Vavala mai tulaga manuia mo tagata faigaluega kamupani i’a STP

E le i se vaiaso talu ona fetaia’i le to’atele o tagata faigaluega i le kamupani i’a o le Samoa Tuna Processor (STP) ma le tala fa’anoanoa, i le tapunia lea o se tasi o auaunaga a le kamupani i le fa’aiuga o le tausaga nei, a o lea ua toe maua le isi tala fiafia e ui e le i fa’amautuina mai, i le ono i ai lea o se isi kamupani e mafai ona latou fa’aauauina lea tautua a le STP o le a fa’amutaina nei.

E pei ona fa’ailoa aloaia e le ta’ita’i o le kamupani a le Tri-Marine, lea o lo o pulea le STP i se feiloaiga ma le afioga i le ali’i kovana i le vaiaso na te’a nei, o le masina o Tesema 2016 ua fa’amoemoe e fa’amuta aloaia ai le tautua a le STP mai le tu’uapaina o le i’a, ona o tulaga faigata ua i ai le fagotaina o le i’a mai ogasami eseese o le lalolagi.

O le vaiaso na te’a nei na taua ai e se vaega to’atele o tagata faigaluega a le STP i le Samoa News, le vavala mai o ataata o le manuia mo le kamupani, ina ua vaaia sui o ni isi o kamupani i’a mai Amerika, fa’apea ai ma se ali’i mai se aiga faipisinisi iloga i Samoa o latou asia le nofoaga o le kamupani.

“E tusa ai o ripoti sa fa’alalau i tagata faigaluega i le vaiaso na te’a nei, e tusa ma le 4 kamupani e galulue i le tu’uapaina o le i’a o lo o fa’asi’usi’u mata mai i le latou tauaveina lea o le auaunaga a le STP, ma ua logoina fo’i tagata faigaluega e ni isi o Ta’ita’i Samoa, i le vavala mai o ataata o le manuia mo tagata faigaluega i le tausaga fou”, o le fa’amatalaga lea a se tasi o Tina e faigaluega i le kamupani a le STP i le Samoa News.

Ae ina ua fesiligia tagata faipisinisi mai Samoa sa latou asia le nofoaga o le STP i le vaiaso na te’a nei, na taua ai e le molimau e fa’apea, o le tala sa logoina ai tagata faigaluega, o loo i ai se ali’i faipisinisi mai Samoa o lo o malaga fa’atasi mai ma sui o se tasi o kamupani i’a mai Amerika, e fia matamata i le tulaga o lo o i ai le kamupani a le STP, ona o lo o i ai fo’i le fa’anaunauga a le ali’i faipisinisi mai Samoa i le fia iloa atili tulaga o masini ma mea faigaluega uma o lo o fa’aaoga a le STP i ana galuega.

“E silia i le itula atoa o ta’amilo le ali’i faipisinisi mai Samoa ma ni isi o ali’i papalagi e to’atolu i totonu o le kamupani, fa’asolo mai ai i le vaega o lo o fa’atino ai galuega a fafine i le tu’uapaina o le i’a, aemaise galuega fa’atino i luga o le uafu”, o le fa’amatalaga lea a le molimau.

E lei manuia taumafaiga a le Samoa News i le tau sailia lea o se fa’amatalaga mai le ofisa autu a le STP e tusa ai o lenei mataupu, peita’i na fa’amaonia mai e se tasi o tagata faigaluega sinia e fa’apea, o lo o pisi lava le pulega a le kamupani i le taimi nei i le faia o fonotaga ma sui o kamupani o lo o fa’ailoa mai lo latou naunau i le fa’aauauina o le tautua a le STP, e aofia ai ma le ali’i faipisinisi mai Samoa.