le ta’avale.