Le fiafia nisi o Senatoa i saunoaga a le loia a le kovana i taimi o iloiloga

Pago Pago - AMERIKA SAMOA

Sa fa’aleoina e le toatele o afioga i Senatoa, ia so latou le fiafia i nisi o saunoaga a le alii loia a le Kovana, le susuga ia Barry Fundt, ina o faia le latou iloiloga, i le taeao o le aso Tofi o le vaiaso ua tuanai, e faatatau i se pili o fesiligia ai tiute a nisi o tagata faigaluega a le malo, i totonu o komiti faafoe.

O lenei pili taufa’aofi sa faapea ona fa’aulufaleina e le afioga i le Senatoa ia Togiola T.A. Tulafono, afai ae pasia, e otomeki ona fa’amalolo ai so’o se tagata faigaluega a le malo o Amerika Samoa, e nofo i totonu o se komiti faafoe, pe a mae’a taimi faatulagaina o lana galuega, i totonu o le malo.

Sa le gata i le susuga ia Barry, ae sa faapea foi ona auai le tamaitai Loia Sili ia Gwen Tauiliii-Langkilde, i lea iloiloga, ma faaleoina lo la lagolagoina o le pili.

Na fautuaina e le Loia Sili ia le tatau ona fa’aofi sa’o ia le gagana o le pili, i totonu o tulafono po o aiaiga, o lo’o lima taitaiina ai komiti ma faalapotopotoga taitasi.

Sa faaleoina e Barry, le loia a le Kovana, ia lona lagolagoina o le faamoemoega o lenei pili, ma ia faamamafaina ai le feagai o Amerika Samoa ma se lu’itau tulaga ese, i le tali atu lea i tiute fa’atulafonoina a le malo feterale – o se luitau e tutusa ma lu’itau o feagai ma setete tetele.

Sa ta’ua foi e le alii loia, le tatau i le Teritori ona mataituina ia gaioiga a le ofisa o tiute ma femalagaiga, o eria e masani ona mataituina e malo feterale, i isi atunu’u.

Ma sa ia saunoa i le avea o lea tulaga ma lu’itau i le atunu’u ona faatumu ia galuega e mana’omia ai tomai faapitoa, ma atonu ua mafua lea tulaga, ona o le toatele o tagata o Amerika Samoa, e le maualuga lo latou agava’a po o le atamai. 

O se saunoaga sa faapea ona faaleoina ai e le afioga Togiola, ia lona le fiafia tele ma ia saunoa mai i le alii loia, po o fa’atatau foi lana saunoaga i sui o le Maota Fono.

Ma sa fa’alauiloa mai e Togiola i le alii loia, le agava’a o afioga i Senatoa, e tusa ai ma tulaga o le tulafono.

Sa fesiligia e Togiola ia le alii loia, po o le manatu lea a le ofisa o le Kovana, e pei ona sa ia saunoa ai.

Na taumafai le alii loia e fa’alalolalo ma ia taumafai e toe faamanino lana faamatalaga, ae peitai, sa ta’ua e Togiola, e pe a ma le faatolu ona saunoa Barry i lea lava tulaga e tasi.

Ma sa fa’aleoina foi e Togiola ia lona le ‘auai i le manatu na saunoa ai Barry, i le faatusatusaina lea o Amerika Samoa i se malo itiiti.

Sa saunoa Togiola, e tusa lava pe na’o le 60,000 tagata o le teritori, ua na’o na pau na o tagata o iai, ae o se atunu’u.  Ma sa ta’ua e Togiola e foliga mai, e va’ai maualalo le alii loia ia Amerika Samoa, e ala i lona faatusatusaina lea i se malo itiiti.

Sa toe saunoa foi Togiola ma faamamafaina, le toatele o tagata atamamai ma le talenia, o lo’o nonofo i totonu o Amerika Samoa ma e le tatau ona iai se fa’afaigata, i le sailiga o nisi agava’a mo komiti faafoe ma komisi.

Sa faapea ona fautuaina ai e Togiola ia le alii loia, ina ia toe fo’i atu ma fa’ailoa atu i e kovana, e latou te talitonu, e leai se faafitauli, i le tau sailiga o ni tagata e faafaigaluega i ofisa, komiti ma komisi, aua o lo’o tumu Amerika Samoa i tagata ua lava a’oa’oina, agava’a ma le atamamai.

Na fesiligia le afioga i le Peresetene o le Senate, ia Senatoa Tuaolo Manaia Fruean, ia le tamaitai loia sili e tusa ai ma sona manatu i lenei mataupu, pe ua alagatatau i sui faitulafono ona avea ma totino o komiti faafoe ma komisi.

