O LE AVE PASI A’OGA

Vaega e 14

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 14.

***********************************************

Ua aveina atu nei le tamaitai o Epi i le falepuipui e faatalitali ai lona faamasinoga.  Ma a’o ia nofonofo i totonu o lona sela, sa toe tomanatu le tamaitai i le amataga mai o lona aso, se’ia o’o mai i le taimi na ia so’aina ai le alii ave pasi a’oga. 

Ia se’i tu’u ai iina ia le tamaitai o Epi, ae tatou toe liliu atu i le pasi a’oga.

Ina ua tupu le fa’alavelave, o le taimi lea sa fa’atonu ai e le ali’i inisinia ia tamaiti a’oga uma sa i luga o le pasi, ina ia o mai uma i lalo.  Ma ia ta’ita’iina atu ai loa ia tamaiti a’oga i se nofoaga e tau mamao teisi ma le alatele ma fa’atonuina ia tamaiti a’oga uma, e nonofo iina, ma ia aua ne’i alu ‘ese seisi.

Ma o iina la sa nonofo ai tamaiti a’oga ma o latou matamata atu i luga o le alatele ma le latou pasi lea o lo’o galulue mai ai le alii ave pasi o Filipo ma le inisnia.

Na iloa mamao atu lava e tamaiti a’oga ia le masau mai o le taavale a le teine o Epi, agai mai i le latou pasi.  Ma sa taumafai ia nisi o tamaiti a’oga e vala’au atu ia Filipo ma le alii inisinia, e fa’ailoa atu iai le taavale a Epi lea e foliga mai o lo’o sau sa’o lava i le pasi a’oga.

Ae paga lea, ai ona o le tele o le pa’o i luga o le alatele, sa le’i ano mai lava iai le alii ave pasi o Filipo ma le inisinia, i le tauvala’au atu a tamaiti.

I se taimi mulimuli ane, sa faamatala e se tasi o tamaititi aoga e faapea, na pei o se ata ‘slow motion’ le mea sa tupu.  I le latou va’aia o le savali fa’ata’amilo mai i le pito i tua o le pasi, ia le alii inisinia ma mauu i lalo o le pasi.

Ae o le taimi lena, o lo’o tu pea ia Filipo i le itu o le pasi e latalata i le alatele.

Atonu o se fa’amanuiaga le le va’ai tonu o amaiti a’oga i le taimi na so’aina ai e le taavale a Epi ia le alii ave pasi a’oga.  Ae na o le pau le mea sa lagona e tamaiti a’oga, o le pa’o, i le taimi na so’a ai e Epi ia Filipo.

[E FAIA PEA]