Tala otooto o Fa’amasinoga

TAO LIU

O le aso 6 Ianuari 2017 lea ua fa’atulaga e le fa’amasinoga maualuga e toe valaau ai le mataupu a Tao Liu, ma le fa’amoemoe e tatau ona o o atu i le aso lea ua mae’a ona sainia sa latou maliliega ma le malo ma fa’amuta ai loa taualumaga o lana mataupu.

Na fa’ailoa e le loia a Liu o Michael White i luma o le fa’amasinoga maualuga ananafi e fa’apea, o lo o fa’agasolo pea feutanaiga i le taimi nei ma le malo mo se maliliega aufa’atasi e fa’amuta ai lenei mataupu, ma o lo o i ai le fa’amoemoe e tatau ona mautu nei fuafuaga uma i totonu o le isi 2 vaiaso o lo o lumana’i nei.

O Liu o lo o tu’uaia e le malo i moliaga o lona umia fa’asolitulafono o vaega o fualaau fa’asaina o le mariuana, fa’apea ai ma moliaga o lona umia o se fana ma pulufana.

A o taofia ai o ia i totonu o le toese e fa’atalitali ai taualumaga o lana mataupu lea, na sola o ia i tua mai le toese i Tafuna i le masina o Setema na te’a nei, peita’i e o o mai lava i le taimi nei, e lei failaina lava e le malo ni moliaga fa’asaga ia te ia.

O lo o taofia pea Liu i le toese i Tafuna i le taimi nei e fa’atali ai lana iloiloga lea ua fa’atulaga mo le masina fou.

SOOSEMEA TINAE

Ua poloaina e le Fa’amasino Sili ia Michael Kruse le tu’u atu o le mataupu a le susuga ia Soosemea Tinae e iloiloina i luma o le afioga i le ali’i fa’amasino ia Elvis P. Patea, ona o ni isi o tulaga e le tatau ai ona ia iloiloina lea mataupu, e aofia ai le ono i ai o se sootaga o lona faletua ma le ali’i ua molia.

O ananafi na fa’atulaga e fofogaina ai le talosaga a Tinai ma lana loia fautua ia Matalupevao Leupolu, i luma o le afioga i le ali’i fa’amasino sili lagolago ia Lyle L. Richmond, e talosagaina ai le fa’amasinoga maualuga mo se avanoa e toe teuteu ai lana fa’asalaga lea ua mae’a ona tu’uina mai mo le ua molia.

O le masina o Tesema 2015 na fa’asala ai e le fa’amasinoga maualuga ia Tinae e taofia i le toese i Tafuna mo le 5 tausaga, ina ua ta’usala o ia i le moliaga o lona tagofia lea o itutinosa o se teineitiiti e laititi i lalo o le tulafono.

Na fa’ailoa e Kruse ia Tinae ma lana loia ananafi e faapea, ua tuai le taimi ua faila ai le la talosaga i le fa’amasinoga, mo se avanoa e toe teuteu ai le fa’asalaga a le fa’amasinoga ua mae’a ona tu’uina atu, lea fo’i na lagolagoina e le loia a le malo ia Mitzie Jessop-Ta’ase.

“Ua tuai le taimi lea ua faila mai ai la oulua talosaga, o loo manino ta’iala e fa’atino ai galuega a le fa’amasinoga, e tatau ona faila le talosaga i totonu o aso e 10 talu mai le aso na tu’uina atu ai le fa’aiuga a le fa’amasinoga”, o le saunoaga lea a Kruse ia Matalupevao.

Ae na taua e le ali’i loia e fa’apea, ua mafua ona tuai le taimi na faila mai ai lana talosaga, fa’atoa ia iloaina e le o talafeagai le fa’asalaga ua mae’a ona tu’uina mai mo Tinae i se taimi e le i mamao atu, o le mafuaaga lea o le le tausisia o le taimi e tatau ona faila ai le talosaga.

Ua taoto atu nei le mataupu a Tinae i luma o le afioga i le ali’i fa’amasino ia Patea, peita’i e le i fa’atulagaina se taimi e fofogaina ai lana mataupu, ma o lo o taofia pea o ia i le toese i Tafuna e fa’atali ai le aso lea ua fuafua e toe tula’i ai i luma o le fa’amasinoga.

JOE TOGITOGI

Ua talia e le fa’amasinoga maualuga le talosaga a le alii o Joe Togitogi lea na fa’aulu e lana loia fautua ia Michael White, mo se avanoa e fa’atulaga ai loa le fa’amasinoga autu o le mataupu o lo o tu’uaia ai le ua molia e le malo.

O Togitogi o lo o tu’uaia i lona sola ese mai lea i le toese ao taofia ai o ia e le malo, ona o se isi fo’i mataupu sa tu’uaia ai o ia, i lona fa’ao’olima lea i se isi ali’i ao fa’anofovaavaaia ai o ia.

Na taua e le loia a Togitogi le tete’e malosi o le ua molia i lenei tu’uaiga, o le mafuaaga lena o le tatau lea ona fa’atulaga se aso e faia ai lana fa’amasinoga autu. O le masina o Oketopa 2017 lea ua fa’atulaga e faia ai le fa’amasinoga autu o lenei mataupu, ma o lo o taofia pea Togitogi i le toese i Tafuna e fa’atali ai le taimi lea ua fa’atulaga ai lana fa’amasinoga autu.