POU TIUTE A LEOLEO

Pago Pago - AMERIKA SAMOA

PU’EINA LE PAGOTA NA SOLA I LE ASO SA O TAMA

O le aso Sa tonu lava sa fa’amamaluina ai le Aso Sa mo Tama, na sola ‘ese mai ai i le falepuipui i Tafuna ia le alii pagota o Deion White, ae o ni nai vaiaso na soso’o ai, sa toe maua ai o ia e leoleo, ma toe lokaina ai o ia.

O se faamatalaga mai i leoleo a le falepuipui, sa ta’ua ai le pe’a o Deion i luga o le pa sima lea o lo’o siomia ai le falepuipui ma mafai ai ona sola agai i le togavao lea e latalata atu i le falepuipui.  Ma o iina na fa’afaigata ai ona toe maua o ia.

Ina ua atoa ni nai vaiaso, e le’i toe maua Deion, sa faapea loa ona a’apa atu le ofisa a leoleo, i le mamalu lautele, mo se fesoasoani i le atu sailiga o le alii pagota.

Ma e tusa ai ma le faamatalaga a le leoleo a le falepuipui, na toe mauaina ia le alii pagota, i se nofoaga i le eria o Tafuna.

E tusa ai ma fa’amaumauga a le Samoa News, o Deion sa molia i le 2021 i moliaga o le faomea ma le fa’ao’olima, i se fa’alavelave na tula’i mai i le afioaga o Nu’uuli.  Ma o le mafua’aga lea na fa’apopoleina ai le ofisa malu a le malo, ona o ni a’afiaga e ono tula’i mai, a’o ia taumafai e ‘alo mai i leoleo i lana sola’aga.

MOLIA NI ALII SE TO’ALUA I LE SOLIVALEINA O FANUA A SE AIGA

O le po o Me 20, 2025, na taunu’u ai se vala’au i le Ofisa a Leoleo i Tafuna, mai i se tina sa manaomia se fesoasoani, ona o ni alii se to’alua na solivaleina o latou laufanua, e aunoa ma se fa’atagana.

O susuga ia Schcymindaran Naidu ma Taula Tamati sa faapea ona moliaina ona o lenei mataupu.  O la moliaga, na aofia ai le Solivale o laufanua, o se vaega ‘B’ i solitulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

E taunu’u leoleo i le nofoaga na tupu ai le faalavelave, ua toatele ni tagata ua potopoto mai i le fanua ma sa feosofi i fafo leoleo mai i le taavale a leoleo, e taumafai e tu’u ‘ese’ese ia tagata  le aiga ma le alii o Taula (lea na molia).  

Ona o le taimi lea, o lo’o saofa’i ia Taula i luga o le vao, ae ua manu’a lona ulu.  Sa faapea loa ona tu’uina o ia e leoleo i totonu o le taavale, e puipui ai o ia.  Ae agai atu e talatalanoa ma le tina na vala’au atu i le ofisa a leoleo.

Sa faamatalaina e le tina lo latou ripotia o le gaoia o fua o a latou fa’atoaga mai i le latou fanua.  Ma sa fa’ailoa atu e a latou tuaoi, o i la’ua ia (Schcymindarama Taula) o lo’o gaoia a latou fua o fa’atoaga.  Ae o lo’o siomia lo latou fanua i se pa ma saini, e fa’asa ai ona sopoia lo latou fanua.

Ae o le po lea, na vala’au atu ai lana fanau ma ona tuaoi, e fa’ailoa atu le iai o se pikiapu o lo’o paka i luga o le fanua.  Ma o Schcymindaran sa fa’afoeina le taavale, ae o Taula sa nofo i le nofoa pasese.

Ma e tusa ai ma faamaumauga a le malo, sa taofiofi e le fanau a le tina na a’afia, ia Schcymindaran ma Taula, se’ia o’o atu leoleo ma aveina i la’ua i le Ofisa a Leoleo i Tafuna, ae lokaina le la ta’avale.  Na logoina foi le vaega o le EMS mo le togafitia o le ulu a Taula, lea na o’o ina aveina o ia i le falema’i i Faga’alu mo nisi togafitiga.

Sa lokaina i la’ua uma i le to’ese i Tafuna ma molia i le solivaleina o le fanua a le tina na a’afia.  Ae o lo’o masalomia foi i la’ua, i le gaoia o ni fua o faatoaga mai i seisi fa’ato’aga, e tusa ai ma fa’amaumauga a le malo.

E ta’i $500 ia vaegatupe sa faatulagaina e tatalaina ai i la’ua ua molia, a’o fa’agasolo a la mataupu i luma o le faamasinoga.