Ioe se Tina moliaga o lona umia fa’asolitulafono o mariuana

O le masina o Ianuari 2017 lea ua fa’atulaga e tu’uina atu ai le fa’asalaga a le fa’amasinoga maualuga fa’asaga i le Tina lea sa tu’uaia i lona umia fa’asolitulafono o vaega o le laau fa’asaina o le mariuana, i le mae’a ai lea ona talia e le fa’amasinoga maualuga o se maliliega sa latou sainia ma le malo.

Na ulua’i tu’uaia e le malo ia Musu Failauga i le moliaga o le fa’atupu vevesi i nofoaga faitele, atoa ai ma le moliaga mamafa o lona umia fa’asolitulafono o vaega o le laau fa’asaina o le mariuana, ae i lalo o se maliliega sa latou sainia ma le malo, na ia tali ioe ai i le moliaga mamafa o le umia fa’asolitulafono o vaega o le laau fa’asaina o le mariuana, lea na toe teuteu e le malo, ae solofua ai le moliaga o le faatupu vevesi na totoe ai i le pepa o tagi sa fa’aulu e le malo fa’asaga ia te ia.

I le tali ioe ai o Failauga i le moliaga lea ua ta’usala ai o ia, sa ia ta’utino ai i luma o le fa’amasinoga, sa ia umia se vaega o le fualaau fa’asaina o le mariuana.

O le mataupu e pei ona tu’uaia ai e le malo ia Failauga na alia’e mai lea aso 13 Aokuso 2016, ina ua alu le ua molia i le lala o le Ofisa o Leoleo i Tafuna e talanoa ai ma se isi Leoleo e uiga i se tasi o mataupu, ae tula’i mai ai se vevesi i le va o ia ma se tasi o tama’ita’i Leoleo, ma i’u ina taofia ai loa o ia ae molia i le moliaga mama o le fa’atupu vevesi i nofoaga faitele.

Na sailia e Leoleo le ato ma le tino o le ua molia, ma maua i ai se fasi pepa o lo o afifi ai vaega o le laau o le mariuana, atoa ai ma se paipa e ula ai le pauta oona o le aisa, ma mafua ai loa ona tu’uaia o ia i le moliaga mamafa o lona umia fa’asolitulafono o vaega o le laau fa’asaina o le mariuana.

Sa maua fo’i e Leoleo i lana ato se tusi siaki o lo o tusia ai le igoa o le kamupani o le A & E Coporation, atoa ai ma fa’amaoniga o se siaki e $180 mai le tusi siaki sa i lana ato sa ia talaina i le faleoloa o Mu Store i Nu’uuli i le aso 3 Aokuso 2016, e ui sa ia iloaina lelei lava e le o i ai se tupe i totonu o le teugatupe o le tusi siaki o lo o ia tauaveina.

I le maliliega ua mae’a ona sainia e Failauga ma le malo, ua ia malie ai e tali ioe i le moliaga o le umia fa’asolitulafono o vaega o le laau fa’asaina o le mariuana.

I lona tali ioe ai i le moliaga e pei ona ia sauni e tali ioe ai i luma o le fa’amasinoga, sa ia ta’utinoa ai e fa’apea, i se taimi o le aso 13 Aokuso i le nofoaga o le Ofisa o Leoleo i Tafuna, ao alu atu e talanoa i le ali’i Leoleo o Mose, sa ese se tulaga sa tula’i mai ai, ina ua la vevesi ma le tama’ita’i Leoleo ia Ah See, ma i’u ina taofia ai o ia ma molia i le moliaga mama o le fa’atupu vevesi i nofoaga faitele.

Ina ua taofia o ia e Leoleo, sa sailia e Leoleo lana ato ma ana meatotino, ma maua i ai se afifi pepa o loo i ai vaega laiti o le mariuana, fa’apea ai ma se paipa e fa’aaoga e ula ai le pauta o le aisa.

Ua sauni fo’i Failaugau e ta’utino i luma o le fa’amasinoga maualuga, e fa’amaonia sa ia te ia se tusi siaki mai le kamupani a le A & E Coporation.

Ua malie le malo o le a latou le failaina se moliaga fa’asaga ia Failauga e tusa ai o le siaki e $180 lea sa ia sainia ma tala i le faleoloa o Mu Store i Nu’uuli, ae o le a latou finau i le fa’amasinoga ina ia fa’atonu Failauga e toe totogi le tupe e $180 i le faleoloa o Mu Store, o se tasi lea o tuutuuga o lana nofovaavaaia.

O le aso Faraile na te’a nei na toe tolopo mai ai e le fa’amasinoga maualuga le mataupu a Failauga e fofogaina ai, ae talu ai sa lei mafai e le malo ona fa’amalie le fa’amasinoga i ni isi o fa’amaumauga e fa’atatau i lenei mataupu, na mafua ai loa ona toe tolopo mai le mataupu a Failauga e toe fofogaina i le taeao ananafi.

O le mataupu sa fia manino atili i ai le fa’amasinoga i le aso Faraile na te’a nei, ma mafua ai loa ona toe tolopo mai le fa’aauauina o le iloiloga a Failauga i le taeao nei, o le naunau lea o ali’i fa’amasino ina ia tuuina atu e le itu a le malo se lisiti e fa’amaonia ai le tupe e $180 lea o lo o latou finau na ave e le ua molia i se auala fa’asolitulafono, e ala i lona sainia o se siaki e $180 ma tala i se faleoloa i Nuuuli, e ui sa ia iloa lelei e le o i ai se tupe i totonu o le teugatupe ma le tusi siaki.