Meaalofa mai fanau aoga ASCC mo fanau o loo taofia LBJ

O le aoauli ananafi na tauaaoina ai e Tausima’i o lo o galulue i le vaega o lo o fa’ataotolia ai fanau i le falema’i o le LBJ i Faga’alu, meaalofa eseese na foa’i e fanau aoga mai le Kolisi Tu’ufa’atasi a le malo o lo o galulue i le Matagaluega Fa’apisinisi, e fa’ailoa atu ai lo latou loto alofa ma le fia fesoasoani i fanau a le atunu’u.

O le sui o le Vaega a le Business Department a le ASCC ia Dr. Faofua Fa’atoafe na fai ma sui o le Kolisi na te momoliina atu lenei foa’i mo fanau o lo o fa’ataotolia i le falema’i i Faga’alu, ma talia fiafia ai e le Tama’ita’i Tausima’i ia RN Malama A. Masaniai, e fai ai o ia ma sui o le Pulega atoa a le falema’i o le LBJ.

I le taimi na tauaaoina atu ai lenei meaalofa o taumafa, api aoga, meataalo, api aoga ma vaega eseese e fai meaalofa ai i fanau, na taua ai e Dr. Fa’atoafe le fa’aaua pea lea ona fa’atinoina e le Vaega o Fanau aoga o lo o a’oa’oina i le Matagaluega Fa’apisinisi o lenei galuega alofa, ina ia mafai ai ona fa’atino lo latou lagona o le fesoasoani ma le alofa atu.

“O nei meaalofa ua tauaaoina e fanau aoga mai le Kolisi Tu’ufa’atasi, sa fa’atupe lava e i latou ma tapenaina fo’i e i latou, ona o le fa’anaunauga ia maua e avanoa latou te fesoasoani atu ai i fanau a le atunu’u, aemaise ai le atunu’u atoa”, o le saunoaga lea a Dr. Fa’atoafe, ma fa’afetaia ai loa e RN. Masaniai lenei foa’i taua ma le maualuga, lea o le a mafai ai ona maua e fanau o lo o taofia i le falema’i a Tamaiti i Faga’alu ni meaalofa e fa’afiafia ai o latou loto.

Ina ua fesiligia e le Samoa News ia Dr. Fa’atoafe e uiga i lenei foa’i, sa ia taua ai le fa’aauauina mai pea lea e fanau aoga a le Matagaluega Fa’apisinisi i le Kolisi Tu’ufa’atasi lenei tautua mai le tele o tausaga ua mavae seia oo mai lava i le taimi nei.

“O fanau aoga sa latou tu’u fa’atasia lenei foa’i, o lo o a’oa’oina i latou i le vaega Fa’apisinisi a le Kolisi Tu’ufa’atasi (Business Department), ae o le latou kalapu o lo o fa’aaogaina o le “Business Ambassador of ASCC” (BAOA), o i latou ia o lo o fa’atinoina le galuega o le ofo fua atu o meaalofa i vaega eseese o le atunu’u i Kuata ta’itasi, e pei la ona i ai le foa’i mo le LBJ i lenei Kuata”, o le saunoaga lea a Dr. Fa’atoafe.

O le Kuata na te’a nei na foa’i ai e le vaega a le BAOA meaalofa eseese e tele mo Tama ma Tina matutua aemaise ai fanau o lo o tausia i le Nofoaga o Fa’amoemoega i Tafuna (Hope House), ma maua ai fo’i ma le avanoa latou te fa’afiafia ai e ala i pese ma fa’afiafiaga fa’a Samoa.

“E le o iloa po o fea se nofoaga ua fuafua le vaega a le BAOA e momoli i ai le isi a latou foa’i mo le isi Kuata, ae o le agaga atoa o lenei fa’amoemoe, ia a’oa’o fanau aoga ia iloa ona toe foa’i atu i le atunu’u e ala i soo se auala”, o le saunoaga lea a Dr. Fa’atoafe.

Saunoa atili Dr. Fa’atoafe e fa’apea, talu ai o fanau aoga o lo o a’oa’oina i le tulaga fa’apisinisi i le Kolisi Tu’ufa’atasi, e tatau ona malamalama i latou i gaioiga ma foliga o auala e fa’atino ai pisinisi, o le mafua’aga fo’i lea e ala ai ona a’oa’oina i latou i isi la’asaga o le tagata faipisinisi, i lona faia o se galuega e toe fa’afo’i atu ai le fa’afetai i le atunu’u lautele e tusa ai o le lagolagoina o lana pisinisi.

“O gaioiga uma o lo o fa’atinoina e fanau aoga e pei ona i ai le kalapu a le BAOA ma latou foa’i o lo o fa’aauauina pea i kuata ta’itasi, o vaega uma lava nei e fesoota’i ma ta’iala aemaise ai o a’oa’oga fa’apisinisi o lo o mafai ona a’oa’oina ai i latou i totonu o le potu aoga, o le taua fo’i lena o lenei fa’amoemoe, ina ia fa’amasani pea i latou i le fa’atinoina o auala eseese e tatau i le tagata faipisinisi ona ia fa’atinoina pe a avea i latou ma faipisinisi i le lumana’i”, o le saunoaga lea a Dr. Fa’atoafe.

O au ofisa a le BAOA e aofia ai Elisapeta Leo o le latou Peresetene, Jamie Lauama o le sui peresetene, Jia Ying Wang o le Teutupe, ma Asofitu Metuli o le Failautusi.

O faiaoga mo le Matagaluega Fa’apisinisi e aofia ai le susuga ia Ioapo Tauai ma Lam Yuen.