Maua le au gaoi na osofaia fale i Fogagogo

Pago Pago - AMERIKA SAMOA

O le aso 28 o Me, 2025 na valaau atu ai se tamaitai i le ofisa a leoleo ma ripotia ai le osofa’ia o le fale a ona matua, e se ‘au gaoi.

E tusa ai ma fa’amaumauga a le faamasinoga, o lo’o ta’ua ai le taunu’u o leoleo i le nofoaga na tupu ai le faalavelave ma fa’atalanoaina ia le tamaitai na valaau atu i leoleo ma sa ia ta’ua ia lona le mautinoa, po o le a tonu meatotino sa gaoia, ona o le fale sa osofa’ia, o le fale a ona matua, lea sa i atunu’u i fafo i le taimi na osofa’ia ai lo la fale.

Ae e toe fo’i atu leoleo i lo latou ofisa, na toe maua atu ai seisi valaau mai i seisi tina (o le tina lea e ana le fale sa osofa’ia), e tusa ai ma le mataupu lava lea e tasi.  Sa toe agai atu leoleo i le fale na tupu ai le faalavelave ma faia a latou su’esu’ega, na aofia ai ma le fa’atalanoaina o se tasi o tuaoi.

O le susuga ia Elionai Kuresa na ave faapagotaina ma molia i lenei mataupu.

Sa maua i su’esu’ega a leoleo, le alu atu o se tagata i le fale o le aiga na osofa’ia, ma na iloa mai e le aiga tuaoi ia le susulu atu o se moliuila, i tua o le fale, i le 11:30 i le po.

Sa faamatala e le to’alua a le tama teine, a le ulugalii na osofa’ia le la fale, lona va’ai lelei i foliga o le tagata na osofa’ia le fale, o le alii e igoa ia “Jonah”, o se alii na la a’o’oga fa’atasi.

Sa masalomia e leoleo, o le alii lea o “Jonah” o le tagata lava lea e tasi, na lokaina muamua foi e leoleo, i le solitulafono lava lea e tasi.

I le aso 29 o Me, sa faapea ona toe fa’atalanoaina ai e leoleo, ia le alo tamaitai o le ulugalii na osofa’ia lo la fale ma sa tolaulauina e le tamaitai ia meatotino na gaoia mai i le fale a ona matua.

Sa ta’ua e le tamaitai, le fa’ailoa atu e lona tina, na iai sana ‘iPad’ ma se ‘laptop’ i tafatafa o se ‘printer’, atoa ai ma ni se’evae tamo’e, sa i totonu o le potu moe tele.

O meatotino ia sa le toe va’aia i totonu o le fale a ona matua.

Sa faapea ona o’o atu foi leoleo i tuaoi o le ulugalii lea na gaoia lo la fale, mo le fa’atalanoaina, pe sa va’ai i se tulaga e le masani i taimi na tupu ai le faalavelave.

Sa faamatala e le tuaoi, na fai sana galuega i lona fanua i le taeao o le aso 29 o Me, 2025, ae ona va’aia se ta’avale o afe atu i le latou auala, ona toe solomuli lea o le ta’avale, agai i tafatafa o le fale o le ulugalii lea sa i atunu’u i fafo.

Ma na ta’ua e le tuaoi lona va’aia o se alii, o oso mai fafo o le taavale ma tamo’e agai i se pupu vao ma si’i mai se moa vao, ma tu’u i totonu o le taavale, ona ia toe oso lea i totonu o le taavale ma fo’i atu i le alatele.

Ae na pau le vaega sa manatua e le tuaoi, o le ta’avale, o se ‘rental’ ma e amata lona laisene i le numera 5.

Na fesiligia foi e leoleo ia le molimau, pe na te iloa le tagata lea na sau i le ta’avale, sa tali le molimau, o se alii e igoa ia Jonah, lea masani ona fealua’i i le auala.

Sa ta’ua foi e le molimau e faapea, ina ua alu atu e fafaga ana ta’ifau, sa ia tau atu i se atigipusa o iai totonu ia se masini oti ulu ma sa ia aveina i le fale, ona sa iai sana fuafuaga, e fesiligia le to’alua o le tama teine a le ulugalii na osofa’ia le la fale, po o sana meatotino lea.

O le aso 29 o Me, sa agai atu ai se tasi o leoleo i le malae ta polo i Iliili ma fa’atalanoaina le uo lelei a le na molia.  O lea leoleo, e masani i le na molia ma ana uo, mai aso o latou fa’atau polo i le malae ta polo.

Na fesiligia e le leoleo ia le uo a le na molia, po o fea e maua ai, ae fesili mai le uo a le na molia, po o tau saili e leoleo ia le masini moa vao.

Ona fesili atu lea o le leoleo pe na te iloa po o fea o iai le moa vao, ma sa ta’ua e le uo a le na molia, le mimita atu o le na molia ia te ia, e uiga i le moa vao lea na gaoia mai i se aiga i Fogagogo.

Na fai atu loa le leoleo i le uo a le na molia, e la te o i le ofisa a leoleo mo le fa’aauauina o le latou fa’atalanoaga.

Sa faia ai se molimau tusia a le uo a le na molia.  Ma sa ia faamatalaina le alu atu o le na molia, i le mimita atu e uiga i se fale i Fogagogo, sa ia osofa’ia.  Ma na faamatala atu foi e le na molia lona aveina o se moa vao, o se ‘laptop’ ma nisi tulaga.  

Ma o se alii e suafa ia Leroy Vaanatiu, sa fa’aaogaina se ta’avale ‘rental’ e aumai ai meatotino na gaoia e le na molia, mai i Fogagogo.

