E LE O OE O SE SULI MONI - Vaega XI

Ua sosolo lemu atu nei le ta’avale a le ulugali’i ma paka tonu lava i luma o le tama’i fale o loo nofo ai Ianeta, ona oso lea o le Tamaloa o Meki i fafo ma lana masini pu’eata e fa’aaoga i galuega a le Ofisa, ua pu’e ai le ata o Ianeta o loo moe fa’agaulua i fafo i le malulu, ona fa’atoa ia fafaguina ai loa lea o le teineititi, ae o le fafine faiaoga o Lucy i le taimi lea, ua na o le nofo i totonu o le ta’avale ma le maligi o ona loimata, i le momomo o lona loto i le vaaiga mata’utia lea ua la vaaia i lea po. O le te’i o Ianeta i le tau fagu atu o se tagata ia te ia ma ta’u lona igoa, na mafua ai ona ala valevale a’e i luga ma tau autilo solo po o ai lea e valaau atu i lona igoa, ae na te’i le teineititi ina ua ia vaaia se ta’avale o lo o tu i ona luma, ma le Tamaloa lea na la talanoa i le afiafi, o lea fo’i ua ia toe vaaia i le po lea. “Ianeta, aisea ua e moe ai i fafo i le malulu”, o le fesili lea a Meki i le teineititi, ae sa na o le pupula to’a o le teineititi aga’i i luga o le fale a lona matai, poo iloa mai le ta’avale lea o loo paka atu i totonu o le fanua.

“Aua e te popole, o lea ua ma oo mai ma lo’u to’alua o Lucy e saili se auala e fesoasoani ai ia te oe, ma le olaga pologa o loo e ola ai nei”, e uma atu loa le tala lea a le tamaloa o Meki ae vaaia loa e Ianeta le matala mai o le faitoto’a o le ta’avale, ma ia vaaia ai lana faiaoga o Lucy ua oso mai i fafo o le ta’avale, ma ona foliga fiafia ma valaau ane, “talofa Ianeta”, e fai lava tala a le fafine o Lucy ma oso mai ua opo atu le teineititi ma fusi mau i lona fatafata, ona la fetagisi ai lava lea ma le teineititi. E ui i le tulaga mataga ma le eleelea o le tama’i fale o lo o nofo ai Ianeta, ae na talosaga lava i ai le ulugali’i mo se avanoa latou te o ai i totonu o le fale, se’i latou talatalanoa ma fai sana meaai, ailoga na maua sana meaai i le afiafi. O se vaaiga fa’amomoi loto i le ulugali’i le taimi na latou ulufale ai ma Ianeta i totonu o lona fale, ma la iloa ai, ua lava foliga o le fale e ta’u mai ai, e le o se tagata soifua o loo nofo ai i mafaufau o le ulugali’i o lo o avea ma matai o lenei alualutoto, e na o le tasi lava le fale o loo fofola i le isi itu, ae o le isi itu o loo tu’u atu ai le tama’i laulau ma le nofoa, lea o loo fa’aaoga e Ianeta e fai ai ana mea’ai toe fai ai i luga ma ana meaaoga. A oo i le aso e matua vevela lava le fale, ae a oo fo’i i le po e matua malulu lava totonu o le fale, e mafua mai i le ituaiga fausaga o loo i ai, ae ofo le ulugali’i i le mafai ona nofo ai lenei teineititi pologa.

Ua fetilotilofa’i le ulugali’i, tilotilo atu le isi i le tasi, ona tago atu lea o Lucy i le lima o Ianeta ma fai atu i ai, “Ianeta, e te fia nofo lava i lenei fale fa’apenei, tuua na o oe i le po, malulu, leai se aluga poo se ie afu, e te le o maua fo’i le fiafia i lou olaga, o e mafaufau e te fia nofo i se isi nofoaga e sili atu nai lo le nofoaga lenei”, o le fesili lea a le fafine faiaoga o Lucy ia Ianeta, ma ia aapa atu ua fusi mai le teineititi, ae sa leai lava se upu na gagana atu ai le teineititi, sei vagana ai le maligi o ona loimata. “Ianeta, aua e te tagi ae fa’ailoa mai le manatu o loo i lou loto, ina ia faigofie ai ona ma malamalama ma lo’u to’alua i le lagona o loo ia te oe, ona o lea ua ma molimauina tulaga fa’aletonu o le nofoaga ma le olaga o loo e ola ai i le taimi nei”. O meaai na ave e le ulugali’i na latou aai fa’atasi ai ma Ianeta i luga o lana tama’i laulau ‘ai, ma amata ai loa ona taumafai le ulugali’i e fa’atalatalanoa le teineititi i le latou mafutaga ma le ulugali’i ua avea nei ma ona matai. O le mae’a o le mea’ai, na fa’ateia ai loa le ulugali’i ina ua talanoa atu Ianeta ia tei laua, “ua ou iloa lo oulua alolofa ia te a’u, ae o lo’u aumau ai i lenei tama’i fale ma lenei aiga, o lo’u talitonuga, o lo’u aiga moni lava lenei na ou ola mai ai, e ui fo’i i uiga saua ma le le alofa o loo fai mai e lo’u matai ia te a’u, ou te ola fiafia lava ina ua ou mautinoa, o lo’u aiga moni lava lenei”.