POU TIUTE A LEOLEO

Pago Pago - AMERIKA SAMOA

SULUFA’I SE TINA I LEOLEO INA UA SAUAINA E LONA TO’ALUA MA FA’AMATA’U I LE OTI

O le taeao o le aso 25 o Me, 2025, na sulufa’i atu ai se tina loto mafatia i le Ofisa a Leoleo i Fagatogo ma ripotia lona toalua, le susuga ia Fiatele Pulesala, i le sauaina o ia i le fale fa’afiafia (pavilion) i Fagatogo ma le fa’amata’uina o ia i le oti.

Sa faapea ona mulimuli atu Fiatele i lona to’alua, i le ofisa a leoleo, ma i’u ai ina ave faapagotaina o ia e leoleo, ma molia i le Fa’ao’olima i lona tulaga e tolu faapea ma le Faatupu Vevesi i nofoaga faitele.

O le moliaga o le faao’olima, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300, po o faasalaga uma e lua.

O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

I le fa’atalanoaga a le tina na a’afia ma leoleo, sa faamatalaina ai e le tina lona fefe tele ma e le o se taimi muamua lea ua tupu ai se faalavelave faapenei, ma ua ia mana’o e loka lona to’alua (le na molia), ina ia a’oa’i ai.

Sa faamatalaina e le tina na a’afia e faapea, o lona fo’i atu i le aiga mai i le faletupe, sa ia va’aia ai lona to’alua (le na molia) o savali atu agai i lana taavale, ma tatala le faitoto’a i le itu avetaavale, ma palauvale atu ia te ia, ma fai atu, o le a ia (le na molia) fasiotia o ia (tina na a’afia).  Ma sa toeititi lava ona ta o ia e lona to’alua (le na molia) i se pate pesipolo.

O lea, na tago atu ai le tina ma toe tapuni mai le faitoto’a o lana taavale, ma faasasa’o atu loa i le ofisa a leoleo.  Ae tago lona to’alua (le na molia) ma tu’i le fa’amalama o le taavale, i tua tonu o ia.  Ma sa va’aia foi e le tina le mulimuli atu o lona to’alua (le na molia) ia te ia, i le ofisa a leoleo.

E leai ni manu’a na va’aia i le tina.

E $2,000 se vaegatupe na fa’atulagaina, e mafai ona toe tatalaina ai i tua le na molia, mai i le falepuipui, e faatalitali ai lona faamasinoga.

MOLIA SE ALII I LE FA’AO’OLIMA I SE TAMA MATUA

O le aoauli o le aso 26 o Me, 2025, na fa’afeso’ota’i ai e se tina matua ia le Ofisa a Leoleo i Fagaitua ma ripotia se alii, na sauaina lona to’alua.

O se taimi mulimuli ane, na ave faapagotaina ai e leoleo ia Utusia Iuta ma molia i lenei fa’alavelave.  O ona moliaga na aofia ai:

Faitauga 1 – Vevesi i totonu o le aiga – O se vaega ‘C’ i solitulafono mama, e mafai ona nofosala ai i le falepuipui i aso e 15, po o se sala tupe e $300; po o faasalaga uma e lua.

Faitauga 2 – Fa’ao’olima i lona tulaga e tolu – O se vaega ‘A’ i solitulafono mama, e mafai ona nofosala ai i le falepuipui, e o’o atu i le tausaga atoa, po o se sala tupe e $300; po o faasalaga uma e lua.

Faitauga 3 -  Sauaina o se tagata matua – O se vaega ‘C’ i solitulafono mamafa, e mafai ona nofosala ai i le falepuipui, e o’o atu i tausaga e fitu, po o se sala tupe e le silia ma le $5,000; po o faasalaga uma e lua.

E tusa ai ma le ripoti a le tina matua na vala’au atu i le ofisa a leoleo, sa fa’aaogaina e Utusia se nofoa e ta ai le ulu a lona to’alua (le tama matua na a’afia).

