E FAI O LENEI AE O LENA

O LE TAMAITITI NA TALI LE ALOFA I LE AFI

I luga o mauga o se atunu’u mamao lava, sa nofo ai se tina nofo fua e igoa ia Mama Utu.  E le o se tina e tele ni ana ‘oa o le lalolagi, ae o se tina sa mau’oa i le alofa ma le agamalu.  E tasi lana ‘oti sa tausi ma sana tama’i fa’ato’aga, e tele ina sulufa’i atu iai le toatele o tagata o le nu’u, pe a fia ‘a’ai.

O se tasi taeao, sa maua atu ai e Mama Utu ia se tamaititi, o moe mai totonu o lana faatoaga.  E masaesae uma ona ofu ae palapala uma ona foliga.

Sa matua’i o’otia le loto o Mama Utu ina ua va’aia foliga o lenei tamaititi ma ia fesili leo lemu atu iai, po o fea e sau ai.  Sa na’o le fa’ataupupula mai o le tamaititi ia Mama Utu, e foliga mai e le malamalama i le fesili.

Ona musumusu mai lea o le tamaititi, o lo’u igoa o Tasi ma e leai so’u aiga.

Ua faapea ona tago atu Mama Utu ma fa’atu mai luga le alii o Tasi ma faapea atu, ia o lou aiga lenei.

Sau aso, alu aso.  Ua liua aso i vaiaso.  

E galue malosi ia le alii o Tasi i le fa’ato’aga, la’u mai fafie mo le afi ma fesoasoani ia Mama Utu e fa’atau fua o faatoaga.  Ua tausi e Mama Utu lenei alii, ua pei lava o sana tama mo’i.

O po uma, e  la te nofonofo i tafatafa o le afi, ona fa’amatala lea iai e Mama Utu ia tala e uiga i le lagi a’o fa’alogologo toto’a le alii o Tasi.

Ae paga lea, ua se’etia le tina o Mama Utu i le malu o le tai taeao.

O se tasi afiafi, a’o alu se as asiasiga a Mama Utu i le nu’u tuaoi, sa va’aia e le alii o Tasi ia se tagata o pasi ifo i le la fale ma sa maitauina e Tasi le taugata o la’ei a lea alii.

Ua iloa mai e le alii faimalaga ia le va’ava’ai atu a Tasi, ona ia afe mai lea ma tapa se ipu vai e inu ai.  Ona faapea atu lea o le alii faimalaga ia Tasi, o oe o se alii atamai tele.  O le a le me aua fa’aalu ai lou taimi taua i le fale o lenei loomatua mativa?  Sau  ta o, e tele atu au tupe ma auro e maua ai.

Ua le mautonu le alii o Tasi ae ua malosi atu lava le tauanau a le alii faimalaga.  Ona manatua lea e Tasi le masaesae o ona la’ei ma le fa’atauemu o tamaiti o le nu’u ia te ia, ma lona nofo i le fale a Mama Utu.

Ua tonu loa ia Tasi, o le a mulimuli i le faimalaga e saili mai ai ni ana tupe ma ‘oa se tele.

E fo’i mai Mama Utu i lea afiafi, ua leai se Tasi i le fale, ua tu’ufua atu le fale. Ae ua alu Tasi ma ave ma le ‘oti ma le afi a Mama Utu.

Ae peitai, sa tutu e Mama Utu se moli matagi, ona tautau lea i fafo o le fale, ina ne’i toe fo’i atu ia le alii o Tasi.

Ae o le alii o Tasi, ua fa’aseseina o ia e le alii faimalaga.  E le o se tagata faatau oloa, o ia o se gaoi.  Ma sa ia fa’ase’eina ia Tasi, e gaoia le ‘oti ma le afi a Mama Utu.  Ma o lana galuega fai, o le alu i lea nu’u ma lea nu’u, ma gaoi ai.

Sa mua’i le fiafia le alii o Tasi, i lona olaga fou.  Ae ua fai ia’I, fai ia’i, ua amata ona fiafia i ana oloa e maua mai i lana gaoi ua fai.

