Toe filifilia Su’a Alexander E. Jennings avea ma Faipule o Swains

O le fa’aiuga o le vaiaso na te’a nei i le fonotaga a tagatanu’u o le motu o Swains e sailia ai so latou Faipule mo le maota o sui i le Fono Faitulafono, na latou toe filifilia ai le susuga Su’a Alexander Eli Jennings e toe avea ma o latou sui.

E pei ona masani ai i tulafono o faiga palota a Amerika Samoa, o le ulua’i fa’aiuga e le o aloaia lea mo le faiga palota a le atunu’u mo lenei tausaga 2016, lea ua tauaaoina nei e le Ofisa o Palota.

E silia i le to’a 30 tagatanu’u o le motu o Swains na auai i le fonotaga e filifili ai so latou sui Faipule, lea na usuia i le nofoaga autu o le Ofisa o Palota a le malo i Tafuna i le aso To’ona’i na te’a nei, lea fo’i sa molimauina e sui o le Ofisa o Palota.

O le Komesina o Palota a le malo ia Uiagalelei Dr. Lealofi Uiagalelei na saunoa i le tatala aloaiaina o le fonotaga a Swains, ma ia fa’alauiloa aloaia ai lona tulaga i lalo o Tulafono ma le Fa’avae o Amerika Samoa, mo le valaauina lea o le fonotaga e sailia ai se sui o Swains, ma fa’atula’i ai loa le suafa o le susuga a Su’a na te toe fa’aauauina le nofoa mo Swains.

I lana saunoaga e fa’afetaia ai tagatanu’u uma o Swains ina ua toe filifilia o ia avea ma faipule, na fa’apupula ai e Su’a ni isi o mataupu taua e fa’atatau i le va feagai o Swains ma le faigamalo a Amerika Samoa i le taimi nei, aemaise ai le fesili taua e tatau ona malamalama i ai tagatanu’u uma o Swains, pe aisea e filifili ai le sui o Swains ae le palota.

“O le mea moni lava, e le o amanaiaina Swains i totonu o le faigamalo a Tutuila ma Manu’a. I le 10 tausaga talu ai sa ou sailiili ma su’esu’e ai i le Fa’avae o Amerika Samoa, na ou mauaina ai tala uma e fa’atatau ia Swains”, o le saunoaga lea a Su’a.

Na ia fa’atusatusa le tulaga o lo o filifilia ai le sui o Swains i totonu o le maota o sui, ma le auala o lo o filifilia ai afioga i Senatoa i totonu o le maota maualuga i le Fono Faitulafono, ona o le taumafaiga ina ia fa’atumau pea tu ma agaifanua a Samoa.

“Afai e mafai e Senatoa ona fau tulafono e puipuia ai tu ma aganu’u a Samoa, e amfai fo’i ona tatou fai tulafono e puipuia ai aganu’u ma agaifanua a Swains”, o le saunoaga lea a Su’a.

Sa ia taua fo’i le tele o tausaga o tagi atu pea Swains ia Amerika Samoa ina ia amanaia lona motu, peita’i e o o mai lava i le taimi nei e le o i ai lava se mea o tupu.

“Afai e silia i le $300 miliona le paketi a Amerika Samoa i le tausaga ae na o le $50,000 e aumai mo Swains, o ai la lea e le o amanaia i le va lea, o le tali, o Swains, e le o amanaiaina lava lo tatou leo e le faigamalo a Tutuila ma Manu’a”, o le isi lea saunoaga a Su’a.

E ui i lona talitonuga e le o amanaiaina Swains, ae sa ia fa’afetaia le afioga i le Fofoga Fetalai ia Savali Talavou Ale, ma afioga i Faipule uma o le maota o sui, i lo latou amanaiaina o lona i ai i totonu o le maota fono a le atunu’u, atoa ai ma tofiga ua tofia o ia e galuega ai, e pei o le tofi Ta’ita’i Komiti mo le Komiti o Fa’atoaga a le maota o sui sa ia tautua ai i le nofoaiga lona 34 ua tapunia, aemaise ai isi fo’i tausaga ua mavae sa tofia ai fo’i o ia e avea ma Ta’ita’i Komiti.