Mana’omia se suiga i le tulafono mo tagata fa’atoa solitulafono

Na fa’aaoga e le Loia Fautua mo tagata lautele le avanoa na ia maua i le vaiaso nei, e molimau ai i se iloiloga sa faia i luma o le Komiti o Mataupu Tau Tulafono a le maota o sui, e fa’aleo ai sana fautuaga i ni suiga ua tatau ona faia i le Tulafono, ina ia mafai ai ona fesoasonai i tupulaga e na o le fa’atasi lava ona a’afia i latou i solitulafono.

O lenei iloiloga na valaauina lea e le afioga i le ali’i faipule ia Toeaina Faufanu Autele o le ta’ita’i komiti, e fesiligia ai le susuga ia Douglas Fiaui i ni isi o mataupu e tatau ona silafia e afioga i Faipule, i auala o lo o fa’atautaia ai le auaunaga a le Ofisa o le Loia Fautua mo tagata lautele o le atunu’u.

O ni isi o mataupu sa mafai ona fa’asoa e le ali’i loia fautua ia Fiaui i luma o le komiti a Faipule, o le vaega o le tulafono lea e fa’amalosia ai ona tuli e se tagata ua nofosala se fa’asalaga fa’a falepuipui o lo o fa’atulaga mai e le fa’amasinoga, o fa’asalaga mo i latou e umia fualaau fa’asaina, atoa ai ma se suiga i le tulafono mo i latou e na o le fa’atasi lava ona a’afia i solitulafono.

O se tasi o fa’afitauli na fa’ailoa e Fiaui i afioga i Faipule o lo o ia maitauina i galuega fa’a fa’amasinoga, o le tulafono lea o lo o fa’asala ai fanau talavou i lo latou tagofia o le ‘ava malosi ae le i atoa le 21 tausaga le matutua.

Saunoa Fiaui e fa’apea, toeititi lava o aso uma e vaaia ai fanau talavou e e amata atu i le ta’i 18, 19 ma le 20 tausaga i totonu o le fale fa’amasino, ona ua molia i latou e le malo i le moliaga o le tagofia o le ‘ava malosi ae le i atoa tausaga fa’atulafonoina e agava’a ai ona tagofia le ‘ava malosi.

Sa ia taua atili e fa’apea, soo se taimi e molia ai i latou nei i le tulafono, e le mafai ona ‘alo ai fa’asalaga a le fa’amasinoga, ona e tali ioe i latou i moliaga ma fa’ailoa ai i fa’amaumauga a le fa’amasinoga lo latou nofosaga, ma faigata ai loa i le latou ofisa ona toe faia se isi gaioiga e fesoasoani ai ia i latou nei.

“Ae o le itu e sili ai ona faigata, o le taimi lava e ta’usala ai le tagata talavou lenei i le solitulafono, e le mafai ona toe alu ese lea fa’amaumauga mai lona igoa, ae o le a tauaveina pea fa’amaumauga nei i soo se mea e alu i ai, pe talosaga mo se galuega, se aoga, pe fia ulufale fo’i i vaega ‘au a le malo tele, e tumau pea fa’amaumauga nei i lana faila e le mafai ona toe aveesea”, o le saunoaga lea a Fiaui i luma o le komiti.

O se tasi o itu na taua e le ali’i loia o lo o fai ma fa’afitauli tele i tulaga ia, ona o manatu ma lagona o isi tagata fa’asaga i tagata Samoa, fai mai, o tagata Samoa e fa’atupu misa ma fa’alavelave, e mafua mai i fa’amaumauga o lo o tauave e tupulaga talavou nei i soo se mea e aga’i i ai.

“Pau le tulaga o le a vaavaai i ai i latou nei o lo o taunu’u atu i ai tusi talosaga a fanau nei mo ni avanoa i aoga ma vaega ‘au a le malo tele, o fanau talavou nei o ni tagata fa’atupu vevesi ma fa’alavelave, fa’avae mai lea i fa’amaumauga ua latou vaavaai i ai, ae le o le mea moni lena o lo o tula’i mai i o latou olaga i aso fai soo”, o le isi lea saunoaga a le ali’i loia fautua.

