E LE O OE O SE SULI MONI - Vaega XVI

“Tina!”, o le talanoa atu lea a le tamaloa o Meki i le fafine o Mekala ma ona foliga ua matua ita lava, “O lou toe avanoa lenei e aveese mai ai le teineititi pologa o Ianeta matou te malaga, afai e fa’auliulito pea lou taofi ma e musu, o le a oo loa le mataupu i se isi tulaga e sili atu ona e le fiafia i ai”. O le talanoa atu lea a Meki ia Mekala, ae o le taimi lea o lo o uu mau pea lava e le fafine o Mekala le lima o le teineititi pologa o Ianeta e musu e fa’amamulu. Ua tutu le ulugali’i o Meki ma Lucy mo ni nai minute, ma fa’atau pupula i le fafine le alofa o Mekala lea o loo tagi ma uu lima lua le lima o Ianeta ma fai i ai, “Ianeta!, o lou aiga lenei, o maua na tofia fa’apitoa e le malo e tausi ia te ia, e le tatau la ona e alu ese ma maua”, o le talanoa atu lea a Mekala ia Ianeta, ae na toe fa’auilavea le tamaloa o Meki ma fai atu i ai, “Vaai oe Tina, e sa’o lelei lau fa’amatalaga, na tofia oulua e le malo ina ia tausi fa’alelei i le teineititi pologa lea, ae le o le fa’apologa atili o ia, o le mafua’aga lena ua ma oo mai ai, e aveese atu Ianeta ma le lua aiga, ona ua ova faiga faapologa o loo oulua faia i ai”.

Talu ai o le musu o le fafine o Mekala e tu’u mai Ianeta e o ma le ulugali’i, na tonu ai loa i le ulugali’i o Meki ma Lucy o le a le solomuli ese, ae o le a logoina loa le Ofisa autu o lo o gafa ma le puipuia o aia tatau o tagata pologa i totonu o le malo, mo sana fa’atonuga malosi e aveese mai ai le teineititi. Na ona savali ese mai lava o le ulugali’i i fafo, ona oso lava lea o le tagata i lana ta’avale ma o ese loa ma le fanua, ae tuua ai na o Ianeta ma le ulugali’i saua ma le le alolofa. E alu fua le fafine faiaoga o Lucy, ae o lona loto o lo o popole ina ne’i faia e le fafine leaga o Mekala se mea leaga i le teineititi o Ianeta. Ae o le taeao na sosoo ai ina ua le usu atu Ianeta i le aoga, na toe fa’afeso’ota’i ai loa e Lucy lona to’alua o Meki ma faailoa i ai Ianeta e le o aoga, ma ia talosagaina ai loa se gaioiga vave e faia ina ia aveese mai ai le teineititi pologa mai le aiga o lo o  nofo ai.

Se’i o tatou liliu atu lava i le aiga o lo o nofo ai le teineititi pologa o Ianeta. O le taimi lava na fuli mai ai tua o Meki ma lona toalua o Lucy mai le fale o Mekala, na fa’amamulu ai loa e le fafine le lima o Ianeta ma fa’atonu e alu e nofo mai i luma o le ogaumu o loo tafu ai le afi e fa’amafanafana ai totonu o le fale. Na fa’ateia le teineititi o Ianeta i le vave ona sui o foliga alofa ma le mafatia o Mekala i ona foliga saua ma le ita. “Aisea ua magaga’o ai le ulugali’i lea e aveese aku oe iigei?”, o le fesili atu lea a Mekala ia Ianeta ma ona foliga saua ma le ita tele. “Ua faafia oga ou fai aku ia ke oe, o oe o le keigeikiiki pologa e le o oe o se suli mogi o le aiga?”, o le talanoa atu lea a le fafine o Mekala, ma savali atu ua uu le kola o le ofu a Ianeta ma toso i luga, ona ia fa’atonu lea o le teineititi e alu i fafo ma le fale, aua ne’i toe alu i se aoga, a ia nofo mau ai pea i le tama’i fale apa lea ua uma ona fausia e nofo mau ai. Talofa e i si nei alualu toto ma le auala lea ua manatu le fafine saua o Mekala e tausi ai o i totonu o le aiga, e ui i le malulu o le po, a o lea lava ua tuli e moe na o ia i lona fale apa e aunoa ma se ie afu poo se aluga e fa’amafanafana ai lona tino.

E lei lelei semoe a le teineititi o Ianeta i le po atoa, sei vagana ai le tagi atoa ai ma le mafatia o lona loto, aemaise ai o lona fa’anaunau talosia ae vave mai se lavea’i  mo ia, ua le lava ola pologa i le aiga o Mekala. O le vevela o ave o le la i le taeao o le aso fou na fa’afuase’i ai ona ala i luga le teineiteiti ma tau autilo solo ona mata i le si’osi’omaga o le fale ma le fanua sa moe ai, ma ia iloa ai, ua fai sina umi o le taeao a o lea fa’atoa ala i luga, ma ua mautinoa lava ua le alu i le aoga. A o fa’asolosolo lana vaai, na tau atu ai lana vaai i luma o le polotito o le fale, o lo o nofo mai ai le fafine saua o Mekala ma autilotilo mai i le vaega tonu o lo o tu atu ai lona tama’i fale, ma vaavaai mai poo a ana gaioiga e faia, o lea na tu ai loa le teineititi i luga ua savali i fafo, ma amata loa ana galuega masani o le fa’amamaina lea o le fanua ma le lotoa atoa.