TALA I VAIFANUA

Pago Pago - AMERIKA SAMOA

LE TAUNU’U LE FA’AMANATUGA O LE FU’A A TAGATA SAMOA I SAN FRANCISCO

I se fa’aaliga fa’alauaitele sa faapea ona fa’asalalauina i luga o ‘upega tafa’ilagi, sa fa’alauiloa mai ai le le fa’ataunu’uina o le polokalama mo le Sisiga Fu’a a tagata Samoa, o lo’o afifio ma papa’a’ao i le setete o San Francisco, i Kalefonia, lea sa faamoemoe, e faataunu’uina ia Aukuso 2, 2025.

Ma o le mafua’aga sa ta’ua i le fa’aaliga, ua le taunu’u ai lenei faamoemoe, ona o le tulaga fa’aletonu, i tala o le tupe, o le pa’u o le foa’i tau tupe faapea ai ma le leai o se nofoaga na maua e faataunu’uina ai lea faamoemoe.

Sa ta’ua le taumafai o le komiti e saili ma fa’amautuina nei tulaga uma, ae peitai ona o mafua’aga e pei ona ta’ua, sa faia ai loa le fa’ai’uga mo le le fa’ataunu’uina o lenei polokalama, i lenei tausaga.

Ae ua iai se faamoemoega, o le a mafai ona toe Iloilo lenei fuafuaga, aua le tausaga fou.

O lenei fa’aaliga sa sainia, e le fa’alapotopotoga o matai.

SOLA SE PAGOTA MAI I LE TO’ESE I TAFUNA I LE ASO GAFUA

O le aso ananafi, sa fa’asalalauina ai i luga o upega a tafa’ilagi, leitio ma isi vaega fa’asalalau, ia se talosaga mai i le Ofisa a Leoleo, mo le tau sailiga o se pagota sa faapea ona sola ese mai i le to’ese i Tafuna, i le aso Gafua na se’i mavae atu nei, Iulai 21, 2025.

O le alii pagota na sola, o Casimire Wei, mai i le afioaga o Leloaloa, Sogi, Leone ma Pago Pago, e 5 futu ma le 8 inisi, lona umi ma e 180 pauna lona mamafa.

Sa sola lenei alii pagota mai i a’ao o leoleo, ina ua aveina atu o ia i le maota gasegase i Faga’alu (LBJ) mo le togafitia o ona manu’a mai i se fusuaga i le aso 18 o Iulai, lea na tupu i Leone.

E tusa ai ma le fa’aaliga a leoleo, o lenei alii, e a’afia i gasegase o le mafaufau ma o lea e lapata’ia ai le mamalu lautele, ina ia aua ne’i taumafai e taofi le alii pagota pe a va’ai iai se tasi, ae ia vave vala’au atu le ofisa a leoleo, numera o le 911, 633-1111, 699-1911 po o le ofisa a le falepuipui, i le 699-9944.

ILOILOGA FA’ALAUAITELE A LE FONO FAITULAFONO

O le 8:30 i le taeao a taeao, aso Tofi, Iulai 24, 2025, o le a fa’ataunu’uina ai se Iloiloga Fa’alaua’itele a le Fono Faitulafono, e fa’atalanoaina ai le pili taufa’aofi a le Maota Maualuga, #39-5, lea o lo’o fa’aulutalaina ‘O se tulafono e suia ai agava’a mo sui tauva mo le Ofisa a le Kovana ma le Sui Kovana”.

E pei ona ta’ua i le fa’aaliga mai i le Fono Faitulafono, o lenei iloiloga fa’alauaitele, ua faapea ona tatalaina i le mamalu lautele, o lo’o fia faaleo ni o latou manatu e tusa ai ma lenei pili taufa’aofi.

O le a fa’ataunu’uina lenei iloiloga i le potu fono a le Maota Maualuga.  Ma afai o iai se mana’o e fia molimau i lea iloiloga, e mafai ona vala’au atu i le numera telefoni 633-5866 po o le 633-4565, ina ia mafai ona maua ai se avanoa, e molimau ai.

Ua fautuaina foi la’ei mo i latou o le a ‘auai atu i lea iloiloga, aemaise i latou o le a molimau.  Mo alii, o se ‘ie faitaga ma se fusi ua.  Ae mo tamaitai ma tina, o se puletasi.

TATALA ALOAIA LE FALE TA’ALO A LE A’OGA TULAGA MUAMUA I FITIUTA MA FALEA’OGA MO LE A’OGA TU’UFA’ATASI I TA’U, MANU’A

O le ‘auai atu a le Afioga i le Kovana, ia Pulaali’i Nikolao Pula, le Faatonusili o A’oga ia Maefau Dr. Mary Laga’aia, sui o le Fono Faitulafono faapea le kapeneta a le malo, i le fa’amanatuina o le Sisiga Fu’a po o le aso sa sainia ai se maliliega i le va o le Motu Sa, le Manu’atele ma le Malo Tele o Amerika, na faapea ona tatala aloaia ai foi ma le fale ta’alo a le a’oga tulaga muamua i le motu o Fitiuta.

I lana saunoaga sa ta’ua ai e le Afioga i le kovana, le avea o lenei poloketi ma la’asaga tele, aga’i i luma mo a’oa’oga i totonu o Manu’a, ae le gata i lea, o se tulaga ua leva ona moe miti iai kovana ua mavae atu.

Ma sa ia fa’aleoina sona faamoemoega, o le a avea lenei fale ta’alo ma auala o le a mafai ona lagolagoina ai ia le soifua maloloina faalemafaufau mo fanau aoga, ae le gata i lea, o le malosi o le tino ma le soifua maloloina atoatoa, e ala i ta’aloga.

Na fa’aalia e le tamaitai faatonusili o a’oga, ia lona agaga fa’afetai, ia i latou uma sa mafai ona galulue malosi ina ia tino mai lenei galuega, na aofia ai ma le kamupani a le Manu’a Development Corp. faapea le kamupani fau fale a le Silva Inc.

O lenei poloketi, e $1.45 miliona lona tau, e pei ona sa faatupeina e le vaegatupe a le Ofisa o Aoga mai i le ARPA (Amercan Rescue Plan Act).

I le mae’a ai o le umusaga o le fale ta’alo a le a’oga i Fitiuta, sa faapea ona auai atu le Afioga i le Kovana, le Faatonu o le Ofisa o Aoga, faapea ta’ita’i uma o le malo, i le tatalaina aloaia o fale a’oga, aua le aoga tulaga muamua tu’ufa’atasi i Ta’u.

I le saunoaga a le tamaitai Faatonu o A’oga, sa ia momoli aloaia ai lana agaga faafetai, i taitai sa muamua atu ia te ia, aua le fa’ata’atiaina o le fa’avae ua ausia ai lenei faamoemoe taua.

O le tau aofa’i o lenei poloketi, e silia ma le $1.9 miliona.