Taunu’u Leoleo mai Tonga mo le aveeseina atu ali’i pagota Amerika

Na fa’amaonia e le loia a le malo ia Jerard Murphy i luma o le Fa’amasinoga Fa’aitumalo i le taeao ananafi, le taunu’u mai lea o ni ali’i Leoleo fa’apitoa mai le malo o Tonga, mo le aveeseina atu o le ali’i mai Amerika lea o lo o taofia fa’apagota i le falepuipui i Tafuna, lea o lo o tu’uaia i le malo o Tonga i le fasioti tagata, e mafua mai i le fa’alavelave lea o lo o masalomia ai o ia i lona fasiotia o lona to’alua i le masina o Setema na te’a nei.

O le fa’aiuga o le masina o Setema 2016 na sola ese mai ai Dean J. Fletcher mai le motu o Tonga, ma taunu’u ai i Amerieka Samoa i le aso 4 o Oketopa i lana va’a faila e aunoa ma se fa’atanaga e ulufale mai ai, ma ia tu’uina atu ai fa’amatalaga sese i ali’i Ofisa sa taumafai e fesiligia o ia, ma molia ai loa o ia e le malo i le moliaga mama o lona tu’uina mai lea o fa’amatalaga pepelo i ali’i Ofisa o le malo.

O le mae’a ai o le ulua’i iloiloga a Fletcher i luma o le fa’amasinoga i le taeao o le aso 5 Oketopa, na faia ai loa le poloaiga ina ia taofia o ia i le toese e aunoa ma se tupe na fa’atulaga e tatala ai o ia, e fa’atali ai lana iloiloga lea na fa’ataunu’uina ananafi, ina ua silafia e le fa’amasinoga o lo o tau sailia o ia e Leoleo o le malo o Tonga, e mafua mai i le fa’alavelave e pei ona tu’uaia ai o ia.

Talu ai e le o mafai e le itu a le malo ona fa’amanino i luma o le fa’amasinoga isi fa’amatalaga e fa’atatau i sui o le malo o Tonga lea ua taunu’u mai i le atunu’u, ae poo le a fo’i le isi la’asaga lea ua latou sauni e fa’atinoina, na fa’aulu ai loa e le itu a le malo se talosaga ina ia toe tolopo le mataupu a Fletcher mo se isi vaiaso, ae se’i fa’amautu lelei le maliliega lea ua sauni itu e lua e sainia ina ia fa’amuta ai taualumaga o lenei mataupu.

E talitonu le Samoa News, o tuutuuga o le maliliega lea ua sauni Fletcher latou te sainia ma le malo, o le a ia taliaina ai le ofa a le malo ina ia solofua le moliaga mama o lo o tu’uaia ai o ia, ae o le a ia malie e toe fo’i atu i le malo o Tonga e tali ai i le moliaga mamafa o le fasioti tagata o lo o molia ai o ia e le malo o Tonga.

A o taumafai le ali’i loia ia Murphy e tau fa’ailoa i le fa’amasinoga le mafua’aga o le talosaga ina ia tolopo le mataupu a Fletcher mo le vaiaso e tasi, ona o lo o i ai le fa’amoemoe e tatau ona aofia ai sui o le malo o Tonga i feutanaiga o le maliliega o loo taumafai e fa’amautu, na osofa’i e Sunia le itu a le malo ma fa’amanino i ai le tulaga o lo o taoto ai le finagalo o le fa’amasinoga e uiga i lenei mataupu.

“E aofia ai sui o le malo Tonga i feutanaiga o le maliliega o loo tau fa’amautu e itu e lua”, o le fesili lea a Sunia ia Murphy, ae na tali le loia a le malo, “Ioe”.

“Afai o lo o i ai se isi mataupu fa’asaga ia Fletcher e ese mai i le mataupu lea o loo i luma o le fa’amasinoga, e tatau la ona faila mai e le malo se talosaga tusitusia e fa’ailoa mai ai tulaga uma e uiga i le mataupu lena, e leai se mafua’aga e a’afia ai fua le fa’atulagaina o kalena a le fa’amasinoga ona o sui mai le malo o Tonga lea ua taua le taunu’u mai i le atunu’u”, o le saunoaga lea a Sunia ia Murphy.

“Na pau lava le mataupu fa’asaga ia Fletcher o lo o manatu i ai le fa’amasinoga, e na o le mataupu o loo i luma o le fa’amasinoga i le taimi nei, atoa ai ma le puipuia lea o aia tatau o le ua molia, ae o ni isi mataupu e ese mai ai, e tatau i le malo ona uia auala e tatau ona uia mo le fa’alauiloaina mai o lea mataupu”, o le saunoaga lea a Sunia, ma ia fa’atulagaina ai loa le aso 2 Novema 2016 i le itula e 8:30, o le aso lea e toe fofogaina ai le mataupu a Fletcher i luma o le fa’amasinoga.

Ua toe taofia nei le ua molia i le toese i Tafuna e aunoa ma se tupe ua fa’atulaga, e fa’atali ai le aso lea ua fa’amoemoe e toe valaau ai lana mataupu.