E FAI O LENEI AE O LENA

O LE LOOMATUA E TELE ONA TALIGA

I aso la ua leva, sa iai se lo’omatua e igoa ia ma e mafua ona fa’aigoa o ia ia Taligatele, ona o le tele o ona taliga, e le na’o le lua, ae tele.  E o’o lava i luga o lona ulu, e iai nisi taliga. 

O le loomatua o Taligatele, o se fa’atauoloa ma ua a’ave ona tala i malo uma o lea vaipanoa.  O taeao uma lava, e sasala mai ai lava le manogi o kofe ma paanunu, mai i le faleoloa a lenei loomatua.  E avea ma tulaga e tosina atu ai le toatele o tagata.  Ae a o’o i totonu tagata faatau, e latou te sosogia le tele o manogi ‘ese’ese i totonu o le faleoloa, e pei o le manogi o sinamoni, o lole, o fugala’au ‘ese’ese ma moliga’o.

Ae o le tulaga e mataina e tagata fa’atau, ma e umi ai lava se taimi o i totonu o le faleoloa, o taliga a le loomatua o Taligatele.

O taliga a lenei loomatua, e le pei o taliga o tagata lautele.  Ae o ona taliga, e faapitoa lava ma e latou te lagonaina mea e na’o ia lava e na te lagonaina.  E iai lona taliga, e na te lagonaina mea sa tutupu ananafi, ae e ‘ese leisi taliga, e lagonaina mea o le a tutupu a taeao.  O leisi ona taliga, e lagonaina faamatalaga a tagata, e le o manana’o, e lagona e isi tagata.  

Mo se faataitaiga, e ui ina e le’i ta’uina atu e se fafine na alu atu e fai sana faatau, ia le valaauina o ia i se siva tele, ae e oso mai lava ia le loomatua o Taligatele ma faapea mai i le fafine fa’atau, “E te aulelei i le selu lea po o le ofu lea.”  Po le taimi na alu atu ai le alii o Siaki, ua leiloa lana penitala.  Ae na matua’i fa’ate’ia i le faapea atu iai o le loomatua o Taligatele, “Faatau sau penitala ina ne’i te’i i le leiloa lau penitala.”

O se tasi aso, na alu atu ai se tamaititi ma ulufale atu i le faleoloa a le loomatua o Taligatele.  Na va’aia e le loomatua, e le gata i le palapala o le tamaititi lea, ae o le laititi foi ma e foliga ua lelava lava o ia.  Ua tu’u mai nei iai leisi taliga a le loomatua o Taligatele, e fa’alogologo po o a mea a le  laititi lea o fai.

Sa lagonaina e le loomatua o Taligatele, ia le savali atu o le tamaititi, i le pito i tua o le faleoloa, o lo’o tu ai se fafine ma tilotilo i se ‘ie.  E ui i le manaia o le ‘ie, ae peitai, sa le’i mana’o ai le fafine.  Ae na lagona lelei mai e le loomatua o Taligatele ia le mafaufauga a le tamaititi, o faapea, “O foliga uma lava lea o le ofu a lo’u tina.  Ma o so’o se taimi lava e na te ofuina ai lona ofu lea, e fiafia lava o ia.”  Ma sa faapea ona tonu i le manatu o le fafine, o le a ia faatauina le ‘ie ina ia fa’ailoa atu ai i lona aiga, ia lona fiafia.

O le pito i luma o le faleoloa, sa tu ai fo’i se tamaloa ma tau filifili po o le feal ole o le a ia faatauina mo si ona afafine lea e faamanatu lona aso fanau.  Ae ua oso atu le tamaititi ma faapea atu i le tamaloa, “Tago e faatau se lole e ta’itasi mai i ituaiga lole ‘ese’ese.  E sili atu lena, e mafai ona fa’asoa atu e lou afafine ana lole i ana uo.”  Ma sa faapea ona faia e le tamaloa.

Ina ua o’o i le faaiuga o le aso, o le a tapuni le faleoloa, ae alu atu le tamaititi ma ‘ai’oi atu i le loomatua o Taligatele, pe mafai ona ia nofo i totonu o le faleoloa.  Ma ia folafola atu foi i le loomatua, o le a ia fesoasoani i le saluina o le fale ma le tausiga o le afi.  Ma sa o’otia le loto o le loomatua o Taligatele, ma ia ioe atu ai i le tamaititi.

