POU TIUTE A LEOLEO

Pago Pago - AMERIKA SAMOA

TULILOA E LEOLEO MA SE TAMAITAI IA SE TELEFONI NA GAOIA MAI I LE FALEMA’I

O le taeao o le aso 17 o Me, 2025, na o’o atu ai se valaau i le Ofisa a Leoleo i Fagatogo mai i tamaitai, o lo’o tausima’i i se tasi o lona aiga, i le maota gasegase a le LBJ, e faapea, na gaoia lana telefoni a’o faia se la malologa ma lana ma’i.

E tusa ai ma fa’amaumauga a le faamasinoga, sa ta’ua e le tamaitai na valaau atu i le ofisa a leoleo, le gaoia o lana telefoni (iPhone 12 Pro Max), mai i luga o le laulau i tafatafa o le moega, a’o faia sana malologa i totonu o le potu falemai.

Ina ua taunu’u leoleo i le falemai, sa fa’asino iai e le tamaitai na gaoia lana telefoni, ia le potu sa o la iai ma lana ma’i.  Ma na fa’amalamalama e le tamaitai i leoleo, e pe na’o sina 2-3 minute, na o la momoe ai ma lana ma’i, ae ona te’i ifo i luga, ua leai se telefoni mai luga o le laulau.

Sa ta’ua e le tamaitai lona sailia o lana telefoni, e ala i le fa’aaogaina o se polokalama i totonu o le telefoni, ma sa va’aia ai le o’o o lana telefoni i le falemeli i Fagatogo

Na faapea ona agai atu leoleo ma le tamaitai, i le nofoaga o lo’o fa’aali mai ua o’o iai lana telefoni.  Ae peitai, e o’o atu, ua toe agai lana telefoni i Faga’alu, e latalata i Gataivai.  Ma i’u ai lava ina le toe iloa atu le telefoni, ona e foliga mai ua tape e le tagata na gaoia le telefoni, ia le polokalama, lea e mafai ai ona maua le telefoni.

Na faapea loa ona agai atu leoleo ma le tamaitai e ana le telefoni na gaoia, i le ofisa a leoleo mo le faia o se ripoti e tusa ai ma lenei fa’alavelave.  A’o iai le tamaitai i le ofisa a leoleo, sa faapea ona ia toe maua se fa’ailo i luga o lana ‘iPad’, o lana telefoni la ua o’o atu i Nu’uuli i tafatafa o le CBT ma le Laufou.

Sa manatua e leoleo, o lo’o iai se faleoloa e ta’ua o le IFIX i tafatafa o le nofoaga ua o’o iai le telefoni, sa faapea loa ona o latou vala’au atu iai.  O lea faleoloa, e latou te lipeaina ma toe fa’atau telefoni tuai.  Ma sa faamatalaina e le faatau oloa, i leoleo, lona te’ena o se alii na alu atu ma se telefoni ma taumafai e faatau atu i le latou faleoloa.

E tusa ai ma le fa’amalamalamaga a le tamaitai faatauoloa a le IFIX, ina ua na va’ai atu i le ata o se ulugalii i luga o le telefoni lea na alu atu ma le na molia, sa ia pu’eina loa le ata o le na molia ma tete’e le faatauina o le telefoni.

Sa mauaina e leoleo ia le ata vitio sa pu’eina i le masini pu’e ata a le faleoloa ma na va’aia ai le fafagaina e le tamaitai faatau oloa o le ma’a a le telefoni, ma ina ua ola mai le telefoni, na mafai ona iloa atu ai le ata o le ulugalii o lo’o i luga o le telefoni.

Na fa’amaonia e le tamaitai e ana le telefoni, o lana telefoni lea ma ia fa’aali atu i leoleo le ata lava lea e tasi o lo’o ia teuina.

Faatasi ai ma le faamatalaga a le fa’atauoloa e uiga i foliga ma la’ei o le na molia, sa faapea loa ona toe agai atu leoleo, e tuliloaina le telefoni ma o’o atu ai le tuliga i le Kolisi (ASCC) i Malaeimi, i seisi foi fale telefoni.

Ma sa fa’aali atu iai e leoleo i fa’atau oloa o lea fale telefoni, ia le ata o le na molia, ma sa fa’amaonia e faatau oloa le o’o atu o lenei alii i le latou faleoloa, ae e le’i umi na iai, ae toe alu ese atu.