“O le itu o lo o pito sili ona atugalu ai lo’u mafaufau o le loia fautua mo fanau talavou nei, mo i latou o lo o galulue i vaega ‘au a le malo tele, po o aoga fo’i i fafo o lo o taunu’u atu i ai fa’amaumauga nei, o le auala o le a latou vaavaai mai ia ia te i tatou ma ituaiga tupulaga talavou o lo o tatou auina atu i le lalolagi mo aoaoga pe tautua fo’i i vaega ‘au a le malo tele, ma i lo’u taofi, o se tasi lea o fa’afitauli tele o lo o tula’i mai i le auala o lo o fa’agaioi ai le tulafono i Amerika Samoa”, o le saunoaga lea a Fiaui.

O se tasi o itu na fa’amamafa e le ali’i loia fautua i lana molimau, o tupulaga talavou o lo o vaaia le a’afia fa’afia i soligatulafono eseese, e mafua mai i le taimi na fa’atoa latou tofo ai i le ulua’i solitulafono atoa ai ma le fa’asalaga fa’a falepuipui, ma avea ai loa lea tulaga o se fa’ata’ita’iga suamalie i o latou olaga talavou.

“Mai tausaga talu ona avea a’u ma loia fautua mo le atunu’u, ua ou vaai i tupulaga talavou e molia ma ta’usala i solitulafono eseese e aofia ai soligatulafono mamafa ma soligatulafono mama, ma vaaia ai le fiafia pea o i latou e toe solitulafono ma toe fo’i atu i le falepuipui”, o le molimau lea a le susuga ia Fiaui.

 O le to’atele o i latou nei e pei ona saunoa Fiaui, e amata solitulafono mai lava i taimi ao avea ma tupulaga talavou, sosoo ai ma le taimi e aga’i atu ai i aoga maualuluga, e fa’aauau pea ona latou faia solitulafono eseese, ona aga’i atu fo’i lea i lona ofisa ma latou talanoa ma fetufaa’i ai i soo se taimi lava e a’afia ai i latou i le tulafono.

“O polokalame e fesoasoani ai i olaga talavou o i latou nei, o se tasi lea o itu e matua taua lava i lo’u mafaufau, peita’i o le tulaga o lo o o’u vaai i ai, o le fa’amasinoga lea o lo o maua mai ai e tupulaga talavou nei a’oa’oga mo latou olaga, ae le o totonu o aoga e pei ona sa tatau ona fa’atinoina ai lenei auaunaga aoga o i latou”, o le molimau lea a le ali’i loia fautua.

Na fa’amanino atili e le ali’i loia fautua i le komiti e fa’apea, o le to’atele o tupulaga talavou o lo o a’afia o solitulafono eseese nei, o lo o a’afia i latou i le fa’afitauli o le tagofia lea o fualaau fa’asaina atoa ai ma le ‘ava malosi, ma ua faigofie ai ona o atu ma toe o mai i latou i luma o le fa’amasinoga, e aunoa ma ni polokalame e fesoasoani ai i a’afiaga o lo o a’afia ai i latou.

“O la’u galuega na tofia ai a’u, e le gata ou te tu’uina atu aoaoga ma fautuaga i tupulaga talavou nei, ae o se tasi o itu e sili ai ona ootia lo’u loto, ona o ni isi o nei fanau talavou, o ni isi e o mai i aiga e mautu ma lelei le lagolago, o ni isi fo’i ou te masani ai ma mafuta lelei ai, ae o lea fo’i ou te taumafai malosi e puipui o latou aia tatau fa’aletulafono”, o le isi lea saunoaga a Fiaui.

Sa ia fa’ailoa fo’i i luma o le Komiti lona taumafai malosi ina ia sailiili tulaga uma o lo o molia ai i latou, ina ia mautinoa latou te malamalama i auala o lo o fa’atautaia ai le galuega fa’a fa’amasinoga, ma ia latou malamalama i aoaoga ma avanoa e ao ona latou maua, e fesoasoani ai i le sailiina o ni lumana’i lelei mo latou olaga talavou.