O se tasi aso sa faatonu ai e le alii na o ma Tasi, ia Tasi, e tago e susunu se fale, ae o le a alu e su’e mai ni mea aoga i totonu.  Ua faapea ona fai, ua tago loa Tasi i le susunu ia le fale.

Ae na matua’i fa’ate’ia Tasi, ina ua na tilotilo ma ona ia maitauina le fale lea ua na susunuina. O le manogi o le fale, o fafo o le fale, o le fala masae i tafatafa o le faitoto’a.  Ua faapea ane Tasi ia te ia lava, ou te iloa le fale lea.

E toe manatua ifo e Tasi, o le fale lea a Mama Utu, ae ua tuai, ua mu le fale.  Ua toe tafiti atu nei Tasi e tineia le afi, ae paga lea, ua tuai.  Ina ua liiu mai le alii o Tasi, o le a sola ese, ae ona iloa atu i tua o le fale, o lo’o tu mai ai Mama Utu.

Sa fai sina umi, o tau fai tilotilo leisi i leisi, ua leai seisi e toe ‘emo.  Na va’aia e le alii o Tasi, le leai o se ita i foliga o Mama Utu, leai se inoino,,  po o se foliga o Mama Utu e fa’aali ai lona tu’ua’ia o Tasi i lana mea leaga lea ua fai.

Ae na o le pau foliga na va’aia e Tasi, o foliga o le agaga fa’anoanoa o Mama Utu, a’o ia liliu ‘ese atu ma savali atu aga’i i tua, ae ua tu’u ai pea lona fale, e mu.

Ua tamo’e ‘ese atu ia le alii o Tasi, mai le fale o Mama Utu, mai le nu’u ma le itumalo. 

Ua te’a atu ni nai tausaga.  Ua sui le galuega  a le alii o Tasi.  Ua avea o ia ma se fau fale.  Ua lelei lava lana kamuta, o lana toto la’au ma le ‘eli vai’eli.  Ae peitai, po o le fia ma le fia i fea o fale fou e gaosi e Tasi, sa le mafai ona ave’esea ma lona mafaufau, le fale e tasi lea sa ia susunuina ona o lona mana’o tele.

O se tasi o aso timu, e aunoa ma se tupe i lana taga, se’ia vagana ai se taulima sa ia lalaganaina mo Mama Utu, a’o la nonofo faatasi, na toe fo’i ai le alii o Tasi i le nu’u o iai Mama Utu.

Ua ia va’aia le tele o se suiga i le nu’u.  Ua matutua tamaiti sa o latou talavou fa’atasi, ma ua fai aiga uma.  

Na savali atu Tasi i le nofoaga na iai le fale a Mama Utu, ae ua leai se fale.  Leai se fa’ato’aga.  Leai se umukuka.  Ae na’o le la’au sa totoina e Mama Utu, e fa’amanatu ai le ulua’i aso fanau a le alii o Tasi, sa fa’amanatu i totonu o lona fale.

Ua to’otuli ifo Tasi ma le maligi o ona loimata, i lalo o le la’au, ma nofo faalagolago ai i le la’au.  E le’i umi, ae ona fa’alogoina le savali atu o se tagata.  Na toeititi pe le fatu o Tasi, ina ua va’ai mai, o Mama Utu lea e tau setusetu atu.

Ua lo’omatua ae o lo’o tumau pea le agaalofa i totonu o lana pupula.  Ua tu fa’atopetope a’e i luga Tasi ma taumafai e fai mai sana tala, ae ua leai se leo e lagona.  Na umi se taimi ona faapea atu loa lea o Taai, “Ou te iloa e faigata ona e faamagaloina a’u.”

Ae faapea mai Mama Utu, na ave e le afi lo’u fale, ae e le’i aveina lo’u alofa.

Ua savali atu Mama Utu ma opo atu le alii o Tasi, a’o tagi masusu Tasi i lona salamo i lana mea leaga sa faia i si loomatua.

[IA MANUIA FUAFUAGA UMA O LENEI VAIASO]