Na amata i se ata vitio ae fa’ai’u i le sauaina e se faiaoga

Pago Pago - AMERIKA SAMOA

O le aso 26 o Me, 2025, na o’o atu ai se tina matua ma sona alo talavou, i le Ofisa a Leoleo i Tafuna, ma ripotia ai le sauaina o ia e le faiaoga o ta’aloga, a le latou a’oga ma ua fefe e toe alu i le aoga.

[Ua le lomia suafa o i latou na molia ma a’afia i lenei mataupu, aua le puipuiga o fanau talavou.]

E tusa ai ma fa’amaumauga a le faamasinoga, o le taeao o le aso 26 o Me, na o’o atu ai se alii talavou ma lona tina matua, e faila sana ripoti, i lona fefe e toe fo’i i le aoga, ona o se ata vitio, ua salalau i luga o upega tafa’ilagi, o lo’o fa’aali ai lona fa’aalia o ni uiga le fa’aaloalo i se tasi o faiaoga tamaitai.

Na fa’atalanoaina e leoleo ia le alii a’oga talavou, i luma o lona tina matua.  Ma sa ia fa’amatalaina e faapea, ua fa vaiaso talu ona tupu le faalavelave, lea na taufa’alili ai i lana faiaoga ma faia ni taga, e foliga mai o lo’o ia sauaina le faiaoga.

Ae sa pu’eina ana gaioiga e se tasi o tamaititi a’oga ma tu’u i luga o upega tafa’ilagi.

Sa ta’ua e le tamaititi a’oga le fa’ate’ia o ia, ina ua ia va’ai i le ata vitio i luga o upega tafailagi, lea na amata ai loa ona faia tala taufa’afefe, taufa’amata’u, ma le faatiga loto, a tagata e faasaga ia te ia.

E le gata i lea, I le aso 22 o Me, 2025, a’o ia agai atu i lana vasega lona fa, na a’ami atu ai o ia e le faiaoga o ta’aloga (lea na molia i lenei mataupu).  Ina ua alu atu iai le na a’afia, i le potu o le faiaoga, sa  fa’asaofa’i o ia i lalo e le faiaoga ma fa’asino iai le ata lea ua salalau i luga o upega tafa’ilagi.

Ma na fesiligia o ia e le faiaoga, pe fiafia e fai tulaga faapea i tagata matutua po o tamaitai.  Sa tali le alii a’oga, e leai.  Ma sa fa’ailoa atu iai e le faiaoga, o le a ia (faiaoga) po ina o ia (tamaititi a’oga).

Na ta’ua e le alii a’oga, na a’afia i lenei mataupu, e pe a ma le 10 i le 15 minute, na ta po ai ona foliga e le faiaoga, a’o ia fesili atu, pe fiafia e fai lea tulaga i leoleo.

Ona tu’i lea e le faiaoga, ia lona manava ma lona fatafata.

Na ta’ua foi e le alii a’oga na a’afia, ia le futi ina o lona ulu e le faiaoga, ma fetosoa’i o ia i totonu o le potu aoga.  Faapea ai ma le u’una’ia o lona tuaua, ae ave o ia i le faiaoga tamaitai, lea na fai ai ana gaioiga.

Ae sa fai ifo iai le faiaoga tamaitai, ua mae’a ona fofoina le mataupu, e le ofisa o aoga.

Na fa’atonuina loa e le faiaoga o ta’aloga, ia le alii a’oga, e tu i luga ma la o mai i fafo, ae vala’au atu seisi faiaoga i le alii faiaoga o ta’aloga, ua lava lena.

Sa alu atu lea faiaoga ma fesiligia le alii a’oga, pe fia alu i lana vasega.  Ae na tali ane iai le alii a’oga, e leai, o ia ua fia alu i le fale.

O le mea lea sa fa’atonuina ai loa e le faiaoga lea ia seisi tamaititi a’oga fa’ai’u aso, e alu e ave le na a’afia, i le ofisa.  O iina sa fa’ailoa atu ai e le alii aoga na a’afia, lona fia alu i le fale, ona ua fefe, ona o lea sa toe faatonuina o ia e le na molia, e toe alu atu i le taimi o malologa.

Ae na tali mai le faufautua, o le a la o faatasi i le potu aoga a le na molia.

Ae peitai, e ta mai le malologa, ae toe alu atu le faufautua a le aoga ma faatonu le alii aoga na a’afia, e alu na’o ia i le potu o le faiaoga o ta’aloga, ae ua mae’a ona o la talanoa.

Ina ua o’o atu le alii a’oga na a’afia, i le potu aoga a lea faiaoga, e le o iai o ia, ae ua na’o ni tamaiti a’oga vasega 11 na iai.  Sa o latou faatonuina le alii aoga na a’afia, e alu atu i totonu ma nofo i lalo.

Ona fa’atonuina lea o ia e nei alii aoga, e fa’aputa lona gutu ma tu’u iai lona lima, ona o latou fetagofi lea i le po fa’afa ia le gutu o le alii a’oga na a’afia, ae pu’e lona ata.

Sa ta’ua e le alii a’oga na a’afia, ia lona maasiasi ma lona fia vala’au atu i seisi mo se fesoasoani.

