POU TIUTE A LEOLEO

Pago Pago - AMERIKA SAMOA

LOKA SE ALII NA O’O LONA LIMA I LONA TUAFAFINE ONA O MEA’AI

O le 10:00 i le taeao o le aso 27 o Me, 2025, na fa’afeso’ota’i ai e se tamaitai ia le Ofisa a Leoleo i Tafuna, ina ua sauaina e lona tuagane, sona uso, ina ua musu e gaseseina ia se ti o le taeao.

Ina ua taunu’u leoleo i le nofoaga na tupu ai le fa’alavelave, sa faamatalaina e le tamaitai na a’afia e faapea, na sauaina o ia e lona tuagane, o Wendell Unasa, ona ua musu (le tamaitai na a’afia), e kuka se mea’ai i lea taeao.

Na ta’ua e le tamaitai ia le ‘e’e atu o lona tuagane (le na molia) ia te ia, ma mulimuli atu ia te ia, a’o ia savali agai i totonu o lona potu.  Ma sa futi mai e lona tuagane (le na molia) ia lona (le tamaitai na aafia) ulu ma ta tu’i ona foliga.  Sa ta’ua e le tamaitai na a’afia, ia lona pa’u i lalo, ae ina ua toe tu mai i luga, sa toe tu’i e lona tuagane, leisi itu o ona foliga.

Sa ta’ua e le tamaitai na a’afia, ia lona taumafai e fusu ma u’una’i ‘ese lona tuagane, ina ia mafai ona sola ‘ese atu, i lona uso, mo se fesoasoani ma vala’au le ofisa a leoleo.

Ina ua mae’a ona fa’atalanoaina e leoleo ia le tamaitai na a’afia, sa o latou aga’i atu loa i le fale a Wendell ma ave faapagotaina o ia, ma aveina atu ai loa o ia i le ofisa a leoleo i Tafuna.

O moliaga sa faia fa’asaga ia Wendell, na aofia ai le Fa’ao’olima i lona tulaga e tolu faapea le moliaga o le Faatupu Vevesi i totonu o lona aiga.

O le moliaga o le faao’olima, o se vaega ‘A’ i solitulafono mama, e mafai ona nofosala ai i le falepuipui i le o’o atu i le tausaga atoa, po o se sala tupe e $1,000 po o faasalaga uma e lua.

O le moliaga o le Faatupu Vevesi, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

E $1,000 se vaegatupe ua mae’a ona fa’atulagaina, e mafai ona tatalaina ai le na molia, mai i le falepuipui.

TU’UA’IA E SE TAMAITAI SANA UO TAMA I LE SAUAINA O IA

O le po o Me 27, 2025, na vala’au atu ai se tamaitai i le Ofisa a Leoleo i Tafuna, mo se fesoasoani, ma ia tu’ua’ia le sauaina o ia, e sana uo tama.  Sa ta’ua e le tamaitai na valaau atu i leoleo, le ‘e’e ma le palauvale atu o lana uo tama ia te ia, faapea ai ma le tatu’i fa’alua o ona foliga.

E taunu’u leoleo i le nofoaga na tupu ai le fa’alavelave, o lo’o fa’atalitali mai le tamaitai na a’afia ma sa fa’atalanoaina o ia faatasi ai ma tagata o lona aiga, sa avea ma molimau.

Ona agai atu lea o leoleo i le na molia, ma ave faapagotaina o ia, ma tu’uina o ia i totonu o le taavale leoleo

E tusa ai ma le fa’amatalaga a le tamaitai na a’afia, sa fufusu lana uo tama ma seisi alii, ae na alu atu o ia (tamaitai na a’afia) e taofiofi le misa.  Ae peitai, sa tu’i fa’alua mai ai ona foliga e lana uo tama (le na molia), ma palauvale mai ia te ia.

Na ta’ua e le tamaitai na a’afia, lona u’una’ia o lana uo tama agai i le pa sima, ma ia fai atu iai, o le a valaau leoleo.

Sa fa’amaonia e molimau ia le fa’amatalaga a le tamaitai na a’afia.  Ma sa ta’ua e le molimau, lona va’aia o le na molia, o fasi le tamaitai na a’afia, i totonu o le la potu.  E le gata i le tatu’i ina e le na molia, o foliga o le tamaitai na a’afia, ae faapea foi lona tino.  Ma sa u’una’i e le tamaitai na a’afia ia lana uo tama, i le pa sima.  

Sa fa’amaonia foi e le molimau ia le ‘e’e ma le palauvale o le na molia ma i’u ai loa ina vala’au leoleo, mo se fesoasoani.

Ina ua taunu’u leoleo ma le na molia, i le ofisa a leoleo, sa musu le na molia e fai sana faamatalaga.

O ona moliaga, na aofia ai le Fa’ao’olima i lona tulaga e tolu faapea le moliaga o le Faatupu Vevesi i totonu o lona aiga.

O le moliaga o le faao’olima, o se vaega ‘A’ i solitulafono mama, e mafai ona nofosala ai i le falepuipui i le o’o atu i le tausaga atoa, po o se sala tupe e $1,000 po o faasalaga uma e lua.

O le moliaga o le Faatupu Vevesi, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

E $1,000 se vaegatupe ua mae’a ona fa’atulagaina, e mafai ona tatalaina ai le na molia, mai i le falepuipui.