Fa’ato’ese Komesina a Leoleo i le lokaina sese o se alii Vaitogi

Pago Pago - AMERIKA SAMOA

Sa fa’asalalauina i luga o le televise lotoifale, ia se fa’ato’esega a le susuga ia Ta’aga Saite Moliga, le Komesina o le Ofisa a Leoleo, e tusa ai ma le lokaina sese o se alii talavou mai i le afioaga o Vaitogi, i le amataga o le masina.

Na fa’aleoina e le susuga ia Ta’aga lona agaga faanoanoa ona o lenei mea sa tupu, ma ia aloa’ia ai a’afiaga na o’o i le alii talavou na a’afia faapea ma le mamalu lautele.

Sa saunoa Ta’aga, o le fa’amautuina o le faamasinoga tonu ma ia aua ne’i toe tupu ia nei sasi, o se tulaga ua o latou tu’uto e faia ai ni iloiloga ma su’esu’ega, e saili ai pe na faapefea ona tula’i mai lenei faalavelave.

I le fa’atalanoaga i luga o le KVZK-TV, sa toe fofolaina mai ai e Ta’aga ia se fa’afitauli, na a’afia ai se alii talavou na masalomia sese, o le tagata lea na faatupuina le faalavelave.

Ma sa tula’i mai lenei sasi, ina ua agai atu se leoleo e tali se valaau, e tusa ai ma le fa’alavelave i Vaitogi, ma na masalomia ai e le leoleo, ia le na alii talavou na loka sese, o ia lea sa tau’aia le ta’avale a leoleo, i ma’a, lea na lavea ai ma se leoleo.

Ae ina mae’a su’esu’ega sa faia, sa manino mai ai, le le’i a’afia o lenei alii talavou.  Ma na faapea lea ona toe tatalaina o ia mai lalo o le va’ava’aiga a leoleo.  Ma e fa’amautu ai le taua tele o iloiloga lelei, e faia e vasega a leoleo.

Ua fa’amautuina mai e le alii Komesina, i le mamalu o le atunu’u, a mae’a ia se su’esu’ega lotoifale a le ofisa a leoleo, o le a faapea loa ona fa’atino gaioiga ua alagatatau, i leoleo o lo’o a’afia i lenei mataupu.

E tusa ai ma le saunoaga a le alii Komesina, o le a faapea ona Iloilo uma itu ma vaega o lenei mataupu, e aofia ai faamatalaga a molimau, o ata pu’eina i masina pu’eata a leoleo ma tulafono i totonu o le ofisa a leoleo.

Afai ae mafai ona fa’amaonia le solia o ni tulafono, o le a faapea ona faia fa’asalaga tonu ma le sa’o.