Fa’amanino e Kruse ia aiaiga o ‘waivers’ mo lafoga fa’ae’e

Pago Pago - AMERIKA SAMOA

Ua fa’alauiloa mai e le Tausitupe a le malo o Amerika Samoa, le susuga ia Donald Kruse, le iloiloina o le talosaga mai i le ofisa a le ASSA (American Samoa Shipyard Authority), mo le le totogia e le latou ofisa ia lafoga fa’ae’e i oloa ma sapalai, o lo’o fa’aaogaina e la latou ofisa e toe fa’aleleia ai va’a o lo’o taula i Satala, e pei ona iloiloina isi mataupu tau lafoga, e tusa ai ma ala o le tulafono.

Ae peitai, o lo’o tumau pea le taofi a le alii Tausitupe, i le taofia pea e le Ofisa o Tiute ia le koneteina a le ASSA, se’ia mae’a ona totogia ia lafoga fa’ae’e, ona o lea koneteina, e mo se galuega a le ASPA i Blunts Point, e ese mai galuega o lo’o faia i Satala.

Ma o lea ua talitonu ai Kruse, e tusa ai ma tulafono a le malo o Amerika Samoa, e tatau i le ASSA ona totogi le 8 pasene o lafoga fa’ae’e, e pei lava o isi ofisa ma matagaluega a le malo.

E tele ni imeli i le va o Kruse ma ASSA sa faapea ona folasia e le susuga i le Tausitupe, o lo’o fa’amanino auiliili mai ai, le le agava’a o le ASSA i le ‘tax exemption’ e pei ona o latou talosaga mai, i le mae’a ai ona iloiloina auiliili, o tulafono a le malo o Amerika Samoa, mataupu 16, lea e patino i lafoga mo pisinisi lotoifale.

Ma i na fetusia’iga a Kruse ma Carlos Sanchez, le Faatonusili o le ASSA, ia Iuni 18, 2025, sa faapea ona ioe ai Sanchez, o le a latou totogia ia le uta o lo’o taofia e le Ofisa o Tiute, mo le poloketi a le ASPA i Blunts Point.

Ae o le vaiaso ua tuanai, na ripotia ai e le Samoa News ia se solo tete’e filemu, na faia i luma o le EOB, i Utulei, e le aufaigaluega a le ASSA ma le susuga ia Sanchez.

Ma o lea solo tete’e, e pei ona ta’ua e Sanchez, e tali atu ai i se fa’ai’uga ‘faavalevalea’ ua faia e le Ofisa o Tupe, e fa’amalosia ai se ofisa a le malo, e totogi lafoga.

O le ASSA, e ui ina tuto’atasi, ae e iai sona vaega e i lalo o le pule’aga a le malo o Amerika Samoa.

Ma o la latou solo tete’e na faia, e tali atu ai i le le fa’atagaina e le Ofisa o Tupe, le tatalaina i tua o le latou koneteina, se’ia vagana ua mae’a ona totogi se lafoga fa’ae’e e $30,000 – po o le valu pasene o le tau aofa’i o oloa i totonu o le koneteina.

Ma e pei foi ona ripotia e le sa Samoa News, ua mae’a ona saunoa le susuga i le Tausitupe o le Malo, i le vaega fa’asalalau a le KVZK-TV, ma folasia ai aiaiga mo ofisa uma a le malo, i le totogia o lafoga fa’ae’e mo oloa e auina mai i totonu o le teritori.

Na faapea foi ona fa’amamafaina ai e Kruse, le fa’amalosia o lenei lafoga i ofisa ma matagaluega uma a le malo, ina ia faamautuina ai le le ‘alofia e so’o se ofisa po o matagaluega a le malo, mai i le totogia o nei lafoga.

 Aemaise ai o le aofia ai o ofisa e pei o le ASTCA (ofisa telefoni), o le ASPA (ofisa o vai ma eletise) ma le falema’I, i le totogia o lafoga fa’ae’e.

O tupe aoina mai i nei lafoga, e pei ona ta’ua e le Tausitupe a le malo, e taua tele ona e fa’atupeina ai le tele o auaunaga ma galuega toe fa’aleleia, aua le lelei mo le atunu’u lautele, e aofia ai tautua faalesoifua maloloina, a’oa’oga ma femalaga’iga.

O a lava suiga e faia, e mafai ona faia i se fa’ai’uga mai i le malo, e faatagaina ai ofisa ma matagaluega, ona apalai mo se ‘waiver’, lea e mafai ai ona tatalaina mai ai i tua a latou oloa e taunuu mai i le teritori, ae fa’ato’a totogi mulimuli lafoga fa’ae’e, ia po o le faia foi o se aiaiga, e mafai ai ona fa’amagaloina le totogia o a latou lafoga fa’ae’e.

Ma o le fa’atagaina o lea tulaga, e pei ona fa’amanino mai e Kruse, e pa’u i luga o le Komiti Fa’afoe, o lo’o iai le pule e Iloilo ma pasia ai talosaga ‘ese’ese.  Ma sa fa’amamafaina mai foi e Kruse e faapea, e le na o le Tausitupe to’atasi, o iai lea pule, e pasia pe te’ena ai se talosaga.

O i latou o lo’o i totonu o le Komiti Fa’afoe, e aofia ai le Tausitupe (Donald Kruse), o ia lea o le Taitaifonno, o le sui Taitaifono ia Ruth Matagi,ma le Failautusi ia Toetasi Tuiteleleapaga; faatasi ai ma totino aoao o le komiti, ia Lina Petaia ma Vaitautolu Iaulualo.

O so’o se talosaga mo ‘waivers’, e fa’ao’oina atu uma i lea Komiti Fa’afoe.