TOEAINA: Fai mea manuia ai atunuu ae aua faia mea mana’o i ai Kovana

Na fa’auilavea le afioga i le ali’i faipule mai le itumalo o Manu’a #2 ia Toeaina Faufano Autele, i le saunoaga a le afioga i le ali’i faipule ia Fatulegae’e Palepoi Mauga ma ia fa’ailoa i ai e fa’apea, e le tatau i Faipule ona latou pasiaina se tulafono ina ia fa’amalie ai se mataupu o lo o finagalo i ai le afioga i le ali’i kovana ma le faigamalo, ae tatau ona pasia le tulafono ina ua talitonu atoatoa faipule, o le tulafono lea e manuia ai le atunu’u.

“Ou te matua lagolagoina le tulafono tau fa’aofi lenei sa talosagaina e le faigamalo, o se tulaga e tatau ona fa’atinoina mo le manuia o le atunu’u atoa, pau le tulaga e tatau ona fa’amanino i le saunoaga a le ta’ita’i komiti, soo se pili lava e ulufale mai i le fono faitulafono e taua, e le gata fo’i i lea, aua tatou te pasia se pili ina ia fa’amalie ai le finagalo o le kovana ma le faigamalo, a ia tatou pasia ona o lo tatou talitonuga, e taua le pili ma aoga mo le atunu’u atoa”, o le saunoaga lea a Toeaina.

O le taeao ananafi i le taimi o felafolafoaiga a le maota o sui, i le pili taufa’aofi lea sa talosagaina e le faigamalo a Lolo ma Lemanu, e tu’u atu ai le malosi i sui o le Ofisa o Tiute latou te sailia ai oloa mai fafo e ulufale mai i le atunu’u e fa’aaoga i ai le ‘scanner’, na maitauina ai le eseese o finagalo o afioga i faipule e fa’atatau i lenei mataupu.

I totonu o le tulafono, o lo o fa’aee ai e le malo totogi fou mo le sailiina o uta mai fafo e fa’aulufale mai i le atunu’u.

E $350 e totogi mo le su’eina o container e 40 futu; $250 e totogi mo le su’eina o container e le atoa le 40 futu, e aofia ai ma container e ta’i 20 futu le uumi; $100 mo pailate; $75 mo ta’avale ma mea faigaluega mamafa; $10 i le afifi e aumai mo pisinisi; ma isi lava totogi e fa’a ee le Ofisa o le Tiute.

O le komiti o le Sailiga o le Tamaoaiga o lo o ta’ita’i ai le afioga i le ali’i faipule ia Fatulegae’e Palepoi Mauga na iloiloina lenei mataupu.

Na taua e le afioga i le ali’i faipule ia Vailoata Eteuati Amituana’i le tatau lea ona fesiligia e le komiti sui o pisinisi tua o lo o latou la’uina maia container oloa mai fafo, poo le a so latou manatu e fa’atatau i totogi fou ia ua fuafua le malo e fa’aee, ona e i ai lona talitonuga, o le a tele se a’afiaga o pisinisi tua nei, aemaise lava i kamupani i’a tetele o lo o fa’alagolago i ai le tamaoaiga o le atunu’u.

Ina ua tau vevela fa’a finauga a afioga i faipule e uiga i lenei mataupu, na saunoa ai loa Fatulegae’e ma fa’aoloolomaau i le maota, ina ia alofagia le talosaga a le ali’i kovana ma le faigamalo e uiga i lenei tulafono.

“Ou te talosaga atu ma le agaga maualalo, ia tatou pasia le pili ua finagalo i ai le ali’i kovana”, o le saunoaga lea a Fatulegae’e, ae na tali le afioga a Toeaina, e le tatau ona pasia le pili ona o le kovana, a ia pasia ina ua talitonu le maota o sui, o lenei pili e manuia ai le atunu’u atoa.

I le fa’aiuga o felafolafoaiga a afioga i faipule, na latou pasia ai loa i le taeao ananafi le tulafono taufa’aofi lenei fa’atasi ma suiga, ma ua i ai le fa’amoemoe o le taeao nei e tu’uina atu ai loa lenei tulafono mo lona faitauina fa’atolu, ma faia ai loa se fa’aiuga pe pasia pe teenaina fo’i e le maota.

O suiga e pei ona pasia i le faitauga fa’alua o le tulafono ananafi e aofia ai le suia o le totogi e saili ai container e 40 futu mai le $350 i le $300; sui le totogi e saili ai container e i lalo mai o le 40 futu e aofia ai ma container e 20 futu mai le $250 i le $200; sui le totogi e saili ai pailate mai le $100 i le $50; sui le totogi e saili ai ta’avale mai le $75 i le $50, ae mo mea faigaluega mamafa o le a tumau i le $75, ae tumau pea i le $10 le totogi e saili ai afifi mo pisinisi.