E FAI O LENEI AE O LENA

O ISUMU MA ELEFANE

I aso a la ua leva, na iai se nu’u tu’ufua   Sa leai nisi na toe nonofo i fale, leai nisi na toe feoa’i i alatele ma faleoloa.  O fa’amalama ua leva ona ta’ei, o sitepu ua leva ona malepe.  Ma sa avea ma nofoaga manaia e fetamoea’i ai ia isumu.  Ma sa faapena ona fai ma nofoaga na nonofo filemu ma le fiafia ai ia isumu.

Ae peitai, o se tasi aso  na ui atu ai i le a’ai tu’ufua lea, ia se tamo’ega a ni elefane, e agai atu i se vaita’ele i leisi itu o le nu’u.

Sa leai lava se mea i mafaufau o elefane, na’o le fia o’o atu lava i le vaita’ele, ona o le vevela o le aso.  Sa latou le iloa, o la e ui atu i latou i le nofoaga o lo’o nonofo ai ia le faitau afe o isumu.  Ma sa matua’i malepe uma fale ma nofoaga sa fausia e nai isumu e nonofo ai.

Na fai faatopetope se fonotaga a isumu.

“Afai ae toe ui mai iinei ia elefane pe a fo’i mai mai le vaita’ele, o lona uiga, o le a matua’i fa’aleagaina uma ia mea o totoe,” o le fetagisi lea a nai isumu.

Ua i’u le fono a isumu, ma filifilia ai se tasi o i latou, e alu e talanoa i le tupu o elefane.  Ma sa ma sa maua atu e le isumu toa lea na filifili, e alu e talanoa i le tupu o elefane, ia elefane, o lo’o fai mai a latou ta’elega ma pisapisa o, i le vai ta’ele.

Ua ifo ta’ele le isumu i le tupu o elefane ma faapea atu iai, “Lau afioga i le tupu o elefane.  O a’u ou te sau mai i se nu’u e le mamao tele atu mai i lenei ta’elega.  Atonu o e manatua se nu’u tu’ufua na tou ui mai ai?”

“Ioe, o lea ou te manatua,” o le tali mai lea a le tupu o elefane.  “O matou o elefane ma e le galo se mea e tasi i elefane.  Ae e faamalie atu, e matou te le’i iloa o lo’o outou faamautu i lena nu’u tu’ufua.”

“Ioe, o iina o lo’o matou nonofo ae,” o le tali melotagi a le isumu.  “Ae paga lea, ua tele se vaega o le matou nu’u, ua fa’aleagaina i le taimi na outou sopoia mai ai.  Ma afai ae tou te toe taliu atu i le ala lava lea e tasi, matou te iloa, o le a le toe iai se vaega o le nu’u o le a totoe.”

“O le mea lea ua ou sau ai, ma le agaga loto maualalo, lau afioga i le tupu o elefane, pe a fa sou finagalo, ae tou toe ui atu i seisi auala.  Ma a outou malilie iai i lea tulaga, atonu o le a iai se vaitaimi i le lumanai, e mafai ona o matou fesoasoani atu ai ia te outou.”

Ua ata le tupu o elefane, ona o lo’o ia manatu i le laiti o isumu, ma atonu e leai se mea e mafai ona o latou fesoasoani mai ai ia i latou.

“Ia aua le popole, o le a matou faia e pei ona e talosagaina.  O le a matou taumafai e saili seisi auala, e matou te toe fo’i atu ai, e aunoa ma le fa’aleagaina o mea o totoe i totonu o le tou nu’u,” o le tali mai lea a le tupu o elefane.

Ua toe fo’i le isumu ma lona loto fiafia, ona ua tal leleia e le tupu o elefane lana talosaga.

E fo’i ese atu le isumu, ae osofa’ia loa e ni tagata fana manu ia elefane ma tapu’e uma, ma saisai i ni manoa malolosi, ma tu’u i totonu o ni pa.  Sa ta loka uma elefane, seia vagana ai se tamai elefane e tasi, sa lafi i totonu o le togavao.

Ina ua iloa atu o ia e le tupu o elefane, sa ia fa’atonuina o ia, e faatopetope i le nu’u tu’ufua ma ta’u i le isumu ia le mea ua tupu.

Sa faapea ona faia e le elefane laititi lea ma ina ua iloa e le isumu ia le mea ua tupu i elefane, sa o latou tamomo’e uma mai i le ta’elega, ma amata ona fa’aaoga o latou nifo e gali ese ai ia manoa sa saisai ai elefane.

Ina ua mae’a lea ma ua toe fa’asa’oloto uma ia elefane, sa faapea ona fa’atopetope ese atu ia elefane, ae na ese le auala na o latou ui atu ai.  Ae ua toe fo’i ma le fiafia ia isumu i o latou fale.

[IA MANUIA FUAFUAGA O TOTOE O LENEI VAIASO]