Tala otooto o Fa’amasinoga

TALATASI FINAUGA

O le ali’i lea na ia fa’atupu le vevesi i le va o ia ma le latou aiga tuaoi i luga o se fanua ua mae’a ona taoto ai se poloaiga a le fa’amasinoga maualuga, ina ia aua ne’i toe galue ai se tasi pe toe fa’alavelave ai fo ni isi o aiga e lua, ua tu’uaia nei e le malo i moliaga o le tu fua i le fanua o le isi aiga, atoa ai ma le fa’atupu vevesi i nofoaga faitele.

O se vevesi na tula’i mai i Tafuna i le vaiaso na te’a nei, ina ua alu le ali’i o Talatasi Finauga ma taumafai e galue i le fasi fanua lea o lo o tula’i mai ai se vevesi i le va o le latou aiga ma le aiga latou te tuaoi, ma mafua ai loa le vevesi ina ua taumafai tagata o le aiga na a’afia e taofi le ua molia mai lona tu i le fanua, peita’i sa palauvale i ai le ua molia ma fa’aauau pea ona ia galue i le fanua.

Na taunu’u Leoleo ma latou ave ese fa’amalosi mai le ua molia mai le fanua, ma latou maua ai ni atigi fagupia vailima lapopo’a se 3 i le vaega sa fa’atino ai lana galuega, atoa ai ma le manogi pia sa sau mai le tino a le ua molia.

Na fa’aalia e le ua molia i Leoleo e fa’apea, na mafua ona alu e galue i le fanua, ona ua ia vaaia le vaoa o le fanua, ma ua tatau fo’i ona fa’amama le vao ma le mataga.

Na teena e le ua molia moliaga mama e lua ua tu’uaia ai o ia e le fa’amasinoga, le moliaga o le tua fua i le fanua o le isi aiga, fa’apea ai ma le moliaga o le fa’atupu vevesi i nofoaga faitele, ma ua poloaina o ia e le fa’amasinoga ina ia aua ne’i toe alu i le fanua na tula’i mai ai le vevesi, pe toe taumafai fo’i e fa’afesootai le aiga na latou vevesi, a ia avea o ia o se tagatanu’u e tausisi ma usita’i i tulafono a le malo, ma aua fo’i ne’i ona toe tagofia le ‘ava malosi.

TOE TU’UAIA FOI SE ALI’I I LONA FA’AOOLIMA I LONA TOALUA

O le ali’i lea na ta’usala e le fa’amasinoga i le 2 tausaga talu ai i le moliaga o le fa’aoolima i le tulaga tolu, e mafua mai i le fa’alavelave lea na ia fa’aoolima ai i lona to’alua, ua toe tu’uaia nei fo’i o ia i le moliaga lava fo’i lea e tasi, e mafua mai i le fa’alavelave fou lea na fa’atoa tula’i mai i le vaiaso na te’a nei, lea na ia fa’ao’olima ai i lona to’alua a o ia fa’asua’ava.

O le fa’alavelave na mafua mai i se taugaupu i le va o le ulugali’i, ma fa’ai’u ai loa i le fa’ao’olima o le ua molia i lona to’alua e ala i lona fa’alua lea ona po foliga o le fafine, ao matamata i ai lana fanau e to’alua.

O le uso laititi o le fafine na ia viliina le Ofisa o Leoleo mo se fesoasoani, ina ua ia molimauina foliga mafatia o si ona uso atoa ai ma le fefe.

A o fa’agasolo ai taualumaga o le mataupu fou lea ua toe tu’uaia ai le ua molia, ua fautuaina o ia e le fa’amasinoga ina ia aua ne’i ona toe taumafai e fa’afesootai lona to’alua i soo se taimi, pe toe alu fo’i i le fale o lo o nonofo ai le fafine ma lana fanau, ae ia saili se isi nofoaga e nofo ai mo lenei taimi, e fa’atalitali ai taualumaga o lana mataupu, ma ia aua fo’i nei ona toe taumafai e fa’afeso’ota’i lona to’alua ma lana fanau i soo se auala.

Ua fautuaina fo’i e le fa’amasinoga le ua molia ina ia aua ne’i ona toe tagofia le ‘ava malosi poo ni fualaau fa’asaina, a ia avea o ia ma tagatanu’u lelei e tausisi i tulafono a le malo.

TALOSAGA LE ALI’I GAOI MO SE ISI AVANOA

O le ali’i e 24 tausaga le matua lea ua ta’usala e le fa’amasinoga fa’aitumalo i le moliaga mama o le gaoi, e mafua mai i le fa’alavelave lea na ia gaoia ai ni apa meaai mai totonu o se faleoloa ina ua alu ‘ona i totonu ma nana mai i totonu o lona ofu, ua ia talosagaina le fa’amasinoga mo se isi avanoa e tu’uina atu mo ia.

O le vaiaso na te’a nei na ta’usala ai e le fa’amasinoga le ali’i o Alfred Leleua i le moliaga mama o le gaoi, ina ua talia e le fa’amasinoga se maliliega na sainia e le ua molia ma le malo, e tali ioe ai le ua molia i le moliaga o le gaoi, ae solofua le moliaga o le fa’atupu vevesi i nofoaga faitele.

Ae talu ai o le solitulafono lea ua ta’usala ai e le fa’amasinoga ia Leleua, na fa’atinoina a o fa’anofovaavaaia o ia ona o le isi fo’i solitulafono na ta’usala muamua ai o ia i le amataga o le tausaga nei, o le mafua’aga lea ua tolopo ai e le fa’amasinoga le tu’uina atu o sana fa’aiuga i lenei mataupu, se’i iloilo muamua le fa’aiuga sa tu’uina atu muamua fa’asaga i le ua molia.

O ni isi o poloaiga na tuuina atu ia Leleua ina ua faanofovaavaaia o ia i le amataga o le tausaga nei, e le gata na fa’asa ona ia toe tagofia le ‘ava malosi, ae na fa’asa fo’i ona ia toe solia se tulafono a le malo.

O lo o tumau pea poloaiga o lo o tatala ai Leleua i tua e fa’atali ai le aso lea ua fa’atulaga e tu’uina atu ai le fa’asalaga a le fa’amasinoga fa’asaga ia te ia.