E taunu’u leoleo i le nofoaga sa tupu ai le fa’alavelave, o iai se tama matua o lo’o tau to’oto’o lona mata taumatau, o lo’o tafe mai ai le toto.  Ae o lo’o tu tu mai le tama matua na a’afia ma se alii, e foliga mai i o lo’o susu uma.

Na faapea loa ona fa’afeso’ota’i e se tasi o sui malu o le malo ia le vaega a le EMS i le ofisa a leoleo i Fagatua, mo se fesoasoani.

O se taimi mulimuli ane, sa faapea ona nofo malamalama leoleo, i le alii lea na tu i tafatafa o le tama matua na a’afia, o Utusia, lea na i’u ina molia i lenei fa’alavelave.  Sa faapea loa ona ta’ita’I’eseina atu o ia e leoleo aga’i i lona fale, lea e tuaoi ma le fale o le tama matua na a’afia.

Sa lagona e leoleo le tomumu o le na molia ma i ana gaioiga i lea aso, na fa’ailoa mai ai le leai o sona salamo i lona sauaina o le tama matua.

Na faapea ona agai atu le tama matua na a’afia, ma lona to’alua i le ofisa a leoleo ae sa aveina atu le na molia, i le taavale a leoleo.

Ina ua taunu’u le tama matua na a’afia i le ofisa a leoleo, sa faapea ona faatinoina loa le auaunaga a le vaega o le EMT.

I le faamatalaga a le tama matua na a’afia, sa ia tu’uina ia Utusia (le na molia) ia se fagu pa’u suau’u, i le vaiaso na tuanai ma sa mana’o le tama matua e toe fa’afo’i atu.  Ae na alu atu le na molia i le fale o le tama matua, e talanoa e uiga i le fagu suau’u.  Ma sa ta’ua e le tama matua lona va’aia o uiga le fiafia o le na molia, o lea na ia (tama matua) fautuaina ai le na molia, e nofo i lalo e la te talanoa.

Ae peitai, sa oso le ita o le na molia ma otegia o ia (tama matua na a’afia) ma lu’i o ia la te fufusu.

Sa ta’ua foi e le tama matua na a’afia, le palauvale atu o Utusia (le na molia) ma taumafai e ta o ia i se nofo.  Sa tali atu ia le tama matua ia Utusia (le na molia) e pule lava o ia.  Ma o lea na tago atu ai le na molia ma u’u mai se nofoa uga ma sasau atu i le tama matua, ma tau ai le nofoa i ona foliga.

Sa fa’amatala foi e le tama matua ia lona taumafai e pupuni ona foliga ae peitai, sa malosi le sasau a Utusia ma sa le gata ina tau le nofoa i ona foliga, ae na lelea ese atu le nofoa ma pa’u atu i tua.  Na ta’ua e le tama matua lona matapogia ma pa’u i lalo, ma sa ia taumafai e toe tu mai i luga ae na to pa’u i lalo.

Ma sa ia fa’alogoina le ‘e’e ma le palauvale atu a Utusia (le na molia) i lona to’alua (le tina matua lea na valaau i leoleo) ma fa’atonu le tina matua e tapuni lona gutu.

Ina ua savali ‘ese atu le na molia, sa tago le tama matua i ona foliga ma va’aia ai le tafe mai o le toto i lona mata taumatau.  Na savali atu le tama matua ia Utusia (le na molia) ma faatonu o ia e togafiti lona (tama matua) mata ae na te le’i valaau i leoleo.  

Ae sa tali mai le na molia, e valaau leoleo, e le popole iai.  Na faapea loa ona vala’au e le tina matua ia le ofisa a leoleo.

E $5,000 se vaegatupe na fa’atulagaina e mafai ona toe tatalaina ai i tua le na molia, mai i le falepuipui, e faatalitali ai lona faamasinoga.