TALA O LE LOTOIFALE

Pago Pago - AMERIKA SAMOA

TOE TATALAINA TAUAOFIAGA O LE FONO FAITULAFONO, AE TOE TAPUNIA IA AUKUSO 1 SE’IA O’O IA SETEMA 8

O le amataga o le vaiaso sa toe tatalaina aloaia tauaofiaga lona 39 a le Fono Faitulafono, ma e to’a 16 Senatoa, mai i le 18, na mafai ona auai i le sauniga lotu sa taitai’a e le susuga i le Fa’afeagaiga ia Rev. Kirifi ma vi’iga o le sauniga, sa lagiina e le aufaipese e le aufaigaluega o le Senate.

Ina ua mae’a le sauniga amata, na fa’afeiloa’ia aloaia e le afioga i le Peresetene o le Senate, le tofa ia Tuaolo M. Fruean ia le mamalu o afioga i Senatoa ma ia fa’aleoina lona taulimaina o le lisi o tofiga fou mai i le kovana, mo lo latou iloiloina, e pei ona fa’ao’oina atu i le aso Faraile o le vaiaso ua tuanai.

Sa fa’alauiloaina foi e Tuaolo le toe fa’ao’oina atu e le afioga i le Kovana Pulaalii N. Pula, ia le suafa o Tapusalaia Maneafaiga, e avea ma Faatonu o le Matagaluega o Paka ma Malae Ta’alo.  I le iloiloga muamua ia Fepuari, sa le’i pasiaina ai e le maota o le Senate, ia le tofiga fa’aolioli a Tapusalaia, i se palota e 9 ioe, 7 leai.  E 10 ioe e manaomia, e pasia ai se tofiga.

Sa faapea foi ona fa’ao’oina mai e le kovana ia suafa mo tofiga o le Faatonu o le Ofisa o le Paketi, ma le Faatonu mo le Matagaluega o Alagamanuia o le sami ma le vaomatua (DMWR) ma sa saunoa foi Tuaolo, o lo’o faatalitalia foi nisi o suafa mo komiti ese’ese a le malo.

Na faaleoina foi e le afioga i le Peresetene a le Senate, se maliliega ma le afioga i le Fofoga Fetalai, Savali Talavou Ale, mo le fa’aauauina o tauaofiaga a le maota fono, se’ia o’o ia Aukuso 1, 2025 ona malolo ai lea, ae toe tatalaina tauaofiaga ia Setema 8, 2025 lea o le a amataina ai loa ona iloiloina ia le Tala o le Tupe mo le tausaga tupe 2026.

E tasi se fa’aaliga sa faaleoina e le Taitaifono o le Komiti o le Fale Fono, le afioga Olo Uluao Letuli, e tusa ai ma fonotaga tu’ufa’atasia ma sui o le maota o Faipule, ia Iulai 25, 2025 aua le soalaupuleina ma le faamautuina o le aso e tatalaina aloaia ai le fale Fono fou.

A’o feagai ai le Fono ma la latou malologa, sa fa’aauau pea ona faataunu’uina fonotaga a lenei komiti, ma o latou asia ai le fa’agasologa o le galuega i se taimi lata mai.  Ma e ui ina sa fa’atulagaina le umusaina o le fale fou i le amataga o lenei vaiaso, ae peitai, sa toe tolopoina lea fuafuaga o Setema.  Ma o le a fa’amautuina le aso tonu o lea faamoemoe, i la latou fonotaga o loma nei.

Ae e le’i fa’amae’aina tauaofiaga o lea aso, sa fa’aleoina e le alii Peresetene ia le mataupu na a’afia ai le afioga i le Senatoa Ponausuia Luce Ponausuia, ma le avanoa o lona nofoa mo seisi sui, ona e le’i lesitalaina le suafa matai i le Ofisa o Lesitala.

E ui ina ua maua mai se fa’amaoniga mai i le Kovana Fa’aitumalo e faamaonia ai le agava’a o le afioga i le Senatoa e avea ma sui o le itumalo #6, ae peitai, o lo’o iai pea ni mataupu e manaomia ona fofoina.

