O LE AVE PASI A’OGA

VAEGA 17

E toe fa’atalofa atu i a tatou pa’aga i so’o se tulimanu o le kelope o lo’o maua mai ai lenei auaunaga, aemaise i nai o tatou tama ma tina matutua i Amerika Samoa. E fa’atalofa atu i le faaopoopoga fou o le tatou Fagogo. E tatou te tau fai si’faatasi le viiga ma le mua i lo tatou Tapa’au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa’i ma le manuia i lenei taeao fou.

Ia ae se’ese’e mai loa i ou se’etaga malu, ae o le a fa’aauau atu le tatou Fagogo – O LE AVE PASI A’OGA.

************************************

Sa gata mai le tatou Fagogo ile vaiaso ua mavae ina ua aveina atu uma fanau aoga sa i totonu o le pasi aoga a le alii ave pasi o Paulo, lea ua maliu, i le fale ta’alo a le aga, aua se fa’atalatalanoaga ma le taitai leoleo.  Ma sa faapea foi ona malaga atu ai ma matua uma o nei fanau aoga.

O iina na fa’alauiloa atu ai e le taitai leoleo i matua, le tapenaina e le ofisa o aoga ia ni fomai  faapitoa o le mafaufau, e mafai ona talatalanoa iai alo ma fanau faapea ma matua, e fa’asoa atu iai o latou manatu ma lagona, e tusa ai ma le faalavelave ua tupu.

Ae ona o le auala na tupu lenei fa’alavelave, o lo’o iai ni fesili a leoleo i le mafuaaga na o’o atu ai le pasi a’oga i lea vaega o le alatele, ae e ese le auala e masani ona fa’aaogaina e le avepasi o Paulo– lea ua maliu.

O lea, na fa’alauiloa atu ai e le taitai leoleo, o le a fa’aaluina e leoleo lena vaiaso, e fa’atalanoanoa ai alo ma fanau uma sa i totonu o le pasi, ina ia maua se ata o le mafuaaga na filifili ai le alii ave pasi ua maliu, o Paulo e uia lea vaega o le alatele, na tupu ai le faalavelave.

Ua faapea foi ona fa’alauiloa e le pule a’oga ia le fa’atagaina ona ave e matua a latou fanau i le fale i lea aso, e malolo ma fa’atasitasi ma o latou aiga.  Ma sa talosagaina ia matua, ina ia o latou toe malaga mai ma a latou fanau, i le aoga i le aso e soso’o ai, ona o le a leai se latou pasi mo ni nai aso.

Sa malilie uma iai ia matua ona ua leai seisi o latou na toe mana’o e toe alu seisi o a latou fanau aoga i se pasi aoga, ona o le fa’alavelave lea ua tupu.

Ua ta’ape atu nei ia matua ma a latou fanau, e toe fo’i i aiga ae ua toe ai nei na’o le ta’ita’I leoleo ma le pulea’oga.  Ua saofa’i ifo i lalo le pulea’oga ma faapea atu i le ta’ita’i leoleo, “Pau lava le mea ua ou fa’afetai ai tele, ona e leai seisi o fanau aoga sa manu’a pe maliu mai i lenei faalavelave.”

Na lue le ulu o le taitai leoleo ma ia faapea atu, “Amene.”  Ae sa ia toe faapea atu i le puleaoga.  “O le a se mea e mafai ona e faamatala mai e uiga i le alii ave pasi?”

Sa tali mai le pulea’oga, “E le tele lava se mea ou te iloa, pau o lea, ua tete’a ma lona to’alua, e leai se la fanau.  E nofo to’atasi o ia ma e to’aga mai lava i lana galuega.”

[E FAIA PEA]