O le taimi lea na toe fo’i atu ai le alii faiaoga o taaloga ma tusi se fuaiupu i luga o se fasi pepa, e faapea, “O le a ou fa’aaloalo i tina/tamaitai ma tagata matutua.”

Ona fa’atonu lea e lea alii faiaoga ia le alii a’oga na a’afia, e alu e tootuli i luga o ma’a i le ogatotonu o le malae a’oga ma u’u i luga lea fasipepa.

Ma sa faatonuina foi e le faiaoga na molia ia seisi tamaititi a’oga, e tago e pu’e se ata vitio o le alii a’oga na a’afia, a’o tootuli o ia.  Sa ta’ua e le alii a’oga na a’afia, lona fa’anoanoa ma lona ma tele, i le faatonuga a le faiaoga, aemaise ai le pasi atu o isi tamaiti aoga ma talie atu ia te ia, ma tapu’e ona ata a’o tootuli i luga o ma’a.

Sa ta’ua e le alii aoga na a’afia, o se tasi o mafuaaga na faia ai lana amioga i le faiaoga tamaitai, ona sa taufa’alili le tamaitai faiaoga, i lona tama, ua maliu.  Fai mai le alii a’oga na a’afia, e le fiafia tele o ia, ae ta’u e seisi lona tama.

Sa ta’ua e le tina matua o le alii a’oga na a’afia, le le tatau o lenei tulaga sa tupu i si ona alo ma e momomo lona loto ma e mana’o ia faia se fa’amasinoga tonu, e tusa ai ma le mea sa tupu ia te ia (le na a’afia).

Sa ta’ua e le tina matua le le lelei o uiga na fa’aalia e lona alo, ae ua mae’a ona toe a’oa’i o ia, i lo latou aiga.

Ae peitai, i ni nai aso talu ona tupu lea fa’alavelave, sa ia va’aia le le toe fia aoga o si ona alo ma sa ia fesiligia lona alo i le mafua’aga ua le toe fia alu ai i le aoga.  O iina na fa’ato’a faamatalaina ai e lona alo, ia le mea atoa sa tupu ia te ia.

O le taeao o le aso 27 o Me, na agai atu ai leoleo i le a’oga e faia sa latou su’esu’ega ma sa o latou fa’atali ma le pulea’oga, i totonu o le ofisa a le pulea’oga, mo le alii faiaoga lea ua molia.

Na fa’amatalaina e le alii faiaoga na molia, i leoleo, le le talafeagai o lana gaioiga sa faia ma sa faapea ona ia fa’amaonia, lona ta po ina o foliga o le alii a’oga na a’afia.  Sa ta’ua e le alii faiaoga na a’afia, le mana’omia ona a’oai o le alii a’oga na a’afia.

Sa ta’ua e le alii faiaoga na molia, lona faia o lea tulaga, ona o amioga sa fa’aalia e le alii aoga na a’afia, i le faiaoga tamaitai ma i sona talitonuga (faiaoga na molia), ua le talafeagai lea tulaga.

Sa fa’amaonia e le alii faiaoga na molia, ia lona futiina o le ulu a le alii a’oga na a’afia, ma toso mai o ia mai lona potu aoga, aga’i atu i le potu a’oga a le tamaitai faiaoga na a’afia, ina ia fa’ato’ese le alii aoga na a’afia, i le tamaitai faiaoga.

Ae sa ta’ua e le alii faiaoga na molia, ia lona le iloa o le tulaga sa tupu i le va o le alii a’oga na a’afia, ma isi tamaiti aoga.  Ma na ia fa’amaonia lona fa’atonuina o le alii aoga na aafia, e tootuli i luga o ma’a ma le fasi pepa na tusia ai ni upu.

Sa finagalo ia leoleo e fa’atalanoaina le alii a’oga na a’afia, ae sa fa’ailoa iai e le pulea’oga, o le a ia vala’au i matua o lea alii, ina ia latou aga’i atu i le ofisa a leoleo.

Ae peitai, sa toe valaau atu o le pulea’oga i le ofisa a le leoleo, ma fa’ailoa atu ai, ma fa’ailoa atu iai le le manana’o o matua o le tamaititi a’oga na a’afia, e o atu i le ofisa a leoleo.  E ui ina sa faamalamalama iai e le puleaoga le mafua’aga.

E le’i ta’ua i fa’amaumauga a le faamasinoga, pe sa molia ia le tamaititi a’oga lea na faia ni tulaga i le alii a’oga na a’afia.

Ae o moliaga na faia faasaga i le faiaoga, na aofia ai:

Faitauga 1:  Fa’ao’olima i lona tulaga e tolu, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e o’o atu i le $1,000; po o faasalaga uma e lua.

Faitauga 2:  Faia o se tulaga e a’afia ai le saogalemu o fanau, o se vaega ‘A’ i solitulafono mama, e mafai ona nofosala ai i le falepuipui e o’o atu i le tausaga, po o se sala tupe e o’o atu i le $1,000; po o faasalaga uma e lua.

Faitauga 3:  Faatupu Vevesi i nofoaga faitele, o se vaega ‘B’ i solitulafono mama, e mafai ona nofosala i le falepuipui. E o’o atu i le ono masina, po o se sala tupe e o’o i le $500; po o faasalaga uma e lua.

E $2,000 se vaegatupe na fa’atulagaina, e mafai ona tatalaina ai le na molia, e faatalitali ai lona faamasinoga.