Fa’ataua le ola maloloina atoa ai ma le tete’e atu i le ma’i suka

I le avea ai o le masina lenei o Novema o le masina ua faapitoa mo le fa’atauaina o le soifua maloloina, atoa ai ma le tete’e atu i le gasegase o le suka, o le taeao nei lea ua fa’atulaga e faia ai se polokalame fa’apitoa a le Fa’alapotopotoga o lo o fa’alauiloaina le tete’e atu i le gasegase o le suka, e fa’atauaina ai auala eseese uma e mafai ona faia ina ia fa’aitiitia ai le fa’atupulaia o lenei gasegase i le atunu’u.

I se fonotaga ma Tusitala i le aso Lulu, na fa’ailoa aloaia mai ai e le Komiti Fa’afoe fuafuaga uma ua mae’a ona fa’ataoto mo le polokalame lea ua fuafua e fa’agasolo i le malae o le Su’iga’ula a le Atuvasa i Utulei, amata mai i le itula e 8:00 i le taeao e o o atu i le itula e 3:00 i le afiafi.

Na taua e le Ta’ita’ifono a le Fa’alapotopotoga o le tete’e atu i le gasegase o le Ma’i Suka i Amerika Samoa, le afioga i le Faipule ia Puleleiite Li’amatua Tufele le anoanoa’i o polokalame ua fuafua e fa’ataunu’uina i le taeao nei i Utulei, e fa’alauiloa ai gaioiga eseese e tatau ona faia ina ia tete’e atu ai i lenei gasegase matuia.

“O le autu atoa o lenei polokalame, ia mafai ona fa’ailoa atu i le atunu’u taumafaiga uma o lo o taumafai i ai Fa’alapotopotoga ta’itasi o lo o tete’e atu i le ma’i suka atoa ai ma le Matagaluega o le Soifua Maloloina, e taua atu le soifua maloloina nai lo se isi lava gaioiga i lenei olaga”, o le saunoaga lea a Puleleiite.

Sa ia taua atili fo’i le taua o le fonotaga a Vaega o le Soifua Maloloina a Samoa e lua lea na fa’atoa mae’a atu i le vaiaso na te’a nei, lea fo’i sa fa’atauaina ai le tatau lea ona taumafa i mea’ai paleni atoa ai ma le fa’ataua o le fa’amalosi tino.

O le itula e 8:00 i le taeao lea ua fa’atulaga e amata ai ona lesitala tagata uma mo le polokalame, ona amata ai loa lea o le polokalame i se sauniga lotu puupuu.

O le mae’a ai ona faitauina o le Poloaiga Fa’alaua’itele a le Kovana e avea ai le masina lenei o le masina e fa’ataua ai gaioiga e tete’e atu ai i lenei fa’ama’i faigata, lea o le a faitauina e Netini Sene, o le Failautusi o le Fa’alapotopotoga, ona sosoo ai loa lea ma le saunoaga autu o le polokalame, e saunoa i ai le afioga i le ali’i kovana ia Lolo Matalasi Moliga, fa’apea ai isi saunoaga fa’aopoopo mai le sui o le Potu Fa’amama Toto a le LBJ ia Olita Tafiti, fa’apea ai ma le ali’i foma’i ia Dr. Elia Titimae’a.

O se tasi o vaega o le a fa’atinoina i lenei polokalame, o le tauvaga lea o taumafa e maua ai le soifua maloloina, sosoo ai loa ma fa’afiafiaga fa’asamoa ua tapena i ai au fa’afiafia e to’atolu ua lautogia mo lenei fa’amoemoe.

Na taua e le afioga a Puleleiite le tele o isi polokalame eseese o le a mafai ona fa’atinoina i lea aso, ma ua tatala atu ai fo’i ma le avanoa i le atunu’u atoa ina ia afifio mai e molimauina lenei polokalame taua.