E LE O OE O SE SULI MONI - Vaega XII

Na nofo i lalo le fafine o Lucy ona tago atu lea ua uu mai le lima o Ianeta ma fai atu i ai, “Vaai oe Neta si a’u tama, ou te malamalama i le tulaga lena e te talanoa mai ai, ae o le mea moni lava ia e iloa, e le tatau ona fai fa’apea e le ulugali’i milionea lenei oe, tusa lava poo a o la manatu e fa’atatau ia te ia, e tatau lava ona la tausi ma le fa’amaoni ia te oe, ina ia tusa ma ala o le tulafono”. Na vaaia e le ulugali’i o le tagi o le teineititi o Ianeta, ma ua atili ai ona oso lagona alofa o le ulugali’i ma la manatu ai loa e sili pe a la o ma ave le teineititi. Ua fa’ananati gaioiga a le ulugali’i o Meki ma Lucy, ona la o ai loa lea ma ave le teineititi o Ianeta i lo la aiga i le po lea. O se fiafiaga i le teineititi lona alu ese mai ai i le nofoaga o lo o ola pologa ai, ae ua mafuta atu nei i lona matai fou o Lucy ma lona to’alua o Meki.

E lei malama ane le taeao ae ua feala le ulugali’i ma tapena le meaai o le taeao mo Ianeta, ona sauni ai loa lea o le tamaloa o Meki mo lana galuega, ae mulimuli ai sauni Lucy ma Ianeta e o i le aoga. Na mae’a lelei le aso aoga lea, e leai lava se fa’aaliga ua taunu’u atu i le aoga e fa’ailoa atu ai se tulaga e fa’apea o lo o tau saili e le ulugali’i milionea ia Ianeta po o fea ua alu i ai. O le lona tolu o aso talu ona nofo Ianeta i lona aiga fou na fa’atoa alu ai le fafine milionea o Mekala i le aoga o lo o aoga ai Ianeta e tau saili le teineititi po o aoga, ae o le taimi fo’i lea ua mae’a ai ona loto e le tama’ita’i faiaoga ia Lucy lona Pule e fa’atatau i le tulaga lea ua i ai Ianeta ma le nofoaga fou lea ua nofo ai, ona o le tulaga pologa ma le pagatia o lo o i ai lona olaga nofo to’atasi. “E tusa ai ma ripoti ua oo mai i le Ofisa, na maua atu e se tasi o tama’ita’i faiaoga o le matou aoga ia Ianeta o lo o savali atu na o ia i le leva o le po i le pisi o le auala, ona ia fa’atu lea o le ta’avale ae piki o ia ma momoli loa i le Ofisa o Leoleo na latalata ane, o le taimi nei la, o lo o su’esu’eina e le Ofisa o Leoleo le mafua’aga o le alu ese mai o Ianeta mai lona aiga, ae o le itu e fa’ateia ai le mafaufau, o lea ua tuana’i aso e 3 talu ona le toe vaaia Ianeta ma le aiga ao lenei fa’atoa oo mai oe le Tina e su’e mai”. o le tala lea a le Puleaoga i le fafine o Mekala, ae sa na o le punou lava i lalo o le fafine ua le toe gagana i se upu.

“Se fa’amolemole lava lau susuga a le Puleaoga, pe mafai lava ona ou vaai ia Ianeta”, o le fesili ane lea a Mekala ma ona foliga ua amata ona ita, ae na fa’ailoa ane i ai e le Puleaoga, “E le mafai ona e feiloa’i ia Ianeta, e le o fa’atagaina fo’i se isi o le aoga ona talanoa ia Ianeta i le taimi nei, ona o lo o i lalo o ia i le vaaiga a Leoleo, atoa ai ma su’esu’ega o lo o fa’agasolo i le taimi nei, pe fa’amata sa leaga le tausiaina o ia i lona aiga muamua sa nofo ai, ae fa’amaonia lena tulaga, e ono aveesea mai e le malo lenei alualutoto mai lalo o le lua vaavaaiga, ae tu’uina atu i se isi aiga e alolofa ma tausi fa’alelei ia te ia”.