POU TIUTE A LEOLEO

Pago Pago - AMERIKA SAMOA

FA’AMISA SE ALII FA’ASUA’AVA I LUMA O LE STARKIST

O le aoauli o le aso 30 o Me, 2025 na vala’au atu ai sikulaki (security guards) a le kamupani o le Starkist, i le ofisa a leoleo i Fagatogo, ona o se misa o lo’o tupu i le fale pamu kesi, i leisi itu auala o le Starkist.

Na agai atu leoleo i le nofoaga na tupu ai le faalavelave, ma molimauina se alii o lo’o taumafai e puipui ona foliga mai i le tatu’iina o ia, e seisi alii (lea na molia mulimuli ane, i le tulafono).

Sa faapea ona feosofi atu leoleo ma fesoasoani i nisi o lo’o taumafai e vaovao le misa a nei alii e to’alua, ma faapea ona ave faapagotaina ai le na molia.

Na fa’atalanoaina e leoleo ia le alii na a’afia i lenei mataupu ma sa ia fa’amatalaina e faapea, na fa’ato’a o la manava mai ma sana uo, mai galuega, ma o la nofonofo i se vaega o lo’o faataga ona ulaula ai tagata, ma fai se la inuga, ae e le’i o i le fale.

Ma sa o la va’aia se alii o savali tautevateva atu, na o la iloa ai, ua fa’asua’ava lea alii.  Na alu atu lea alii (le na molia) ma tu i o la luma ma lana uo, ma fesili leotele po o ai e fia fusu.

Sa ta’ua e le alii na a’afia, le fa’ate’ia o i la’ua ma lana uo ina ua palauvale atu le na molia, ia la’ua ma lu’i la’ua e latou te fufusu.

Na ta’ua foi e le alii na a’afia lona ‘ai’oi atu i le na molia, e alu ‘ese ma e la te le’o fia fufusu, ina ua savali atu le na molia, i lana uo.

Ae peitai, e le’i uma mai le tala a le na a’afia, ae amata ona folifoli atu le na molia, ma fa’aauau ona valaau atu e sau (le na a’afia) e la te fufusu.

Ma o le tulaga lena na iai i la’ua (le na molia ma le na a’afia), ina ua taunu’u atu leoleo.

Ina ua mae’a ona fa’atalanoaina e leoleo ia le na a’afia, sa faapea loa ona o latou ave faapagotaina ia Faleiva Tatalo (le na molia) ma aveina atu o ia i le ofisa a leoleo.

A’o agai atu le taavale a leoleo ma Faleiva, sa fa’aauau ona palauvale o ia i leoleo ma taumafai e lu’i leoleo e fufusu.

O moliaga na faia faasaga ia Faleiva, na aofia ai le moliaga o le Faatupu Vevesi i nofoaga faitele faapea ma le moliaga, o le Fa’ao’olima i lona tulaga e tolu.

O le moliaga o le faatupu evesi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

O le moliaga o le fa’ao’olima, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $1,000; po o faasalaga uma e lua.

TU’UA’IA E SE TINA IA SONA TUAOI I LE FA’AFEFEINA O IA I SE AGAESE

O le taeao o le aso 30 o Me, 2025, na valaau atu ai se tamaitai i le Ofisa a Leoleo i Fagatogo, e ripotia ai lona tuaoi, i le faia o ni uiga taufa’amata’u ia te ia (tamaitai).

Sa ta’ua e le tamaitai le alu atu o lona tuaoi, ia te ia, ma se agaese ma e foliga mai na fa’asuaava lona tuaoi.

Ina ua taunu’u leoleo i le nofoaga na tupu ai le fa’alavelave, sa latou ulua’i faatalanoaina ia le tamaitai na vala’au i le ofisa a leoleo.

Ma sa ia fa’amatalaina i leoleo e faapea, na usu atu le na molia, le susuga ia Kisani Tama, ma tu’itu’i leotele i lona faitoto’a ma valaau atu ia te ia, e sau i fafo.

Sa ta’ua e le tamaitai na valaau i leoleo, le tu’ua’ia o ia e Kisani i lona tau’ai atu o ana (tamaitai na a’afia) la’au sa tatipi, i le fanua a Kisani.

Na ta’ua e le tamaitai na a’afia, ia lona fai atu ia Kisani, e alu ese ma o le a ia (tamaitai na a’afia) vala’auina leoleo.

O iina na alu ‘ese atu ai Kisani, ae peitai, e le’i umi ae toe fo’i Kisani ma se agaese i lona lima, e tusa ai ma le faamatalaga a le tamaitai na a’afia, ma toe tauvala’au atu ia te ia ma tu’itu’i leoleo lona faitoto’a.  

O lea na vala’au ai loa le tamaitai i leoleo ma sa ia fa’ailoa atu foi ia Kisani, ua mae’a ona ia vala’auina leoleo.  Sa faapea loa ona toe alu ‘ese Kisani.

Ina ua mae’a ona fa’atalanoaina e leoleo ia le tamaitai na a’afia, sa faapea loa ona o latou agai atu e saili le na molia, ae peitai, o le taimi lea na o latou maua ai se vala’au mai i le ofisa a leoleo, e  fa’ailoa atu le toe fo’i atu o Kisani i lona fale.

O lea na toe liliu mai ai leoleo ma toe fo’i atu i le fale a le tamaitai na a’afia ma va’aia ai Kisani o lo’o nofonofo i tafatafa o lona fale, o lo’o inu sana apa pia.

Sa faapea loa ona ave faapagotaina e leoleo ia Kisani ma aveina atu loa o ia i le ofisa a leoleo.  

A’o aga’i atu le taavale a leoleo ma le na molia, sa ia fa’ailoa atu i leoleo lona alu atu i le fale o lona tuaoi ma se agaese, ona ua le fiafia i lona tuaoi, i le ta tia’i atu o ana lapisi ma la’au, i lona fanua.

Ina ua fa’ailoa atu e leoleo i le na molia, o le a lokaina o ia i le falepuipui, na amata ona ita le na molia ma ia lafoina atu ni fa’aupuga taufaamata’u i leoleo.

Sa ia fai atu i leoleo, e tatala mai loa o ia i tua, o le a ia alu atu e su’e latou.  Na le gata i lea, sa faapea ona ‘e’e ma palauvale atu le na molia, i leoleo.

O moliaga na faia e faasaga ia Kisani, na aofia ai le Faatupu Vevesi i totonu o aiga, o le moliaga o le Fa’ao’olima i lona tulaga e tolu faapea ma le moliaga, o le Solivale o fanua a isi.

O moliaga o le fa’atupu vevesi ma le fa’ao’olima, o ni moliaga, i vaega ‘C’ o solitulafono mama, e mafai ona nofosala ai i le falepuipui, e o’o atu i le ono masina.  Po o se sala tupe e ta’i $300; po o faasalaga uma e lua.

O le moliaga o le solivale o fanua a isi, o se vaega ‘B’ i solitulafono mama, e mafai ona nofosala ai i le o’o atu i le ono masina, po o se sala tupe e $500; po o faasalaga uma e lua.