I se tulafono sa pasia i le Tauaofiaga lona 38 a le Fono Faitulafono, o lo’o fa’amalosia ai le tatau i itumalo ona filifilia a latou Senatoa ae e le’i o’o atu i le ulua’i aso Lua o Tesema, i tausaga palota.  E le gata i lea, ua faamalosia ai le fa’ao’oina atu o fa’amaumauga e faamaonia ai le agavaa o Senatoa, i le komiti o le Senate, ae e le’i fa’atautoina i latou.

I lalo o lea tulafono, e tatau ai i Senatoa ona fa’ao’oina atu a latou pepa fanau, e faamaonia ai le avea o i latou o ni Nesionale po o Sitiseni o Amerika, faamaonia ai foi ma tausaga, o le lesitalaina o suafa matai ma fa’amaoniga o nu’u ma afioaga o lo’o fa’amautu ai.

Ma sa fa’amautuina ai e le afioga i le Peresetene o le Senate, le fa’amautuina o agava’a uma, e le afioga i le Senatoa ia Ponausuia ma ua aloaia ai nei o ia ma sui o le Tauaofiaga lona 39 a le Fono Faitulafono.

TAUNU’U MAI FOMAI A LE SHRINERS

O le aso Faraile o le vaiaso ua tuanai, na tatala aloaia ai auaunaga a fomai mai i le falema’i a Shriners i Honolulu, mo fanau iti, e siaki ai o latou ponaivi, o tulaga faaletonu o gutu, o vae tutupa faapea ai ma tino mu.

O le aso ananafi na fa’amae’a ai lea auaunaga.  Ma na fa’aalia mai e le susuga ia Taotasi Archie Soliai, se tasi o totino a le Shriners o Pago Pago, o fanau o maua i gasegase tuga, o le a faapea ona aveina atu i fafo mo togafitiga, e aunoa ma le totogia e le aiga o se tupe.

FAAPAIAINA FANUA MO FALE FOU I LE UAFU

O le aso Faraile o le vaiaso ua tuanai, Iulai 11, 2025 sa faapa’iaina ai le fanua ua faamoemoe, e fausia ai se fale fou, i luga o le uafu a le malo i Fagatogo.

I lana saunoaga, sa faaleoina ai e le afioga i le Kovana, Pulaali’i N. Pula, ia lona agaga fa’afetai i pa’aga uma o lenei poloketi aemaise le ofisa a le ARPA (American Rescue Plan Act), mo la latou fesoasoani malosi i le fa’atupeina o le galuega atoa ma sa ta’ua ai e le kovana, le avea o lenei galuega ma inivesi i le lumanai o le teritori ma ona tagata.

Sa ta’ua e le Faatonu o le Matagaluega o Uafu ma Malaevaalele, le susuga ia Barney Sene, ia le avea o lenei galuega ma tulaga e faaleleia atili ai galuega i luga o le uafu, atina’eina ma fa’amalosia o le tamaoaiga ma le fa’aleleia atili o le puipuiga o le saogalemu i galuega fai i luga o le uafu.  Ma na faaleoina foi e Barney lona agaga fa’afetai i pa’aga ‘ese’ese ma i latou na mafai ona galulue faatasi ina ia tino lenei faamoemoe.

O le kamupani a le Westland, lea o lo’o gafa ma le fausiaina o le malumalu fou a le Ekalesia a Iesu Keriso o le Au Paia o Aso e Gata Ai, o le a faatinoina le galuega, i lalo o sa latou tauofoga e $28.57 miliona ma e 18 masina ua faamoemoe, e faamae’aina ai lenei galuega.

O le ata o le galuega sa tusia e le ofisa faufautua a le Pioa ma le alii tusiata o James Cubitt mai Auselia ma o le a aofia ai foi i latou i le mata’ituina o le faatinoga o le galuega.