A’o fa’aauau pea su’esu’ega a leoleo, sa maua mai se tala i se tasi o leoleo, e le’i faigaluega i lea aso, e na te iloa le tagata o lo’o tau saili e leoleo, ona e ave fa’atasi a la vasega, ma le nofoaga o lo’o fa’amautu ai.

Sa faapea ona agai atu loa leoleo i le afioaga o le na molia ma na fa’asino ifo iai e se tasi o le nu’u, ia le fale o lona tina.  Ae peitai, sa le’i mauaina atu le tina i le fale.  Ma sa faapea ona vala’au atu iai leoleo i le tina, i luga o le telefoni, e tusa ai ma lenei fa’alavelave.

Na fa’ailoa mai e le tina, o lona alo, le alii o Mata’i Tuaato, e le o toe nofo i le latou fale, ua mae’a ona fai lona to’alua ma e ese le nu’u o lo’o la fa’amautu ai.

O su’esu’ega i luga o Api o Foliga (Facebook) sa faamautuina ai e leoleo, o le alii o Mata’i, o ia lva lea e tasi na pu’eina i luga o CCTV a faleoloa na alu iai.  Ma sa ta’ua e le tamaitai e ana le telefoni, o le tau aofa’i o lana telefoni, e $1,500.

O se taimi mulimuli ane, na molia ai Mata’i le moliaga o le Gaoi, o se vaega ‘C’ i solitulafono mamafa, e mafai ona nofosala ai i le falepuipui, e le sili atu ma le fitu tausaga; po o se sala tupe, i le va o le $5,000 ma le $20,000; po o faasalaga uma e lua. 

E leai se vaegatupe na fa’atulagaina, e mafai ona tatalaina ai le na molia, a’o faagasolo lona faamasinoga.

MOLIMAU LE TOEAINA NA FAALEAGA E LONA ATALII LE LATOU FALE

O le aso 18 o Me 2025, na fa’afeso’ota’i ai e se tama ia le Ofisa a Leoleo i Fagatogo, mo se fesoasoani, ona o lona atalii, o lo’o faaleagaina meatotino i le latou fale, ina ua taofia o ia mai i le moaina o le vao, i le aso Sa.

E tusa ai ma fa’amaumauga a le fa’amasinoga, o le ripoti a le tama na vala’au atu i le Ofisa a Leoleo, e fai o le le usiusita’i o lona atalii, le alii o Anthony Noa, ae sa faapea foi ona fa’aleagaina meatotino i totonu o le latou fale.

A’o agai atu leoleo i le fale sa tupu ai le fa’alavelave, sa va’aia ia Anthony, o savali mai i luga o le alatele, e lata i le latou nu’u.  Sa afe iai le ta’avale a leoleo, ma o atu iai leoleo, ae sa le usita’ia e Anthony ia faatonuga a leoleo.

O lea na ave faapagotaina ai loa o ia, ma tu’uina i totonu o le taavale a leoleo.

Ina ua taunu’u leoleo i le fale o le aiga na tupu ai le faalavelave, sa mua’i faatalanoaina le tama lea na vala’au mai i le ofisa a leoleo.  Ma sa faaleoina e le tama lona fa’atonuina o lona atalii, e aua le moaina le vao i le aso Sa. 

Ae peitai, sa le’i usitai Anthony ma amata ai loa ona ia faapisa i totonu o le latou fale, na aofia ai ma le fa’aleagaina o meafale.

Na aveina atu loa e leoleo ia Anthony i le ofisa a leoleo i Leone mo le su’esu’eina.  Mulimuli ane, sa faapea ona lokaina o ia i le to’ese i Tafuna.

O ona moliaga, na aofia ai le Faatupu Vevesi i totonu o lona aiga, faapea ai ma le Faaleagaina o meatotino i totonu o le fale, i lona tulaga e tolu.  Ma le moliaga lona tolu, o le tete’e i leoleo a’o latou taumafai e ave faapagotaina o ia.

O le moliaga o le faatupu vevesi, o se vaega ‘C’ i solitulafono mama, e mafai ona nofosala ai i le to’ese, e o’o atu i aso e 15; po o se sala tupe e $300; po o faasalaga uma e lua.

O le moliaga o le faaleagaina o meatotino, o se vaega ‘B’ i soiltulafono mama, e mafai ona nofosala ai i le falepuipui, e o’o atu i le ono masina, po o se sala tupe e $500; po o faasalaga uma e lua.

