Fa’amalulu Utu faiga malo ona o suiga ua fuafua ASPA e faia

Na fa’amalulu le Pulesili o le Pulega o le Eletise ma le Suavai a Amerika Samoa (ASPA) i le afioga i le kovana ma le lutena kovana i le vaiaso na te’a nei, ona o ni isi o suiga ua fuafua le Pulega e faia e ala i le fa’aitiitia lea o itula faigaluega a le aufaigaluega, ona o fa’afitauli ma lu’itau e mafua mai i le itu tau tupe a le ASPA.

Ina ua maua le avanoa o le afioga i le matua ia Utu Abe Malae e saunoa ai i luma o le Fonotaga a le Kapeneta a le kovana i le aso Faraile na te’a nei, na ia fa’amaninoina ai le lu’itau tele o lo o fetaia’i ma le ASPA i le taimi nei, e mafua mai i le fa’aitiitia lea o tupe maua, toe fa’aopoopo i luga ma le aofa’i o aitalafu e le o totogia e o o mai i le taimi nei.

“O suiga e pei ona fuafua i ai le ASPA e faia ina ia fa’aitiitia ai tulaga o tupe alu, e mafua mai i a’afiaga o le tamaoaiga a le Pulega ua molimauina i le taimi nei”, o le saunoaga lea a Utu i luma o le Kapeneta.

Saunoa le ali’i Fa’atonu e fa’apea, o le amataga o le tausaga fou 2017 lea ua fa’amoemoe e amata ai suiga o lo o fuafua e faia, e pei o le fa’aitiitia o tagata faigaluega, po o le fa’aitiitia fo’i lea o itula faigaluega atoa ai ma isi tupe fa’aalu, ina ia mafai ai ona fa’apaleni manaoga o lo o tula’i mai.

E ui i suiga o lo o fuafua e faia i le Pulega, peita’i na fa’amaonia e Utu i luma o le Kovana ma le Kapeneta, e le i ai lava se agaga e vaea ni tagata faigaluega, ae o lo o vaavaai i isi auala e pei o le fa’aitiitia o itula faigaluega, ina ia mautinoa e maua pea galuega a tagata e tausi ai aiga.

E $150,000 le tupe na taua e Utu o lo o manatu le ASPA e tatau ona fa’asao mai ia latou tupe fa’aalu masani i le masina, ina ia tau fa’apaleni ai manaoga o lo o tula’i mai, e aofia ai le totogiina o aitalafu a le ASPA lea ua maitauina le maualuga i le taimi nei.

“O le isi fa’afitauli lea ua maitauina e le ASPA i le taimi nei, ua tele naua kamupani ma pisinisi o lo o matou aitalafu ai i le taimi nei, e le o ni aitalafu fou, ae o ni isi o nei aitalafu na amata mai lava i le 2012, a o lea fa’atoa alia’e mai i le taimi nei, ma o lo o matou galulue malosi e saili auala e foia ai lenei fa’afitauli”, o le saunoaga lea a Utu.

Talu mai le tausaga e 2012 e pei ona saunoa Utu, e tusa ma le $14 miliona le aofa’i o aitalafu a le ASPA o lo o i ai i ni isi o pisinisi e aofia ai ma le malo e le i totogiina, peita’i e o o mai i le taimi nei, ua fa’aitiitia lea aofa’i i le $8 miliona.

Sa ia fa’amanino i le Kapeneta ni isi o mafua’aga o le fa’aletonu o tupe maua atoa ai ma le tele o aitalafu ua i ai, e mafua mai i le tuai ona taunu’u mai o a latou sapalai mai fafo mo le fa’atinoina o a latou galuega.

“Ou te fa’amalulu atu i le afioga i le kovana ma le faigamalo, e tusa ai o suiga ua taumafai le Pulega e fa’atino ina ia maua ai se tali o le fa’afitauli”, o le saunoaga lea a Utu.

Saunoa le afioga i le ali’i kovana ia Lolo Matalasi Moliga e fa’apea, e fiu lava le malo ma ona lala e taumafai gaioiga uma ina ia foia ai fa’afitauli o lo o tutupu mai i lona si’osi’omaga, e fa’ateteleina pea le tutupu o fa’afitauli, peita’i o le itu taua e tatau ona faia e ta’ita’i, “ia mafaufau i auala e foia ai nei mau fa’afitauli”.

Sa ia taua fo’i e fa’apea, e le taitai mafai ona fa’atusatusaina lo tatou malo i le faigamalo Feterale, lea e tele le tamaoaiga e tua i ai le fa’atinoina o ana galuega, peita’i e ui i fa’afitauli o lo o tutupu mai, o lo o saili pea lava e le malo auala eseese e mafai ona fetu’una’i ina ia foia ai nei mau fa’afitauli o lo o a’afia ai le soifua laulelei o tagata lautele fa’apea ai ma le malo.