Tala otooto mai le Fa’amasinoga

ATUGALU FA’AMASINO I LE TUAI ONA MAUA RIPOTI A LEOLEO

O le tele o mataupu tau solitulafono na toe tolopo i le vaiaso na te’a nei i luma o le fa’amasinoga fa’aitumalo, e mafua mai i le tuai lea ona maua atu o ripoti a leoleo e tusa ai o fa’alavelave sa tutupu, na fa’aalia ai loa e le afioga i le ali’i fa’amasino ia Fiti A. Sunia se atugaluga o le fa’amasinoga, i le avea lea o le tuai ona maua o ripoti a leoleo ma auala e toso ai galuega fa’atino a le fa’amasinoga.

E silia i le 10 ni isi o mataupu tau solitulafono na talia e le fa’amasinoga le talosaga a le malo ina ia toe tolopo le aso e iloilo ai, ona o lo o fa’atali pea lava le malo i ripoti a Leoleo.

Na fa’amalulu Sunia i loia a le malo ina ua tau siisii lona si’ufofoga e tusa ai o le tuai ona maua o ripoti a Leoleo, aemaise ai, o le tiute lena a le Komesina ma le Ofisa o Leoleo, peita’i i lona talitonuga, e tatau fo’i ona i ai se pito laau a le malo e unaia ai le vaega o Leoleo ina ia fa’anatinati atu i totonu a latou ripoti.

O ni isi o mataupu na toe tolopo e aofia ai le mataupu fa’asaga i le ali’i lea na ia fa’ao’olima i lona to’alua mai Faleniu, o ali’i e to’alua na taofia mai i Iliili ina ua la fa’atupuina le vevesi ao faia sa latou inugapia, fa’apea ai ma le mataupu fa’asaga i se ali’i mai Pago Pago, lea o lo o tu’uaia i lona gaoia o ni oloa mai totonu o se faleoloa i Tafuna.

E ui ua toe tolopo mataupu e pei ona taua, ae ua fautuaina e Sunia le itu a le malo ina ia fautuaina le ofisa o Leoleo e tusa ai o a latou ripoti.

RICHARD SEFO

O le vaiaso na te’a nei na faila e le malo le moliaga mamafa o le ave ta’avale a o se’i le laisene fa’asaga i le ali’i o Richard Sefo, e mafua mai i le fa’alavelave lea na ia maua ai o ia e Leoleo o lo o ia fa’afoeina se ta’avale i luga o le alatele a le malo i Tafuna i le vaiaso lava na te’a nei.

I faamaumauga a le fa’amasinoga o lo o taua ai e fa’apea, e fetaui lava le tipi e le ta’avale a Sefo o se pasi la’upasese i le vaega tonu o lo o i ai le malae tapolo i Iliili, ae oo atu loa fo’i ma se ta’avale a Leoleo sa tiute ai i le vaega lea o le atunu’u, ma fa’atonu ai loa le ali’i o Sefo e afe i tua lana ta’avale.

Ina ua fesiligia e Leoleo ia Sefo i le mafua’aga o lona tipiina o le pasi, sa tali le ua molia, o lo o natinati e piki mai lana fanau aoga ona ua leva ona tuua le aoga. Sa ia toe fa’atoese fo’i i Leoleo i lona le usitaia o le poloaiga e fa’asa ai ona ia fa’afoeina se ta’avale ao se’i lona laisene, ona e leai se isi o i latou e mafai ona alu e piki mai lana fanau mai le aoga.

O le masina o Tesema 2015 na se’i ai e le fa’amasinoga le laisene a Sefo mo le 12 masina, ina ua ta’usala o ia i le moliaga o le ave ta’avale ‘ona. O se tasi o tuutuuga o lana nofovaavaaia e 12 masina, e le gata na fa’asa ona ia toe fa’afoeina se ta’avale, ae ua fa’asa fo’i o ia ona ia toe soli se tulafono a le malo.

O lo o tatala pea Sefo i tua e fa’atali ai le isi ana iloiloga lea ua fa’atulaga e faia i le amataga o le masina fou. A o tatala ai o ia i tua, ua fautuaina o ia ina ia aua ne’i ona toe solia se tulafono.