Pou Tiiute a Leoleo

Pago Pago - AMERIKA SAMOA

MOLIA SE ALII I LE FASIOTI TAGATA FUAFUAINA MA LE FAIA O UIGA MATAGA I SE FAFINE

O le aso 10 o Tesema, 2025, na valaau atu ai se tina loto mafatia i le Ofisa a Leoleo i Fagatogo mo se fesoasoani, ona o se alii na ulufale atu i totonu o le latou fale e aunoa ma se faatagana ma taumafai e fa’amalosi o ia.

O le susuga ia John Maika sa molia i lenei faalavelave.

Na fa’ailoa atu e le tina na a’afia, i leoleo, o ia ma lona to’alua ma le la fanau e to’atolu, e nonofo i Pago Pago, i se fale nofo totogi, ae o le na molia, e nofo i le fale i tua, ma le pule o le fale nofo totogi.

O le fale nofo totogi, e lua iunite o iai ma o le tina na a’afia ma lona aiga, e nofo i leisi iunite, ae o leisi iunite, e nofo ai se tamaloa.

I le faamatalaga a le tina na a’afia, o le 5:35 i le vaveao o Tesema 10, 2025, sa ia fa’alogoina le tago atu o se tagata ia te ia, a’o moe. Na ia lagona le musumusu atu o le na molia, e aua le pisa. Sa manatu o ia o lona to’alua lea o lo’o tago atu ia te ia, ae na tatala ifo ona mata, sa ia iloa ai, e le’o lona to’alua.  I lona ita tele, sa tago ai le tina na a’afia, i le u’una’i ‘ese ia le na molia mai luga o ia.

O iina na tamo’e ai le na molia, agai i le faitoto’a i tua o le fale, ae ona sa loka le faitoto’a, na toe ta’amilo mai ai le na molia, i le faitoto’a pito i luma.  Ae o le taimi lea na mulimuli atu ai le tina na a’afia.

Sa liliu mai le na molia ma toe geno mai i le tina na a’afia, e aua le pisa.  O iina na toe tamo’e ai le tina na a’afia i totonu o lona fale ma tapuni le faitoto’a ma valaau atu i lona to’alua, o lo’o ulaula i fafo.

Na tamo’e atu lona toalua ma maua atu le na molia, o taumafai e ulufafo ma le fale.  Sa mautu le talitonuga a le tina na a’afia i le tagata na osofa’ia o ia, ona sa ia va’ai i foliga o le na molia, a’o taumafai e sola ‘ese.

O le aoauli o lea aso, na ave faapagotaina ai e leoleo ia le susuga ia Maika ma ina ua su’esu’eina o ia i le Ofisa a Leoleo, sa ia ta’ua ai le faia o se la inuga i lena po ma le tamaloa lea e nofo i leisi iunite o le fale, ae ina ua alu atu le na molia e aumai se fafaga ma’a o lana telefoni, na ia va’aia le matala o le faitoto’a o leisi iunite ma ia iloa atu le taoto mai o le tina na a’afia.

Ae peitai, na te’ena e le na molia ia lona fa’amalosia o le tina na a’afia.

O ona moliaga na aofia ai le Fasioti Tagata Fuafuaina – O se vaega ‘C’ i solitulafono mamafa, e mafai ona nofosala ai i le falepuipui e o’o atu i le fitu tausaga, o se sala tupe, e le silia ma le $5,000; po o faasalaga uma e lua.

E le gata i lea, na molia foi o ia i le faamalosia o le tina na a’afia, i se auala e le masani ai, o se vaega ‘D’ i solitulafono mamafa, e mafai ona nofosala ai i le falepuipui e o’o atu i le lima masina, po o se sala tupe e le silia ma le $5,000; po o faasalaga uma e lua.

O le moliaga o le Fa’ao’olima i lona tulaga e tolu – o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e sefululima, po o se sala tupe e le silia ma le $300; po o faasalaga uma e lua.

O le moliaga o le Faomea i lona tulaga e lua – o se vaega ‘C’ i solitulafono mamafa, e mafai ona nofosala atu ai i le falepuipui, e o’o atu i le fitu tausaga, po o se sala tupe e le silia ma le $5,000; po o faasalaga uma e lua.

Ma le moliaga o le Faatupu Vevesi i nofoaga tuma’oti – o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e le silia ma le $300; po o faasalaga uma e lua.

E $75,000 se vaegatupe na fa’atulaga e mafai ona tatalaina ai le na molia, mai i le falepuipui, a’o faagasolo lona faamasinoga.

MOLIA SE ALII I LE F’AO’OLIMA ONA O SE TAUGA’UPU MA SONA TAUSOGA

Ia Novema 28, 2025, na valaau atu ai se alii i le Ofisa a Leoleo i Fagatogo, e ripotia le sauaina o ia e lona tausoga, o Andrew Peters, i luma o se faleoloa, ona o se la tauga’upu e faatatau i ta’aloga ‘football’.

E taunu’u atu leoleo, ae o le taimi lea ua savali ai Peters agai i lona fale ma taofia ai loa o ia, ma su’esu’eina o ia e tusa ai ma tu’ua’iga na faia faasaga ia te ia.

Ae na tali le na molia, e leai se mea na tupu i le va o ia ma lona tausoga.

O se taimi mulimuli ane, na taunu’u atu ai le na a’afia i le nofoaga sa fa’atalanoaina ai e leoleo ia le na molia, ma ave fa’atasi ai loa i la’ua i le ofisa a leoleo.

Sa faamatalaina e le na a’afia, ina ua su’esu’eina i le ofisa a leoleo, ia le alu atu o le na molia, a’o latou tafafao ma ana uo, ma amata se la tauga’upu e faatatau i ta’aloga ‘football’ ma i’u ina tu’i faalua o ia e le na molia, faapea ma lona kiki ina o lona manava, taumafai e titina lona ua ma faia ni faamatalaga taufa’amata’u.

Ina ua mae’a le la misa, sa alu ‘ese atu le na a’afia i lona aiga, ae na mulimuli atu ai le na molia ma lafo atu iai ni faamatalaga taufa’amata’u, e uiga i le fasiotia o ia (le na a’afia) ma lona aiga.

Ae i le faamatalaga a Petersa, sa ia ta’ua ai lona alu e piki mai ona lavalava mai i le fale ta lavalava, ae fesili atu ai lona tausoga (le na a’afia) e faatatau i alii ta’a’alo o le NFL.  Ma na lau e le na a’afia ia lona (le na molia) valea ma lona le iloa igoa o tama ta’a’alo.  O iina na ita ai le na molia ma ia toe fa’amanatu atu i le na a’afia, ia se faalavelave na tupu i le 2010, lea na ta ai e le na a’afia ia le ulu o le na molia, i se fagu pia.  Ma fa’aauau ai lava ona o la tau ‘upu se’ia o’o ina ona ia (le na molia) tu’iina le gutu o lona tausoga (le na a’afia), ae sa fai mai le na a’afia, e le malosi lana tu’i.

Sa molia ia Peters i moliaga o le Faatupu Vevesi i nofoaga faitele ma le Fa’ao’olima i lona tulaga e tolu.

O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e le silia ma le $500; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tasi tausaga, po o se sala tupe e o’o atu i le $1,000; po o faasalaga uma e lua.

Na lokaina le na molia, e aunoa ma se vaegatupe faatulagaina e mafai ona tatalaina ai o ia mai i le falepuipui, a’o fa’agasolo lona faamasinoga.