Tala otooto mai le Fa’amasinoga

MOLIA SE ALI’I I LONA FAAOOLIMA I LONA TO’ALUA

O le aso Gafua na te’a nei na tula’i ai se ali’i e 46 tausaga le matua i luma o le fa’amasinoga fa’aitumalo, ona o tu’uaiga i lona fa’ao’olima lea i lona to’alua i le fa’aiuga o le vaiaso na te’a nei.

Na teena e le ali’i ua molia moliaga mama e lua ua tu’uaia ai o ia e le malo, le moliaga o le fa’ao’olima i le tulaga lua atoa ai ma le moliaga o lona faia o ni gaioiga e ono a’afia ai le saogalemu o fanau laiti, e mafua mai i lona po o lona to’alua i le taimi o lo o si’i ai e lona to’alua le la tama pepe e 2 tausaga le matua, ma fetoa’i ai le ulu o le fafine ma foliga o si ana tama.

O le vevesi na tula’i mai ina ua ‘ona atu le ua molia i le fale ma ia fesiligia ai lona to’alua pe na fa’afefea ona fa’aaoga le tupe sa ia tu’u atu ia te ia e fa’atau ai meaai mo le aiga, ae na avea le le fiafia o le ali’i ua molia i le tali a lona to’alua ma itu na ita ai loa ma aapa atu ua toso mai le ofu o le fafine i tua, ae na ato ese e le fafine lona lima, ma fa’asaga atu ai loa le ua molia ua po foliga o lona to’alua ao ia sii lana pepe.

O ni isi o tuutuuga ua tatala ai le ua molia i tua e fa’atali ai lana iloiloga lea ua fa’atulaga mo le masina fou o Ianuari, e le gata ua fa’asa ona ia toe taumafai e fa’afeso’ota’i lona to’alua, ae ua poloaina fo’i o ia e saili se isi nofoaga e nofo ai, se’i vagana ua toe tu’uina atu se isi poloaiga a le fa’amasinoga.

MAPU VALOAGA

Ua tu’uina atu e le fa’amasinoga maualuga sana poloaiga e sailia mai ai le ali’i o Mapu Valoaga, ina ua fa’alua ona valaau lana mataupu ae le o auai atu lava o ia.

O le masina o Oketopa na te’a nei na faia ai le isi iloiloga o le mataupu a Valosaga, peita’i na toe tolopo e le fa’amasinoga mo le 30 aso, ina ua talosaga lana loia e tu’u atu se isi avanoa e toe fa’afeso’ota’i ai le ua molia po o fea o i ai o ia, ailoga fo’i o ia manatuaina lana iloiloga sa fa’atulaga i lea masina.

Ae ina ua le auai Valosaga i lana iloiloga lea sa toe fa’atulaga i le aso Faraile na te’a nei, na poloaina ai loa e le afioga i le ali’i fa’amasino sili ia Michael Kruse lona sainia o se poloaiga e pu’e fa’apagota mai ai lenei ali’i.

O Valosaga na ta’usala e le fa’amasinoga i le tausaga e 2013 i le moliaga o le gaoi, ma poloaina ai o ia na te totogi le tupe e $1,000 i le fa’amasinoga, fa’apea ai ma le $500 mo taui o mea sa fa’aleagaina, o isi ia o tuutuuga o lana nofovaavaaia e 5 tausaga.

O lana iloiloga i le masina o Oketopa na iloa ai, e le gata e lei totogiina lava se vaega o le salatupe, ae lei totogiina fo’i se vaega o le tupe e tatau ona totogi mo le taui o mea sa fa’aleagaina.

Ua talosagaina nei e le ofisa Faanofovaavaaia ia le fa’amasinoga mo sana poloaiga e fa’aleaoga ai le nofovaavaaia a le ua molia, ae poloaina loa o ia e tuli fa’amae’a masina o lo o totoe o lana fa’asalaga fa’a falepuipui.