Pasia i le faitauga fa’alua le i’ugafono fa’aopoopo Senatoa mo Manu’a

O le taeao nei lea ua fa’amoemoe e faitau tolu ai le iugafono soofa’atasi a le Senate, lea e talosagaina ai suiga o le Fa’avae, ina ia mafai ai ona fa’aopoopo ni isi nofoa se lua mo Manu’a i le Maota Maualuga, i le mae’a ai lea ona pasia e le maota maualuga o lenei iugafono soofaatasi i le aso Faraile na te’a nei.

O le afioga i le ali’i senatoa ia Lagolagi Fono Savali Vaeao na ia fa’atulai le mau ina ia tu’uina mai le iugafono soofaatasi a le maota maualuga e fa’apasia e le maota, lea fo’i na lagolagoina ma fulisia uma i ai afioga i Senatoa e to’a 13 sa auai i le aso Faraile na te’a nei.

O se fonotaga fa’apitoa a le maota maualuga sa faia i le aso Tofi na te’a nei, lea na toe talanoaina ai lenei mataupu, ma pasia ai loa ina ia tu’uina mai le mataupu mo lona faitauina fa’alua, ma faia i ai se finagalo o le maota.

E pei ona taua i le tino o le iugafono soofaatasi e fa’apea, ia mafai ona faia se suiga i le Vaega II, Maga 2 ma le 4 o le Fa’avae Toe Teuteuina a Amerika Samoa, ina ia mafai ai ona fa’aopoopo ni nofoa se 2 mo Manu’a i le maota maualuga.

I le tino o le i’ugafono so’ofa’atasi o lo o taua ai e fa’apea, e 15 lava Itumalo mavae fa’aleaganu’u o Amerika Samoa, ma o le 5 o ia Itumalo mavae, o lo o i ai lea i le itumalo o Manu’a, peita’i, e na o le to’atolu lava senatoa o lo o suia mai Itumalo mavae ia e 5 i Manu’a.

Na taua atili i le i’ugafono so’ofa’atasi e fa’apea, o Amerika Samoa e na o le pau lea o le vaega o Amerika e 2 maota Fono e le o atoa sui o ona Itumalo i le Senate. O Saipan, le Atu Mariana i Matu, e to’a 9 Senatoa mo Itumalo Faa Senatoa e 3.

O Setete e pei o Hawai’i, e palotaina o latou Senatoa mai le aofa’i tutusa o latou Itumalo fa’apalota o lo o i ai, e fa’apena fo’i le setete o Kalefonia, e palota le Senatoa e tasi mo itumalo ta’itasi.

O isi setete e pei o Lousiana, e palota a latou Senatoa e alu i le itumalo e tasi, o lona uiga e palota le senatoa e to’atasi mo le itumalo fa’apalota e tasi. O lona uiga, e fa’atusatusa lava le aofa’i o Seatoa i le aofa’i o itumalo.

Na taua fo’i i le i’ugafono soofa’atasi e fa’apea, ua tele naua tausaga e le o atoa pea sui o Manu’a i le Senate, ma ua oo i le taimi ua tatau ai ona atagia i sui o le Senate a Amerika Samoa mea o lo o faia i isi vaega o le Iunaite Setete.

O suiga la e pei ona taua i totonu o le i’ugafono so’ofa’atasi, “e ta’ito’atasi mai le Senatoa mai le itumalo ta’itasi nei e 5 o Manu’a; Ta’u, Fitiuta, Faleasao, Olosega ma Sili, m ma Ofu”.

Ina ua fa’atoa ulufale i totonu o le maota maualuga le i’ugafono soofaatasi lenei i le masina o Fepuari 2016, na faia ai le fa’aiuga a le maota maualuga ina ia toe taoto le i’ugafono i le komiti mo se isi iloiloga, ina ua tele suiga na manatu ni isi o afioga i Senatoa e tu’u i ai.

O le afioga i le ali’i Senatoa ia Galea’i M. Tu’ufuli, na fa’aulufaleina le i’ugafono so’ofa’atasi lenei.