Na fesiligia e leoleo ia le uo a le na molia, pe iai seisi igoa a ‘Jonah’ sa tali le uo, o Elionai Kuresa.

Sa taumafai leoleo e saili ia Elionai, ae peitai, sa le’i faamanuiaina a latou taumafaiga.  Na faapea foi ona fa’afeso’otai e leoleo ia le Faamasinoga Maualuga ma fa’amaonia ai, o lo’o iai se fa’atonuga fa’alefaamasinoga, e ave faapagotaina ai Elionai.

O le aso 31 o Me, na va’aia ai Elionai (le na molia), i luma o se fale i Iliili, i leisi itu auala o le a’oga a Iakina, ma lokaina mai ai o ia iina, ma aveina atu i le Ofisa a Leoleo i Tafuna.

Sa faamatalaina ai e le na molia ia fealua’i i Fogagogo i le vaveao o le aso Tofi, ma ia tau atu ai i se fale manaia ma ia fealualua’i ai i autafa, ma ia iloa atu ai le ola mai o le ‘ea malulu o se tasi o potu.

Ona ia liliu lea agai i le fale o lo’o teu ai meafaigaluega.  Ma sa ia taumafai e tatala le fale ae peitai, sa lokaina.  O lea na ia talepeina ai le faitoto’a ma aveina ia se moa vao (weed eater), o se taga Ami na iai totonu ni totini lima, se’evae ami, fusipa’u ma se pulou pasika.

Sa ia nanaina nei meatotino i tafatafa o le alatele, i tua o le pa, i le itu tauagavale o le fale.

Sa ta’ua e Elionai (le na molia) ina ua mae’a ona ia gaoia ia meatotino mai i le fale a le ulugalii sa i atunu’u i fafo, na faapea ona ia fa’asolosolo atu i leisi fale, ma ia oso i totonu o se fa’amalama na matala, ma ia gaoia mai ai se ‘iPad ma ni se’evae tamo’e.

Ma sa ia nanaina foi nei meatotino i tafatafa o le fale muamua lea na ia osofa’ia, ona ia savali lea agai i Iliili ma fa’ailoa ia Leroy meatotino na ia gaoia.

Ona alu atu loa lea o Leroy i lana taavale ‘rental’ ma aoina mai ai nei meatotino sa gaoia e Elionai.

Na ta’ua e Elionai lona faatauina atu o le ‘laptop ia Leroy mo se tama’i taga pepa iila, o iai se vaega o fualaau faasaina (Aisa), e $25 lona tau.

Sa ta’ua e Elionai, na mafua ona ia osofa’ia nei fale, ona o le tau sailiga o se tupe e malaga ai i atunu’u i fafo, i le maliu o lona tina.

Sa fa’amaonia foi i su’esu’ega a leoleo, le toe foi o Elionai i le fale lea na ia gaoia mai ai meafaigaluega, ma toe gaoia mai se kilipa oti ulu lanu siliva, ma nana i luma o le fale a le tuaoi.

Ae peitai, na sola ‘ese ina ua sau i fafo le tuaoi ma va’aia lona gaoia o le kilipa.  O le kilipa oti ulu lea na maua e le tuaoi ma toe fa’afo’i i le tagata e ana ina.

O le aso muamua o Iuni, 2025 sa aveina atu ai e leoleo ia le alii o Leroy Vaanatiu, lea foi sa molia i lenei mataupu mo le su’esu’eina, e tusa ai ma le ‘laptop’ lea na tu’u atu e Elionai ia te ia.

Sa faamaonia e Leroy le tu’uina atu e Elionai o le laptop ia te ia, ae na te le’i tu’uina ia Elionai se vaega o fualaau faasaina.

Sa faatonuina Leroy e fa’amatala foliga o le ‘laptop’ o lo’o ia te ia.  Sa tali Leroy, e lanu siliva ma ua mae’a ona ia fa’atauina atu ia Simi Sou mo le $140.

Na faapea loa ona agai atu leoleo i le faleoloa a le iFix i Pavaiai ma sa fa’amaonia e le pule o le faleoloa, ia lona fa’atauina o se laptop mai ia Leroy, mo le $140, i le aso 29 o Me, 2025.

Ina ua fa’aiiloa atu e leoleo i le pule o le iFix, o le laptop sa gaoia, na faapea loa ona toe fa’afo’i e le alii pule o le faleoloa, ia le laptop, i leoleo mo le fa’ao’oina atu i le tagata e ona le laptop.

O le faitau aofai o meatotino na gaoia mai i le fale muamua, e pe a ma le $600 ae e $800 le tau aofai o meatotino na gaoia mai i le fale lona lua.

O se taimi mulimuli ane, sa faapea ona lokaina ia Elionai i le to’ese i Tafuna, e faatalitali ai lona tula’i i luma o le Faamasinoga Fa’aleitumalo.

[E le i ta’ua i fa’amaumauga a le malo, pe sa molia ia Leroy i lenei mataupu.]

O moliaga na faia fa’asaga ia Elionai, na aofia ai:

Faitauga 1, 4 & 7:  Gaoi, o se vaega ‘C’ i solitulafono mamafa, e mafai ona nofosala ai i le falepuipui, e le silia ma le fitu tausaga, po o se sala tupe e i le va o le $5,000 ma le $20,000; po o faasalaga uma e lua. 

Faitauga 2, 5 & 8:  Faomea i lona tulaga muamua, o se vaega ‘B’ i solitulafono mamafa, e mafai ona nofosala ai i le falepuipui, e le sili atu ma le 15 tausaga.

Faitauga 3, 6 & 9:  Solivale o fanua a isi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

E $50,000 se vaegatupe na fa’atulagaina, e mafai ona tatalaina ai i tua le na molia, e faatalitali ai lona faamasinoga.