GAOTEOTE: Aua le fa’atauaina tala a le tagata muimui

Na toe fa’amanino e le Peresetene o le Senate i afioga i Senatoa i le taeao ananafi, lana saunoaga lea e masani ona fa’aleo i totonu o le maota e fa’atatau i tagata o lo o fai fai upu i galuega fa’atino a le Fono, “e le tatau ona ma’imauina se taimi o le Fono e fa’ataua ai tagata a tagata muimui”.

“O le tagata tau fa’aleaga, e le o le finagalo lea o le Ali’i, e fiu lava le tagata tau fa’aleaga e tau fa’aleaga, ae a le finagalo lava i ai le Ali’i, e le mafai ona fa’ataunu’uina lona mana’o”, o le saunoaga lea a Gaoteote e tali atu ai i le mataupu na laga e le afioga i le ali’i Senatoa ia Laolagi Fonoti Savali Vaeao, e fa’atatau i sanoaga a se tasi o Tamali’i o le atunu’u sa fa’asalalau e se tasi o vaega fa’asalalau i le atunu’u, e fesiligia ai le iloiloga a le Senate sa valaauina i le vaiaso nei ma le Komiti Fa’afoe o le Faletupe a le malo, mo le fa’amaninoina o ni isi o mataupu o lo o fia malamalama i ai le atunu’u e fa’atatau i le faletupe.

Na tau fai vevesi afioga i Senatoa ma Faipule i le taeao nei ina ua latou faafofoga i se saunoaga a le afioga i le Matua ia Pulu Ae Ae Jr, e fa’atatau i taumafaiga a le malo e fa’atula’i le Faletupe fou lea ua fa’amoemoe e tatala i le aso Gafua o le vaiaso fou, ma tau fai lagalaga ai loa finagalo o ni isi o Senatoa ma Faipule i le taeao ananafi.

Na taua e Pulu le isi vaega fa’asalalau e fa’apea, e le talafeagai le fa’afoe e le malo o se faletupe, aua e o o lava fo’i i le Faletupe o Atina’e lea o lo o fa’afoe e le malo i le taimi nei, o lo o tula’i mai ai le tele o fa’aletonu. Na taua fo’i e le Matua lona taulimaina o le lisi o tagata uma sa faia a latou nonogatupe i le Faletupe o Atina’e a le malo, a o lea ua fa’amagalo a latou nonogatupe.

I le talitonuga o le afioga i le Matua, sa le tatau ona valaau e le Senate le iloiloga ma le Komiti Fa’afoe o le Faletupe, ona e i ai lona talitonuga o lo o fa’atatau gaioiga uma i tulaga o faiga palota o lo o lumana’i nei.

Na taua e le afioga i le ali’i Senatoa ia Laolagi lona fa’anoanoa tele i le saunoaga a lenei tamali’i, ma le auala ua ia fesiligia ai le galuega sa fa’atinoina e Tama o le atunu’u, ona o le taumafai ina ia fa’amanino i le atunu’u fa’amatalaga uma e fa’atatau i le faletupe fou a le malo.

Na faamanino e Laolagi i luma o le maota e fa’apea, ua manino le tulafono na pasia e le fono e fa’atula’i ma fa’afoe ai galuega a le faletupe fou a le malo, pau le agaga na mafua ai ona valaau le iloiloga i le vaiaso nei, o le talosagaina lea o le Komiti Fa’afoe o le Faletupe na ia latou fa’amanino i le atunu’u ni isi o vaega laiti e fa’atatau i le latou auaunaga, a o lumana’i ai le tatala aloaiaina o lenei galuega tele i le vaiaso fou.

Na taua e Laolagi lona lagona fa’anoanoa ona o saunoaga a lenei tama’i’i o le atunu’u, e foliga mai ua ia ta’u maualaloina ai le galuega tele sa fitaituga i ai le maota o tama matutua o le atunu’u.

“O le iloiloga na mafua ai ona aami le Komiti Fa’afoe e oo mai e feiloa’i ma le maota, ina ia toe fa’amanino ni isi o tulaga laiti e fa’atatau i le latou tautua, a o le i tatalaina aloaia la latou auaunaga i le atunu’u i le aso Gafua o le vaias fou, ae o saunoaga a lenei Tamali’i fai mai ua taumafai le Senate e tau sili ni isi o vaega o le malo, ou te manatu ua le talafeagai lana saunoaga tu’ulafoa’i ua faia, ou te manatu fo’i ina ia silafia e le Tamali’i lea, e le fa’avaea galuega a le maota maualuga i ni auala o palota po o ni isi lava mafua’aga”, o le saunoaga lea a Laolagi.

