TALA I VAIFANUA

Pago Pago - AMERIKA SAMOA

FA’ATALANOAGA A LE DOH MA VAEGA FA’ASASALAU I LE PEPESI O LE FA’AMA’I O LE ‘DENGUE FEVER’

I se fa’aaliga fa’alauaitele a le Afioga i le Kovana Pulaali’i N. Pula, ua aloaia ai le iai o Amerika Samoa i lalo o se Faalavelave Fa’afuase’i Fa’aleSoifua Maloloina, ma ua fa’amaonia ai le pepesi o le gasegase o le ‘dengue fever’ i totonu o le teritori.

E tusa ai ma le fa’aaliga mo fa’alavelave fa’afuasei, e pei ona aloaia i le aso Lua o le vaiaso ua mavae, Iulai 8, 2025, ua fa’amaonia ai e le Ofisa o le Soifua Maloloina, le a’afia o nisi o le atunu’u e to’aono, talu mai le aso Gafua, Iulai 7, 2025.  Mai lea to’avalu, e to’afa i latou sa asiasi atu i Samoa.  Ae o leisi to’alua, sa a’afia lava i totonu o le teritori.

O le to’atolu o nei gasegase, o ni fanau iti.  Ma o lo’o feagai le Ofisa o le Soifua Maloloina ma ni su’esu’ega, e fa’amautu ai le ituaiga vairusi o le ‘dengue’ ua a’afia ai le teritori.

I le taimi nei, o lo’o faapea ona toe fa’amalosia ia tiute a le Ofisa o le Soifua Maloloina i malae vaalele, i le fa’amaumauina o suafa o pasese malaga mai, ma le fuainumera o le malu po o le vevela o tino, e su’esu’e ai po o a’afia i lenei gasegase.

Ma ua iai foi ni ufi foliga, e mafai ona fa’aaogaina e so’o se tasi, e mana’omia.

O le aso Lua foi lea na taloina ai e le Ofisa ole Soifua Maloloina ia se fonotaga ma sui o vaega fa’asalalau, mo le fa’asalalauina aloa’ia o le pepesi o le faama’i (dengue fever) i totonu o Amerika Samoa.

O lea feiloaiga sa faapea ona faasalalauina i luga o upega tafa’ilagi ma sa faapea ona folasia ai e sui o vaega ‘ese’ese a le ofisa a le soifua maloloina, a latou gaioiga o faataunu’uina, e tineia ai le pepesi atili o le ‘dengue fever’, na aofia ai ma auala o lo’o faao’oina atu ai nei mataupu i le mamalu lautele, aua lo latou nofo malamalama.

Na auai ai foi i lea fonotaga ia le susuga ia Adam Konrote, ma o ia o se tagata e suesueina ia le a’afiaga o tagata i ituaiga gasegase ‘ese’ese, ma ona mafua’aga.  Ma e pei ona sa ia fa’aleoina i lea aso, auga o lenei fa’ama’i, e aofia ai fiva maualuga, tino gagase, o mageso, fa’afaufau ma ulu tiga ma e ono o’o atu ai i tulaga tuga.

Ma sa ta’ua e Konrote ona o lenei fa’ama’i e mafua ona pepesi ona o namu, e pau le ala sili e mafai ona tineia pe taofia ai le pepesi, o le tineia o namu. 

Sa ia ta’ua le amataina o ni galuega a le Ofisa o le Soifua Maloloina, i le tafanaina o maota ma laoa, o gasegase ua a’afia i le dengue ma soso’o ai ma falema’i tua ma le falemai autu i Faga’alu, o a’oga ma nofoaga o iai ‘daycare’, a fanau iti.

Na fa’aleoina e Konrote le taua o le galulue faatasi o le atunu’u atoa ina ia fa’atama’ia nofoaga o fofoa ai namu.  Ma o se tasi o su’esu’ega o lo’o latou faataunuuina, o le sailia lea po o le a le umi na pepesi ai lenei faama’i i totonu o le teritori.

Sa ia fautuaina ia le mamalu o le atunu’u ina ia tapena faalelei ia fanua ma fafo o maota ma laoa, e ala i le ave’esea o lapisi e mafai ona tumu i vai, o nofoaga ia e fofoa ai namu.  Faapea ma le fa’aaogaina o mea tuli namu ma le la’eiina o ofu lima u’umi.

FILIFILIA SE FA’ATONUSILI FOU A LE DMWR

Ua filifilia e le Afioga i le Kovana Pulaalii Nikolao Pula, ia le susuga ia Nathan Ilaoa, e avea ma Faatonusili o le Matagaluega o Alagamanuia o le Sami ma le Vaomatua.

I lana fa’aaliga, sa faapea ona fa’amamafaina ai e le kovana ia e agava’a o Nathan i mataupu tau i alagamanuia mo faigafaiva, ma sa avea o ia (Nathan) ma sui lotoifale, a le Komiti e pulea faigafaiva i le Pasefika i Sisifo (WPRFMC-Western Pacific Regional Fishery Management Council)

O ona tiute na aofia ai lona atina’eina ma le fa’atinoina o galuega e pulea ia faigafaiva ma sa avea foi le susuga ia Ilaoa ma sui Taitaifono o le Komiti Faufautua a Amerika Samoa, e gafa ma le mataituina o tulafono lotoifale mo faigafaiva.

E le gata i lea, ua tele foi ni agava’a o le Faatonu fa’aolioli, mai i lana galuega i le Ofisa o Tamaoaiga faapea le Ofisa mo le puipuiga o le siosiomaga.

Faatasi ai ma lona tomai i le avea ai o ia ma pule o se fale’aiga, ua fa’aagava’aina ai o ia i auala e sailia ai vaegatupe mo le fa’atupeina o poloketi eseese. 

O lo’o ua avea nei Nathan ma fa’auluuluga o le ofisa o poloketi mo le vaega ale Le Vasa Pathways, o se faalapotopotoga ua tu’utoina o latou taimi ma taleni i le tausiga o le sami ma ona alagamanuia.

O le susuga ia Ilaoa, o le lona tolu ai lea o tagata ua filifilia e avea ma Faatonusili o le DMWR.  Sa ulua’i filifilia ia le alii faipisinisi o Tim Jones, ae peitai, e le’i paisa o ia e le Maota o Sui.  Ona filifilia ai lea o Natasha Tuatoo-Bartley ia Fepuari.