Na amata mai e tasi le aso na nofo ai le alii o Poe, ae na liua le aso e tasi, i tausaga e tele.  Ma sa matua’i tele sona aoga i totonu o le faleoloa.  E ui ina na’o le lua ona taliga, ae sa matua’i aoga tele ona taliga.  Sa ia fa’alogo lelei i mea e fa’atonu ai o ia e le loomatua o Taligatele, i le auala e fai sa’o ai sui o faatauga a tagata, o le afifiina o fa’atau a tagata.  Ma le mea sili ona taua, o le fa’alogo lelei lea i mea e fai atu ai tagata faatau ma ia fesoasoani ia maua lelei faatau a tagata.

O le toatele o tagata, e latou te faapea mai, pe mafai faapefea ia Poe ona faigaluega mo le loomatua o Taligatele (ma na lagona uma e le loomatua nei faamatalaga).

Sa tausi lelei ma le mama, e le alii o Poe, ia le faleoloa ma e le taitai ona sioa i taliga o le loomatua, aemaise lava taliga ia o lo’o i le pito i luga o lona ulu.  Ae afai foi e sioa iai Poe, ona o lona mana’o ia mautinoa, e le o iai se faafitauli o tupu i taliga o le loomatua.

A o’o i aso Sa, ona tapunia lea o le faleoloa, ae alu Poe e ta’a’alo ma isi tamaiti o le nu’u, ma e masani lava ona toe fo’i mai o ia, i le taimi tonu lava o mea’ai o le afiafi.  

Ina ua matua le alii Poe sa tele sona aoga i totonu o le faleoloa, i le la’uina o pusa mamafa ma paelo lapopo’a.  Ma ua tele ina afea e teine o le nu’u ia le faleoloaA.

A o’o i isi aso Sa, ona savali lea o Poe i leisi nu’u.  Ma na lagona e le loomatua o Taligatele ia le savaliga a Poe, mai i leisi ona taliga lea e lagonaina mea o tutupu i nu’u mamao.  Ma o aso Sa uma e faia ai se lauga a se faifeau i le nu’u tuaoi ma e talia ai so’o se tasi, e fia faalogo.  Lea la na alu iai ma Poe ma fa’alogologo i le lauga a le faifeau.

I se tasi o aso, sa faalogoina ai e le loomatua o Taligatele ia se fa’ili, e pei o se fa’ili a se tipoti vai, ua pupuna i l uga o le ogaumu.  Ma sa alu atu le loomatua ma su’esu’e le mea o sau ai lea fa’ili, ae ona maua ina atu, o lo’o sau mai ia Poe.  O lo’o nofonofo lelei ma gaugau ia ni ofu mo le faleoloa, ae o lo’o fa’amapumapu ma fai lana galuega.

O se tasi aso, sa tu’itu’i atu ai se tagata i le faitoto’a o le fale a le loomatua o Taligatele ma na silafia lelei e le loomatua le tagata o lo’o tu i le faitoto’a aua na ia lagona mai le leo o le faifeau, ae na te le’i tu’itu’iina le faitoto’a.  Ae ua savali atu ia le alii o Poe ma tatala le faitoto’a ma ulufale atu le faifeau lea sa masani ona alu Poe i le faalogologo i ana lauga.

Ua liliu atu nei Poe i le loomatua o Taligatele ma ia faapea atu iai, “Ua o’o mai le taimi e tatau ona ou alu ai.”

Ae ua fesili atu le loomatua, pe faapefea ia galuega o le faleoloa.  Sa tali mai Poe, o lo’o toatele tamaiti o le nu’u e mafai ona aumai e le loomatua, e fesoasoani i totonu o le lona faleoloa.

Ua toe fesili le loomatua ia Poe, pe a faapefea ona tausi lona soifua, aua na lagona e le loomatua, ia le le fa’amanuiaina o le lumana’i o le alii o Poe.  Ae peitai, sa tali atu iai Poe i le loomatua, o le a laki i se aso.

Ae ina ua toe fa’alogologo le loomatua, i taimi ua tuanai, sa ia toe manatua ai le la talanoaga ma le faifeau ma i lena taimi sa ia fa’ailoa atu i le faifeau, o le a le faaipoipo Poe i le lumanai, ma maua sona aiga e fiafia ai.  Ae o le a ola fa’afaifeau.

Sa na’o le ata o le faifeau ma faapea atu i le loomatua, o le a sili atu le vala’auga a le alii o Poe.

[IA MANUIA FUAFUAGA UMA O LENEI VAIASO FOU]