TALA MAI SAMOA

Apia - SAMOA

TO’A FA UA MALILIU I LE GASEGASE O IVI TIGA (DENGUE FEVER)

Ua feagai nei se aiga i Mulifanua ma mafatiaga, ona o le maliu o se tasi o alo e 9 tausaga le matua, ona o le fa’ama’i o ivi tiga (dengue fever).  Ma ua lona fa ai lea o gasegase ua maliliu i Samoa ona o le Dengue.

Ua avea le maliu o le tamaititi 9 tausaga ma tulaga ua si’itia ai atugaluga i le pepesi o lenei faama’i, a’o taumafai le sui Faatonu o le itu a le fanau, i le maota gasegase autu i Moto’otua, le susuga ia Ulugia Dr. Tito Kamu, e u’una’ia matua, ina ia avatu vave a latou fanau i le falemai.

Sa ia ta’ua e faapea, i le tulaga i le tamaititi 9 tausaga ua maliu, na fa’alagolago le aiga i fofo ma vai Samoa i le lima aso na ma’i ai o ia, ona fa’ato’a ave atu lea o ia i le falema’i.

O se teineititi lima tausaga mai Saoluafata, na maliu i le vaiaso ua tuanai, ma o le gasegase pito i talavou lea, ua maliu i lenei fa’ama’i.

Sa fa’aleoina e le mamalu lautele i luga o upega tafailagi, ia lo latou manana’o i le malo, ina ia fofoina lenei faafitauli, ae e le’i toe tupu mai le tulaga lea na tupu i le 2019, lea na maliliu ai fanau e to’a 100.

Ua iai foi se vala’au ina ia toe fa’aopoopo le tapunia o aoga.

E le gata i lea, ua valaauina foi e Ulugia ia matua, ina ia aumai fanau i le falemai, i le taimi tonu lava e maualuga ai le fiva, pua’i, so’oga ivi tiga ae auala le toe fa’atalitali.

TE’ENA TALOSAGA A LOAU 

Ua te’ena e le Loia Sinia o Faamasinoga Faaleitumalo, ia Talasa Atoa Saaga ia se talosaga a le na avea ma Minisita o Aoga, le susuga ia Loau Solamalemalo Keneti Sio, ina ia fa’aleaogaina moliaga faasaga ia te ia.

O lea talosaga sa faia faasaga i se mataupu, na molia ai Loau, ona o se tagi sa faaulu e le aiga potopoto a Loau, Seugamalo Uele Hurrell mai Faleula ma Ausetalia, ona o se faafitauli na tupu i Faleula ia Iuni 2024, lea na fa’ai’u ai se misa, le fono a le aiga.

E tusa ai ma le talosaga a Loau, e leai se mataupu e ono tali atu iai o ia, aua ua fa’amaonia i le faamasinoga, ia moliaga sa faia e faasaga ia i latou na molia, i le mataupu lava lea e tasi.

Ae peitai, sa ‘ese le manatu a le faamasinoga, ma ua fa’atulagaina ai se iloiloga e faataunu’uina ia Me 2026.

Na ioeina e Loau ia le tele o moliaga o le fa’ao’olima, ma sa molia ‘ese’ese o ia ma lona faletua ma ona alo, ae ua mae’a ona fa’aulu sa latou talosaga, ina ia faia faatasi a latou faamasinoga, i le tausaga fou.

O ananafi na faatalitali ai le faaiuga a le faamasinoga.

O LE FAALAVELAVE NA TUPU

Ia Iuni 2024, sa o’o atu ai le susuga ia Seugamalo Ake Uele Hurrell ma nisi o lona aiga, na aofia ai Justina Muaina Hurrell, Tikeau Uele Hurrell ma Tausilenuulelei Hurrell, i le fale a Loau, o ia o le sa’o o le latou aiga, aua le soalaupuleina o se mataupu e faatatau i a latou fanua.

Sa le’i sologa lelei tulaga o le fonotaga ma fa’ai’u ai i le misa o aiga.  Ae na fa’ateteleina le faafitauli, ina ua mu le fale teu oloa a Hurrell ma ua fa’amaonia nisi o le aiga a Loau, i lo latou susunuina o le fale teu oloa.

Sa fa’auluina e Loau se tagi e faasaga i le aiga o Hurrells, ma o moliaga, na aofia ai le faao’olima, tagofia o a’upega malolosi, faaleagaina o meatotino ma fanua faapea ma le fa’ao’o manu’a i tino o tagata.

O le tagi a Loau e faasaga i le aiga o Hurrell, sa faapea ona iloiloina ia Tesema 2024 ma le faaiuga sa lauina ia Aperila 28, 2025.  Se’ia vagana ai Tausilenuulelei Hurrell, ua faapea ona ta’usalaina uma isi o le aiga.

O le aso Lulu na tatau ona lauina ai le faasalaga o lea mataupu, ae peitai, sa toe tolopoina.

Sa faavae le talosaga a Loau i le faaiuga o lea iloiloga, e tali faasaga i fa’asea a Hurrell, ua faia faasaga ia te ia (Loau).

O le susuga i le Faamasino ia Leota Raymond Schuster, sa pule faamalumalu, i le iloiloga ia Tesema 2024.

I le te’ena ai o le talosaga a Loau, ua sauni atu nei le mataupu mo Me 2026.  O moliaga faasaga ia Loau, e aofia ai le faaoolima, lafoina o ni faaupuga taufa’amata’u, lea ua mae’a ona te’ena e Loau.