Loka se ulugalii i le pisa so’o i totonu o le fale tele a le aiga o le tamaloa

Pago Pago - AMERIKA SAMOA

O le aso 5 o Me, 2025, sa o’o atu ai se valaau i le Ofisa a Leoleo, ona o se ulugalii o lo’o misa i totonu o le fale tele a le aiga o le tamaloa.

O le susuga ia Solofua Mauga, e 32 tausaga ma Natalia Lutu, e 23 tausaga sa avefaapagotaina e leoleo, e tusa ai ma fa’amaumauga a le faamasinoga, ina ua misa, na aofia ia le palauvavale leotele ma le tau’ai solo o meatotino, i totonu o le fale lea o lo’o tu i fanua o le aiga a Solofua.

Ma na ta’ua i fa’amaumauga, ia le kolaina e Natalia o Solofua faapea ma lona (Natalia) tatu’i o ia (Solofua).

Sa aga’i mai le ‘uncle’ a Solofua ma tutuli uma ‘ese la’ua ma Natalia mai totonu o le fale, ae liliu atu Solofua i le palauvale i lona ‘uncle’ faapea lona ‘aunty’.  O lea tulaga sa ripotia e le ‘aunty’ a Solofua.

Na fa’aalia i su’esu’ega a leoleo le tupu so’o o lenei tulaga i le va o la’ua ia, o le misa ma le fa’aleagaina o meatotino i totonu o le fale tele a le aiga lea e nonofo ai.  E le gata i lea, e fa’alavelave ai fo’i a la misaga, i le to’afilemu o tuaoi.

Ina ua taunu’u atu leoleo i le nofoaga na tupu ai le fa’alavelave, sa ta’ua e le ‘au maimoa na iai, ua o ‘ese le ulugalii.  Ma o le mamao o le fale a le ‘uncle’ a Solofua, ma le fale tele, e pe a ma le 10 futu.

E tusa ai ma le faamatalaga a se tasi o molimau, na o latou lagonaina le misa a le ulugalii ma le talepeina o ni meafale ma na agai atu loa iai le ‘uncle’ a Solofua, ma fa’atonu uma la’ua, e o ese ma le fale.

Sa ta’ua e le molimau le tu’ua e Natalia o le fale, a’o fa’aauau pea ona ‘e’e ma palauvale atu iai Solofua.  Ma na i’u ina toe fo’i ifo Natalia i totonu o le fale, ma amata ona tatu’i foliga a Solofua, a’o ia u’uina le kola o le ofu a Solofua.

A’o tuli’esea e le ‘uncle’ a Solofua ia la’ua ma lona to’alua, sa faapea ona lafo mai e Solofua ia ni faamatalaga tau fa’amata’u i lona ‘uncle’, ma faatonu o ia (uncle) e va’ai i lana (Solofua) mea o le a fai ia te ia (uncle), a’o savali ese atu ia Solofua.

Na tu’uina atu e le ‘au molimau i leoleo, ia faamatalaga o foliga ma la’ei a Solofua ma Natalia.

Ma sa mauaina atu i la’ua e leoleo, i se fale faatali pasi, i tafatafa o le faleoloa a Misa, ma ave faapagotaina ai loa i la’ua, ma momoliina atu i le ofisa a leoleo, mo le fa’aauauina o a latou suesuega.

Sa iai foi seisi molimau na fa’atalanoaina e leoleo, ma sa ia faamatalaina lona agai atu i le latou fale ina ua mae’a se latou ta’aloga volipolo, ae na te le’i iloa, o lo’o i le fale ia le ulugalii ua molia.

Ae sa ia (molimau) lagona ia ni leo, sa ia manatu o lo’o pisa mai i le fale a lona ‘uncle’.  Ae ina ua ia o’o atu i le fale tele a le latou aiga, sa ia molimauina ai le tauga’upu a Solofua ma Natalia, se’ia o’o alu atu lona ‘uncle’ ma tutuli ‘ese la’ua.

Ma sa ta’ua foi e le molimau ia le palauvale atu o Solofua i lona ‘uncle’ ma lona ‘aunt’, ma le faia o ni amioga le migao ia i la’ua.

O le faamatalaga a Natalia i leoleo, fai se la tauga’upu ma Solofua, ae aia atu ai lona ‘uncle’.  O le mafua’aga lea o le ita o Solofua ma ia palauvale i lona ‘uncle’.  Sa te’ena foi e Natalia ia ripoti e faapea, na o’o ona lima ia Solofua, pe sa ia fa’aleagaina ni meatotino i totou o le fale.

Ae o Solofua na te’ena le faia o sana faamatalaga ma na faapea ona lokaina uma i la’ua ma Natalia i le to’ese i lea aso, e faatalitali ai o la faamasinoga.

O la moliaga, na aofia ai le Faatupu Vevesi i nofoaga faitele faapea ma le Fa’ao’olima i lona tulaga e tolu.

O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le falepuipui, i le o’o atu i masina e ono, po o se sala tupe e $500; po o faasalaga uma e lua.

O le moliaga o le fa’ao’olima, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

E leai se vaegatupe na fa’atulagaina, e tatala ai i tua ia Solofua, ae o Natalia, e $1,000 sa fa’atulagaina e mafai ona tatalaina ai o ia i tua, e faatalitali ai lona faamasinoga.