Na fa’ailoa e Gaoteote i luma o le senate e fa’apea, o le taimi lava e mae’a ai ona lalafo afioga i Senatoa mo le talanoaina o se mataupu, e le toe taliaina ai lava se isi leo muimui e mulimuli mai ai i tua.

“A mae’a loa ona lalafo afioga i Senatoa i se mataupu ma ua tasi i ai le tofa, e le toe fa’aaogaina i ai se manu e i vale (tulou), e le fa’aaogaina fo’i se tala solo i tua e toe umu potopoto ai le Fono Faitulafono a le atuu’u, o manatu ua mae’a ona lalafo i ai le maota, o le finagalo lena o le maota maualuga”, o le saunoaga lea a Gaoteote.

Na fa’afetaia e Gaoteote le finagalo fa’aalia o Laolagi, e atagia mai ai lona manatu maualuga atoa ai ma le puipui i le maota o lo o afifio ai Tama matutua o le atunu’u.

“Pau lo’u popolega o lo o i ai, ne’i avea le pola motu i tua ma le tagata na soifua mai lava ua ave i ai e le Atua le ola muimui e fai ma auala e toe tatala ai le finagalo o le maota ua uma ona taoto, o le tatalo ma le fautuaga a le laulau, aua le avea le manu i vale i le vasa e fai ma auala e toe fa’alavelave ai i le tofa ua uma ona saili e le Fono, ae tatou vaavaai pea i luma i auala e manuia ai le atunu’u”, o le saunoaga lea a Gaoteote.

Saunoa le ali’i peresetene e faapea, nei ese se manatu o se isi i le mafua’aga na ala ai ona valaau i le iloiloga a le maota maualuga, ae o le mea moni, ua taunu’u upu a le atunu’u, ua logo i Pulotu le tagi a Tai’ii, i se isi faaupuga, ua fa’afofoga le Atua i le tagi a le atunu’u, tula’i mai ai loa ma le afioga i le ali’i kovana ma fa’atulaga le faletupe fou, o le agaga fa’afetai lava e ave i le kovana ma le faigamalo, ina ua latou manatu tali le tulaga pagatia ma le oi o le atunu’u.

I Iuma o le maota o sui i le taeao ananafi, o le afioga i le ali’i faipule ia Faimealelei Anthony Fu’e Allen ma tula’i  ma fa’aleo lona lagona le fiafia, ona o saunoaga a le afioga a Pulu sa ia fa’alogo ai i luga o le leitio i talavou o le taeao nei.

E le i taua e Laolagi le suafa o Pulu i luma o le Senate, se’i vagana ai luma o le maota o sui na ta’u ai e Faimealelei le suafa o le afioga i le Matua ia Pulu.

Saunoa Faimealelei e fa’apea, e lagona lona fa’anoanoa ona e foliga mai ua tu’uaia e le afioga i le Matua ia Pulu i lana saunoaga galuega fa’atino a le Fono mo le pasiaina o le tulafono e fa’avae ai le Faletupe fou a le malo, ona o tulaga i ni nonogatupe ua toe fa’amagalo e le Faletupe o Atina’e a le malo.

I lona talitonuga, atonu o le le fa’amaoni o tagata i le totogiina o a latou nonogatupe ua mafua ai le fa’aletonu, ae o le tulafono na pasia e fa’avae ai le faletupe fou a le malo, o lo o mausali ma malosi.

I le fa’aiuga o lana saunoaga, sa ia talosagaina ai le Sui Fofoga Fetalai ia Fetu Fetui Jr sa taitaia galuega a le maota o sui, ina ia tusi sana tusi e ave i le Ofisa o le Faipule i le Konekeresi, lea o lo o galue ai le afioga ia Pulu, e poloaina ai le afioga i le Matua ina ia fa’atoese mai i le maota e tusa ai o ana saunoaga ua mae’a ona fa’alele i le ea.

Na tali fuaitau le afioga i le sui fofoga fetalai ma ia saunoa ai e fa’apea, e leai sona manatu e tali fuaitau i le saunoaga a le afioga i le matua ia Pulu, ae ia fa’amagalo i ai.

Na fa’afetaia e le afioga i le tamaitai faipule ia Vui Florence Saulo le finagalo o Fetu, ina ia aua nei tali atu i le saunoaga a lea tamali’i o le atunu’u. Saunoa Vui e fa’apea, e atili ai le sasao o le afi e pei o se tasi o muagagana fa’aperetania, pe afai ae toe tali atu i le isi afi, ae sili pe a taoto ai pea, aua fo’i le manaiaina fua le pola e motu i tua, ina ne’i fa’alumana’i ai le Fono.