Pasia auva’a Manu’atele suega faapitoa a le Coast Guard

O se tasi o tala fiafia mo ali’i e to’a 6 lea na malaga i Amerika e auai o suega faapitoa, mo le avea ai o i latou ma ali’i va’a o le va’a fou a le malo, le Manu’atele lea ua fa’amoemoe e tautuaina le itumalo o le Manu’atele, e le gata ua latou ausia suega sa faia e saili ai lo latou tomai i luga o le sami, ua ausia fo’i tusi pasi fa’apitoa mo soo se tagata e avea ma auva’a o soo se va’a i luga o le sami (Able Seaman Certificate).

I le fonotaga mulimuli a le afioga i le ali’i kovana ia Lolo Matalasi Moliga ma lana Kapeneta i le masina na te’a nei, na fa’ailoa ai e le Sui Faatonusili o le Pulega o Uafu ma Taulaga ia Chris King fuafuaga a le matagaluega mo le va’a a le malo, lea ua fa’amoemoe e taunu’u mai i le atunu’u i le vaiaso lona lua o Novema, i le mae’a ai lea o suega e fa’atautaia e le Coast Guard i le aai o Seattle sa fausia ai le va’a.

Ae i se fesootaiga ma le Faatonusili o le Pulega o Uafu ma Taulaga i le vaiaso nei, afioga Taimalelagi Dr. Claire Poumele, na fa’amaonia mai ai e Taimalelagi suiga fou ua i ai le taimi tonu e tatau ona taunu’u mai ai le va’a o le Manu’atele i laufanua o Amerika Samoa.

Saunoa Taimalelagi e fa’apea, o lo o i ai pea le va’a o le Manu’atele i le nofoaga sa fausia ai e le kamupani fauva’a a le Nichols Brothers, ona o lo o fa’agasolo pea i le taimi nei suega a le Coast Guard ina ia mautinoa e saogalemu ma lelei le va’a mo le la’uina o uta ma pasese.

E 3 suega i luga o le sami a le Coast Guard ua mae’a ona fa’atinoina mo le va’a, ae o lo o i ai pea isi suega e moomia le fa’ataunu’uina, e aofia ai le faia o suega i va’a fa’aola, fa’apea ai ma le siakiina o se masini na te fa’atonutonuina le alu atu o le suau’u i le afi o le va’a, ma ua fa’amoemoe e tatau ona o o atu i le aso 26 Oketopa 2016 ua mae’a uma suega a le Coast Goard o lo o moomia le fa’ataunu’uina i le va’a.

Mo le au va’a, ua pasia uma e le auva’a e to’a 6 sa malaga i Seattle suega sa fa’atinoina mo le faia o galuega fa’aola atoa ai ma le lavea’iina o se soifua i luga o le sami, ma le to’afa ua latou maua tusi pasi o le “Able Seaman Certificate”.

“O le mae’a ai ona fa’atinoina uma o suega a le Coast Guard o loo moomia le fa’ataunu’uina ma pasia uma fo’i ia suega, ona fa’atoa maua ai loa lea o le avanoa e fa’atinoina ai e le tatou lava au va’a a latou su’ega mo le va’a i luga o le sami, lea ua fa’amoemoe e faia i le va o le aso 27-30 o Oketopa”, o se vaega lea o le tusi a Taimalelagi e tali mai ai i fesili a le Samoa News.

O le vaiaso muamua o Novema lea ua fa’amoemoe e tatau ona tuua ai e le va’a o le Manu’atele le aai o Seattle, ma aga’i mai ai loa i le setete o Hawaii, lea ua faa’moemoe e fa’amautu ma malolo ai mo ni nai aso, a o le i malaga mai i Amerika Samoa.

Saunoa atili Taimalelagi e fa’apea, toe pau lava le vaega o lo o mafua ai ona tuai le tauaao aloaiaina mai o le va’a, o le tau fa’amae’aina lea o tiute fa’atino a le kamupani fauva’a sa latou fausiaina le va’a, ae ua le mafai ona taofiofi le naunau o le auva’a ina ia tu’u mai aloaia loa le va’a a le atunu’u.

“Sei vagana ua tu’u mai aloaia se fa’aaliga a le Coast Guard e fa’ailoa mai ai ua lelei atoatoa ma pasia suega uma sa faia mo le va’a, ona fa’atoa matou tauaaoina loa lea o le va’a ma fa’agasolo loa gaioiga mo le malaga atu i Amerika Samoa”, o le saunoaga lea a le afioga a Taimalelagi e fai ai o ia ma sui o le latou au malaga.