Solofua e le Fa’amasinoga moliaga fa’asaga ia Dean Fletcher

Ua solofua e le Fa’amasinoga Fa’aitumalo le moliaga mama e tasi sa tu’uaia ai e le malo o Amerika Samoa le ali’i Amerika lea na sola ese mai i Tonga i le masina o Setema, ae ua tu’u atu nei o ia i lalo o le vaavaaiga a sui o le Feterale lea na malaga mai i le atunu’u i le vaiaso na te’a nei, mo le fa’aauauina o isi tulaga o lana mataupu.

O Dean Fletcher na tu’uaia e le malo i le moliaga o lona tu’uina atu lea o fa’amaumauga sese i ali’i Ofisa o Tiute, ina ua fesiligia o ia i le aso na ulufale mai ai lana va’a faila i Amerika Samoa.

I le umi ai o le taimi o tau fa’amautu se maliliega i le va o le malo ma le loia a Fletcher, susuga Mathoni McCormick e fa’amuta aloaia ai lenei mataupu, o le taeao ananafi na talia aloaia ai loa e le afioga i le ali’i Fa’amasino ia Fiti A. Sunia le talosaga a le malo, ina ia solofua le moliaga sa latou faila fa’asaga i lenei ali’i, ae taoto atu loa taualumaga o lo o totoe o lana mataupu i lalo o le vaavaaiga a le vaega o le Feterale a le malo tele.

E to’atolu sui o le vaega o Masela a le Feterale na i ai i totonu o le potu fa’amasino i le taeao ananafi, o i latou fo’i ia ua taoto atu i ai le taulimaina o le mataupu a Fletcher, ma ina ua aloaia le solofua e le fa’amasinoga o le mataupu a Fletcher, o le taimi lava lea na tu’u atu ai loa o ia i lalo o le vaavaaiga a sui e to’atolu o le vaega o Masela a le Feterale.

Na fa’amaonia mai e le loia a Fletcher ia McCormick i le Samoa News le malaga ese atu o sui o le feterale ma Fletcher ma le atunu’u i le po anapo mo Hawaii, ona fa’atulaga ai loa lea o isi fuafuaga mo le toe fa’afo’ina atu o ia i Tonga mo le fa’aauauina ai o lana fa’amasinoga o lo o tu’uaia ai o ia.

E pei ona taua i ripoti, o lo o tu’uaia e le malo o Tonga ia Fletcher i le moliaga mamafa o le fasioti tagata, e mafua mai i le fa’alavelave lea o lo o masalomia ai o ia i lona fasiotia o lona to’alua i se tasi mo motu o Tonga, le motu o Tui Vava’u.

E lei mafai e loia a itu e lua ona fa’amanino mai le tulaga o le a o o i ai le va’a faila a le ali’i o Fletcher sa malaga mai ai i Amerika Samoa, le Sea Oak, lea sa i lalo o le vaavaaiga a le malo i le taimi atoa na fa’agasolo ai lana mataupu i luma o le fa’amasinoga.