Molia uma se ulugalii i le la misa na fai i luma o le la fanau

Pago Pago - AMERIKA SAMOA

E tusa ai ma fa’amaumauga a le faamasinoga, o lo’o ta’ua ai le o’o atu o se vala’au i le Ofisa a Leoleo i Tafuna, i le 7:20 i le po, mai i se tina na ripotia atu le sauaina o ia e lona to’alua.

Ma na ta’ua i fa’amaumauga le avefaapagotaina e leoleo ia le tamaloa ma molia i ni solitulafono, ae o se taimi mulimuli ane, sa molia foi le fafine, i moliaga e tasi.  Ae e le’i fa’ailoa mai i fa’amaumauga a le malo, pe na avefaapagotaina pe na loka i le falepuipui, ia le tina.

Na tutusa moliaga a le tamaloa ma le fafine, o le Faatupu Vevesi i totonu o le aiga faapea ma le Fa’ao’olima i lona tulaga e tolu.  E leai se tupe fa’atulagaina na ta’ua i fa’amaumauga a le malo, e tatala mai ai le tamaloa mai i le falepuipui – e ui ina o ia sa lokaina.  Ae e $500 na ta’ua i fa’amaumauga, sa fa’atulagaina e tatalaina ai le fafine, mai i le falepuipui, e faatalitali ai lona faamasinoga.

[Ua le lomia e le Samoa News ia suafa o i la’ua na molia faapea le fanau, aua le puipuiga o fanau iti na aafia i lenei mataupu.]

E tusa ai ma fa’amaumauga a le faamasinoga, na aga’i atu leoleo e tali le vala’au a le tina na a’afia ma molia i lenei fa’alavelave, ma a’o i luga o le auala ia le taavale a leoleo, sa o latou toe vala’au i le tina na valaau atu i le ofisa a leoleo, e fa’atonutonu le auala e agai atu i le fale.  Ma a’o talatalanoa leoleo ma le tina, sa o latou lagonaina ia le leo o le tamaloa (le na molia) o ‘e’e aga’i i le fafine.

Sa lagona e leoleo ia le fesiligia e le tamaloa, ia le fafine, pe aisea ua vala’au ai leoleo ma ia (tamaloa) faatonuina le fafine, e tu’u i lalo le telefoni.

Ina ua taunu’u leoleo, sa lagonaina le fa’aauau pea o le tauga’upu a le ulugalii i totonu o le la potu moe.  Ma sa lokaina mai ai e leoleo ia le tamaloa, ma tu’uina o ia i totonu o le taavale leoleo.

Sa faamatalaina e le fafine (lea foi na molia) i leoleo, ia lona mana’o e ave lona to’alua i le falepuipui, ona o lona fefe i lona toalua.

E tusa ai ma le fa’amatalaga a le tina na a’afia (lea na molia), na amata le la tauga’upu ina ua mae’a se la talanoaga ma lona tama, lea na faatonuina ai o ia ma lona to’alua (le na molia), e la te o i le falemai ona o le la ua ave atu i le falemai, le tina o le fafine (le na molia).

Ae peitai, sa ita le tamaloa (le na molia) ma lau le aivalea o le tua’a a le fafine.  Ma sa ta’ua e le tina (le na moia) ia le tiga o lona loto i le tala a lona to’alua (le na molia) ma ia tago i se fagu ‘mayonnaise’ ma togi ai lona to’alua (le na molia), ae misi.  Ona fa’aauau ai lea o le la tauga’upu.

Sa ta’ua e le tina (le na molia) ia lona taumafai e alu atu i totonu o le la potu moe, ae tag olona to’alua (le na molia) i le togi o ia i se fagu vai ma futi lona ulu.  Ona ia tago lea i se uaea ma se la’au i le puipui ai o ia, ae tago lona to’alua (le na molia) i le po fa’alua le itu tauagavale o ona foliga.

Sa fa’amaonia i su’esu’ega, le iai o le fanau a le ulugalii, i le taimi na o la pisa ai.

Na faamatala foi e se alii na iai i totonu o le potu, i le taimi na tupu ai le faalavelave, ia lona lagonaina o le ta’e o se fagu, e pei o se fagu ‘mayonnaise’, po o se fagu vai (flask).  Sa ta’ua foi e le molimau ia lona lagonaina o le tauga’upu a le ulugalii, ae o lo’o iai le la fanau i totonu o le potu.

O manu’a a le tama o le aiga, sa aofia ai ia maka uaea i lona lima tauagavale, o ni uno’oa i lona lima tauagavale, o le fa’ailoga o se ‘au o le to’i i le pito I lalo o lona papatua.  Na fa’afeso’ota’i ia le vaega ale EMS mo le togafitiga o manu’a a le tamaloa.  Ae sa musu e ave o ia i le falemai LBJ mo le fa’aauau o ona togafitiga.

I le faamatalaga a le tamaloa na molia, sa ia ta’ua e faapea, na o la talanoa ma le tua’a a lona to’alua (le na molia) e tusa ai ma le la o atu i le falemai, ae sa fautua mai le toeaina, e aua le o atu, ona e le o lelei le taimi.  Ma sa ta’ua foi e le tamaloa (le na molia), o le ita o lona toalua (le tina na molia), sa tago ai lona to’alua i le togi o ia i se fagu mayonnaise, sa tau lona lima i se fagu vai (flask) ma pa’u ai i lalo.

Na ta’ua foi e le tamaloa ia le tu’iina o ia e lona to’alua ma sa ia taumafai e taofiofi lona to’alua, a’o ia (tina) taumafai e ta o ia (tamaloa) i se uaea ma le ‘au o se to’i, ae na ia (tamaloa) tago i le po lona to’alua (tina) i ona foliga.

O moliaga o le Faatupu Vevesi i totonu o le aiga – o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e ta’i $300; po o faasalaga uma e lua.

O le moliaga o le Fa’ao’olima i lona tulaga e tolu – o se vaega ‘A’ i solitulafono mama, e mafai ona nofosala ai i le falepuipui e o’o atu i le tausaga atoa, po o se sala tupe, e ta’i $1,000; po o faasalaga uma e lua.