Tele se vasega pauta o le aisa aumai fa’anana i se pusa meli

E to’atasi se ali’i ua taofia nei e Leoleo i le toese i Tafuna, ona o tu’uaiga i lona a’afia lea i le fa’alavelave lea na maua ai e sui o le Ofisa o Tiute se afifi o lo o aumai fa’anana ai se vaega tele o le pauta fa’asaina i totonu o se pusa meli i le Falemeli i Fagatogo i le vaiaso na te’a nei.

O le ali’i o Yuseff Carter ua tu’uaia nei i le moliaga mamafa o lona umia fa’asolitulafono lea o se vaega o le pauta fa’asaina o le aisa (methamphetamine), lea e fa’amalosia ai le tuliina o se fa’asalaga fa’a falepuipui e le itiiti ifo i le 5 tausaga, ae le sili atu fo’i i le 10 tausaga i le toese, po o le fa’asala i le fa’asalaga tupe e le itiiti ifo i le $5,000 ae le mafai ona sili atu i le $20,000.

O le mataupu lenei na tofu atu i le Ofisa autu o Leoleo i Fagatogo, ina ua talosagaina e se sui o le Ofisa o Tiute se fesoasoani a le Ofisa o Leoleo, mo le fa’aauauina lea o su’esu’ega e fa’atatau i se vaega o le pauta fa’asaina o le aisa, lea sa masalomia na aumai fa’anana i se afifi sa aumai i le pusa meli a le ua molia.

Sa talosagaina fo’i e le sui o le Ofisa o Tiute le masini lea o lo o fa’aaoga e Leoleo e su’e ai fualaau oona, mo le su’eina o vaega o le pauta pa’epa’e sa maua i totonu o le afifi sa masalomia.

Na taua i fa’amaumauga a le fa’amasinoga e fa’apea, o le aiffi lea na aumai fa’anana ai vaega o fualaau faasaina e pei ona tu’uaia ai Carter, sa aumai fa’ameli puipuia, ma sa teuina fo’i le afifi i totonu o se container o lo o tusia ai le igoa o le ‘Amazon’, ae i totonu o le container lea, sa i ai se masini e mafai ona fa’aaoga e fa’aali ai ‘ata tifaga, atoa ai ma isi fo’i totoga o masini e alu i le uila.

I le mae’a ai o le su’ega sa faia, sa fa’amaonia ai loa, o le pauta pa’epa’e sa i totonu o le afifi, o se vaega o le pauta fa’asaina o le aisa, lea e tusa ma le 1.2 aunese lona mamafa.

I faiga masani a le Ofisa o Tiute i soo se taimi e masalomia ai ni afifi mai fafo o lo o aumai fa’anana ai vaega o fualaau fa’asaina, o le taimi lea e tu’u ese ai e ali’i Ofisa o le Tiute le afifi lea, e fa’atali ai le taimi e alu atu ai le tagata e ana le afifi e piki ese mai lana afifi.

Ina ua taunu’u Carter i le nofoaga o le Falemeli i Fagatogo e piki ese mai lana afifi, sa fa’ailoa i ai e ali’i Ofisa o le Tiute le mafua’aga ua ala ai ona tu’u ese lana afifi, ona o lo o masalomia le i ai o vaega o fualaau fa’asaina i totonu.

Ina ua mae’a ona siaki le afifi atoa ai ma le mae’a lea ona faia i ai o se su’ega i vaega o fualaau fa’asaina sa maua ai i totonu, na fa’atoa maua ai loa le avanoa leoleo e fesiligia ai le ua molia e uiga i lenei mataupu, atoa ma le faitauina i ai o ona aia tatau fa’aletulafono.

Na taua e Carter i Leoleo e fa’apea, o le aso Lulu, 12 Oketopa na alu ai e siaki lana meli, ma ia maua ai se pepa samasama i totonu o lana meli, e fa’ailoa atu ai, e i ai lana afifi e tatau ona piki mai i le vaega o le Falemeli e piki mai ai uta, ae talu ai ona tuai ona alu e siaki lana meli, na manatu ai loa e sili pe a alu i le fale seia malama le isi aso fou.

Sa ia fa’ailoa fo’i i Leoleo lona fa’atalitali i se afifi e lafo mai e lona Tama mai San Diego i Kalefonia mo ia, o le mafua’aga lena na alu ai i le Falemeli, ae na fa’ateia o ia ina ua taunu’u atu i le Falemeli, ae fa’ailoa ane e ali’i Ofisa o le Tiute ia te ia, o lana afifi lea o lo o masalomia i le aumai fa’anana ai o vaega o fualaau fa’asaina.

Sa ia fa’ailoa atili fo’i i Leoleo e fa’apea, o le afifi lea o lo o ia fa’atalitali ai e maua mai i lona Tama, o le afifi e aumai i le kamupani o le Amazon, ae ina ua fa’ailoa atu e ali’i Ofisa o le Tiute ia te ia, o lana afifi na aumai o lo o tusia ai le igoa o le Amazon, sa ia fa’ailoa i ai o le Amazon le ituaiga afifi lea o lo o ia fa’atalitali i ai, ae le o se afifi e aumai ai ni vaega o fualaau fa’asaina.

Sa ia taua fo’i i Leoleo e fa’apea, ina ua fa’amaonia o vaega o fualaau fa’asaina lea sa aumai i totonu o le afifi, sa ia toe autilo fa’alelei i le afifi ma ia iloa ai, na te le iloaina le igoa o le tagata na lafo mai ai, ae sa ia ioeina, o lana pusa meli lea na lafo mai ai le afifi.

O le taeao ananafi na tula’i ai Carter i luma o le fa’amasinoga fa’aitumalo mo le ulua’i taimi, ma ua toe tolopo lana mataupu e toe fofogaina i le aso Tofi o le vaiaso nei, mo le fa’atulagaina o le aso e fa’ataunu’u aloaia ai lana uulua’i iloiloga.

E $5,000 le vaega tupe lea ua fa’atulaga e le fa’amasinoga e totogi, ona fa’atoa mafai lea ona tatala o ia i tua mai le toese i Tafuna, ae afai e mafai ona tatala o ia i tua, ua poloaina o ia ina ia aua ne’i ona toe solia se tulafono a le malo, aua fo’i ne’i taumafai e sola ese ma le atunu’u, a ia avea o ia ma tagatanu’u lelei e tausisi i tulafono a le malo, ma auai i soo se taimi e valaau ai lana mataupu.