Molia se leoleo o le falepuipui ina ua masalomia i lona fesoasoani i pagota e sosola mai i le falepuipui

Pago Pago - AMERIKA SAMOA

Ua molia nei se alii leoleo o le to’ese i Tafuna, ina ua masalomia i lona fesoasoani i ni pagota, e sosola ‘ese mai i le falepuipui.  O le susuga ia Laufau Moliga, ua molia i le faitauga e tasi, o le fesoasoani i le sosola o se pagota, ma o lea moliaga, e mafai ona nofosala ai i le to’ese i le lima tausaga, po o se sala tupe e o’o atu i le $5,000; po o fa’asalaga uma e lua.

E $10,000 se vaegatupe na fa’atulagaina, e mafai ona tatalaina ai Moliga i tua mai i le falepuipui, e faatalitali ai lona faamasinoga.

E tusa ai ma fa’amaumauga a le faamasinoga, o lo’o ta’ua ai le o’o atu o se ripoti i le ofisa a leoleo i le masina o Setema o le tausaga ua mavae, e tusa ai ma le va’aia o ni pagota e suafa ia Sierra Isaia ma Sui Tago, i le Vaitogi ma Iliili.

Na ta’ua i lea ripoti, le feoa’i o nei pagota i se taavale, o lo’o fa’afoeina e se tagata o lo’o la’ei i la’ei leoleo.  

Sa faapea ona fa’asalalauina atu ia faamatalaga e uiga i le taavale ma pagota, i leoleo uma, ina ia nofouta ai leoleo o lo’o i luga o le auala, e tusa ai ma lenei ripoti i ni pagota o lo’o i luga o le alatele.

O le afioaga o Nu’uuli sa maua atu ai e leoleo le ta’avale na ta’ua o lo’o iai pagota, ma sa fa’atuina ma fa’amaonia ai pagota o Sierra Isaia ma Sui Tago, na i totonu o le taavale.  Ae o le aveta’avale, o le susuga i le alii leoleo o le falepuipui, ia Laufau Moliga.

Sa faapea ona ave atu uma ia pagota ma le alii leoleo i le ofisa a leoleo i Tafuna mo le suesueina.  Ma na faapea foi ona logoina le iunite e mataituina mataupu tau i vaega o fualaau faasaina, mo sa latou fesoasoani, ina ua maua ia Tago ia ni vaega o fualaau faasaina.

I le fa’atalatalanoaga o Isaia, e leoleo, sa ia ta’ua ai le fa’atagaina e le sui pule o le falepuipui, le susuga ia Apoga Custodio, ia Moliga, e ave o ia ma Tago, e piki mai se masini vali fale mai i Iliili, ma fesoasoani e vali le fale o Moliga, i Kokoland.

Sa ta’ua e Isaia e faapea, ina ua o latou taunu’u atu i le fale a Custodio i Iliili, na o latou va’aia ua malepe le fale o teu ai meafaigaluega, ma ua ave e le tagata ia le masini vali fale.

Ona o latou o lea e su’e se masini vali  mai i a latou uo.  Ae o le latou fo’i mai i le falepuipui, lea na faatu ai le latou taavale e leoleo i Nu’uuli.

Ina ua fesiligia e leoleo ia Moliga, sa ia ta’ua e faapea, ua mae’a ona ia logoina le pule o le falepuipui, le susuga ia Siaosi Leaea, i le vaiaso ae e le’i malaga ese atu Leaea mo atunu’u i fafo.  Ma sa fa’ailoa atu ai e Moliga i le alii pule, le manaomia o ni pagota e fesoasoani i le valiina o lona fale.

Na ta’ua e Moliga, le tu’uina mai o le fa’atagana a Leaea, e na te aveina ni pagota e fesoasoani i lana galuega.

Ae peitai, sa ta’ua e Moliga, na le’i mafai ona faia lana galuega i le vaiaso lea, ona o le tulaga faaletonu o le tala o le tau.  Ae o lona aso malolo mai i le galuega, sa ia talosagaina ai le sui pule o le falepuipui, ia Apoga Custodio, mo lona aveina o ni pagota e fesoasoani i lana galuega i le fale, lea na ioeina e Custodio.