O LE AVE PASI A’OGA

Vaega e 16

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 16.

**********************************************************

I lalo o le fa’atonuga a le taitai leoleo i lea taeao, sa faapea ona momoliina uma fanau aoga na i le alatele, i le taimi na tupu ai le fa’alavelave, i le fale ta’alo a le a’oga.

Sa lagonaina leo o le tagi ma le loto popole i le toatele o fanau aoga, e le gata i le tagi ona o le fa’anoanoa, ae faapea le fetagisi ma vala’au o latou matua.

E le’i pine ona taunu’u fanau aoga i le fale ta’alo, ae faapea foi ona taunu’u ma o latou matua.  

Ma sa faapea foi ona taunu’u ma le taitai leoleo lea sa i le alatele ma nisi o leoleo.

Ua tula’i le taitai leoleo ma fa’atalofa atu i matua ma fanau aoga, ma fa’ailoa atu lona igoa.  Ma sa ia fa’aleoina lona agaga faanoanoa, ona o le fa’alavelave sa tupu i lea taeao, ua maliu ai le alii ave pasi o Filipo.

Ae peitai,sa saunoa le taitai leoleo, i lona agaga fa’afetai, ona e na’o le toatasi ua faapea ona amia i lea taeao, ae ua mafai ona fa’asaoina soifua uma o fanau aoga, o le alii inisinia, e o’o lava i le tamaitai o Epi, lea na tupu ai le fa’alavelave.

Sa va’aia i foliga o matua lo latou ioeina o le saunoaga a le taitai leoleo, ma le fa’asaoina mai o a latou alo ma fanau i lenei fa’alavelave.

Sa fa’aauau le saunoaga a le taitai leoleo i lona faapea atu, o le a tapenaina e le ofisa o aoga ia ni fomai, e faapitoa mo le mafaufau, e mafai ona talatalanoa iai alo ma fanau faapea o latou matua, e fa’asoa atu iai o latou manatu, i le faalavelave ua tupu.

Ae ona o le auala na tupu lenei fa’alavelave, o lo’o iai ni fesili a leoleo i le mafuaaga na o’o atu ai le pasi a’oga i lea vaega o le alatele, ae e ese le auala e masani ona fa’aaogaina e le avepasi o Filipo – lea ua maliu.

O lea, na fa’asalalauina ai e le taitai leoleo, o le a fa’aaluina e leoleo lena vaiaso, e fa’atalanoanoa ai alo ma fanau uma sa i totonu o le pasi, ina ia maua se ata o le mafuaaga na filifili ai le alii ave pasi ua maliu, o Filipo, e uia lea vaega o le alatele, na tupu ai le faalavelave.

[E FAIA PEA]