Ma le moliaga o le tete’e i leoleo, o se vaega ‘A’ i solitulafono mama, e mafai ona nofosala ai i le falepuipui, e o’o atu i le tasi tausaga; po o se sala tupe e $1,000; po o faasalaga uma e lua.

E leai se tupe na fa’atulagaina e mafai ona tatalaina ai le na molia, a’o fa’agasolo lona faamasinoga.

FAASALA PULE O SE FALEAIGA I OAHU E TOTOGIA SILIA MA LE $3 MILIONA

I se ripoti mai i Honolulu, Hawaii, ua faasalaina ai e le faamasinoga, ia se alii mau’oa Iapani, lea e pulea se fale’aiga fou, ia lona totogia o se aofaiga e $3.15 miliona, i se tasi o ana tagata faigaluega.

O lenei fa’alavelave, o lo’o aofia ai le alii o Kazumoto Robert Hori, lea e pulea le fale’aiga o le Margotto ma se alii e 22 tausaga, o James DiPasquale, lea na galue o se kuka fesoasoani, i totonu o le fale’aiga.

Sa ta’ua e le loia a DiPasquale, e lata i le lua ma afa masina, a’o galuega DiPasquale ia Hori, sa feagai ai DiPasquale ma sauaga.  Ma na amata mai lava i le uluai vaiaso na galue ai DiPasquale i le faleaiga.

Na ta’ua e DiPasquale, o nei sauaga na aofia ai le tu’iina o ona foliga, o lona manava, o le takikiina o ona suilapalapa ma ona vae.  Ma e tupu i taimi uma, i luma o tagata e agai atu i le fale’aiga e taumamafa ai.

Ae peitai, sa finau mai le itu a le malo, o nei sauaga, sa faia e le alii kuka o Yohei Yagishita.  

I se tasi o molimau a DiPasquale, sa ia ta’ua ai le fa’aaogaina o se tui ma manu’a ai, i luma o tagata fa’atau.  O le aso Kerisimasi 2023, e tusa ai ma le molimau a le itu tagi, ona o le tuga o ona manu’a, sa le mafai ai ona faigaluega.

I le fa’ai’uga a le faamasinoga, sa faapea ona lagolagoina ai le itu tagi, ma ioeina ai le le amana’ia e Hori o sauaga o lo’o tutupu ia DiPasquale.  Aua e pei ona sa ta’ua e le loia a DiPasquale, sa va’ai tino Hori i sauaga na o’o ia DiPasquale.  Ae peitai, na ta’ua e le molimau a DiPasquale, ua fa’amuamua e le alii pule ia ana tupe maua, i lo le puipuiga o DiPasquale.

Sa ta’ua foi e DiPasquale la faapea atu o le alii pule ia te ia, i le lua ma le afa masina na galue ai, o le a fa’ate’a le alii kuka.  Ae peitai, sa tumau pea ona galue le alii kuka se’ia o’o lava ina fa’aulu le tagi a DiPasquale.

I se faamatalaga a le loia a le alii pule, o Hori, i le vaega fa’asalalau a Hawaii News Now, i le taeao ananafi, sa ia ta’ua ai le agaga fa’anoanoa o le susuga ia Hori ma le aufaigaluega a le Margotto Hawaii, ona o le fa’ai’uga a le faamasinoga ma o lo’o iai so latou talitonuga, e le o gatasi ia le faai’uga ma molimau na folasia i totonu o le faamasinoga.

Aemaise ai, o le tele o tu’ua’iga a DiPasquale, e faatatau i le faailoga lanu ma sauaga, sa faapea ona faaleaogaina i se faamasinoga muamua.

Na ta’ua foi e loia a Hori, le fa’aauau pea ona te’ena e le latou itu ia tu’uaiga a DiPasquale ma e le’i o’o atu foi DiPasquale i le pulega, e tusa ai ma nei tu’ua’iga sa faia e faasaga i le alii kuka o Yagishita.

Ma o lo’o iloiloina nei e le itu tete’e leisi a latou la’asaga e tusa ai ma lenei mataupu.  

Na ta’ua e le loia a le Margotto ma Hori, afai na nofo malamalama ia le alii pule e tusa ai ma nei tu’ua’iga, semanu e na te sailia se fofo o le mataupu.