Sa tali mai le tamaitai loia sili, e iai sina fa’afitauli i lea tulaga, ona o lo’o i le Fono le malosiaga e mataituina ai komiti ma komisi.  Ae o lo’o iai nisi o komiti faafoe ma komisi, e tatau ona nofoia ai nisi o sui mai i le Maota Fono, e tusa ai ma le tulafono.

Sa fa’aalia e Tuaolo le le nofo lelei ia te ia le faamatalaga o le ‘conflict of interest’.  Ma sa ia ta’ua le filifiliga e le Peresetene o le Iunaite Setete, ia John F. Kennedy, o sona uso e avea ma Loia Sili, ma ia fesiligia le tamaitai loia sili, pe sa iai se ‘conflict’.

Sa ta’ua e le tamaitai loia, le ono tulai mai o ni faafitauli i lea tulaga, aua afai ae iai se tagi e faasaga i le peresetene, o le a avea le so’otaga faaleaiga a le peresetene ma le loia sili, ma auala o le a fa’afaigata ai ona mataituina tutoatasi e le loia sili, lea mataupu.

Sa faapea foi ona toe fa’amanatu mai e Tuaolo ia se tulaga na tupu i le taimi o le faigamalo a Tauese ma Togiola, lea na filifilia ai e le alii Kovana ia lona uso, ia Faoa Aitofele, e avea ma Tausitupe a le malo.

Na finauina e Tuaolo le leai o se faafitauli na tulai mai i lea tulaga, e ui ina aiga le alii kovana i lena taimi ma le Tausitupe a le malo, aua sa filifilia Faoa ona o lona agava’a ma lana tautua.

Sa faapea foi ona faaleoina e Tuaolo lona agaga faafetai i le afioga i le Senatoa ia Togiola, e tusa ai ma ana saunoaga, i le mataupu e faatatau i saunoaga a le alii kovana, aemaise ai o se faamatalaga e foliga mai ai, ua le agava’a ia sui o le Maota Fono, e avea ma totino o komiti faafoe ma komisi.

Na faapea foi ona fa’aleoina e le afioga i le Senatoa ia Utu Sila Poasa, lona ia foi le fiafia ia Barry ma ana faamatalaga ma ia fa’ailoa atu i le alii loia, o le maota o le Senate, o lo’o nofoia e nisi sa avea ma kovana, peresetene o senate, faamasino, loia, inisinia ma vetereni, ua lava lo latou agava’a.

Sa fa’aalia le o’otia o le agaga o le afioga i le Senatoa, I lona faapea atu i le loia a le Kovana, lona fa’atauva’a pe a ia (loia) talanoa faapea i totonu o le Maota o le Senate.

Na saunoa le afioga Utu, o ia o se vetereni litaea mai i Fuava’a a le Iunaite Setete, o le Peresetene malolo o  le Senate o se vetereni litaea mai i le vaega’au a le Ami.  Ma na o latou umia tofi fa’aletaitai, lea na o latou taitaia ai le toatele o fitafita a’o latou iai i totonu o vaega’au.

Sa ta’ua e le afioga Utu, e 20 tausaga na ia tautua ai i totonu o vaega’au a le malo tele, ae e silia ma le 20 tausaga na tautua ai le afioga i le Senatoa sa avea ma peresetene o le Senate.

Na saunoa Utu, o i latou o  ni tagata aoaoina ma ua avea i latou ma sui o nu’u ma itumalo.  Ma ia fautuaina ai le alii loia ina ia aua ne’i toe alu atu ma talanoa atu faapea i totonu o le maota fono.

Na faaleoina foi e Utu lona le fiafia e tusa ai ma le fa’aauau pea ona leai ni tagata filifilia mo komiti ma komisi ‘ese’ese, ae ua fitu masina talu ona nofoia le faigamalo fou.

I sona talitonuga, sa ta’ua e le afioga i le Senatoa, e mafua lea fa’atuai ona o le le faia o tiute a le aufaigaluega a le ofisa o le kovana.

Na fesiligia e le afioga i le Senatoa ia Olo Uluao Letuli, pe na iai ni faafitauli na aafia ai nisi o sui faitulafono, i taimi ua tuanai, sa i totonu o komiti faafoe ma komisi a le malo.

Sa tali mai Barry, ua leva ona soalaupuleina e le ofisa a le kovana ia le avea o sui faitulafono ma totino i komiti faafoe ma komisi a le malo.

Ma ia fa’amaonia, le iai o ni popolega i tulaga o ‘conflict of interest’, o lo’o avea ma mataupu tutotonu i a latou fetufaa’iga.  Ae peitai, sa faamanino mai e Barry, le leai o se tulafono ma’oti, ua faatulagaina e tusa ai ma lenei mataupu, i lenei taimi.

I tauaofiaga masani a le Senate, i le aso Faraile o le vaiaso ua tuanai, sa pasiaina ai le pili i lona faitauga mulimuli.