O LE AVE PASI A’OGA

Vaega e 10

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. 

E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa mo le fa’aauauina  o le tatou Fagogo, “O LE AVE PASI A’OGA” i lona vaega e 10.

************************************************

Ua oso i fafo le alii ave pasi o Paulo e saili le mafua’aga ua alu tautevateva ai le pasi, ae ua toeititi lava ‘ai lana ‘plan’ sa fai.

“O le a lau mea ua fai?” o le vala’au mai lea o le alii a’oga o Simeona, mai totonu o le pasi.

“ua pa le pa’u.  Leai se mea o iai.  Nonofo i tou nofoa, aua ne’i sau seisi i fafo ma le pasi, ua outou malamalama?” o le fa’atonuga lea a Paulo i tamaiti a’oga i luga o le pasi.

Ua tau fai lu lu uma ulu o tamaiti a’oga o lo’o i luga o le pasi.

Ae ua na o le tu tu o le alii ave pasi o Paulo ma lu lu lona ulu, i lona va’ai atu, ua matua’i masae lava le pa’u, ua tu mai na’o le u’amea o le pa’u.

O Paulo sa tau tagi, ae ona av’aia loa le sosolo atu o se ta’avale a’oga a le itumalo ma iloa atu e Paulo ia le alii inisinia e gafa ma le va’aia o ta’avale uma a le a’oga.

“Oka, malo lava Paulo.  Na ou va’ai mai lava i lou taumafai e taofiofi le pasi, ina ia aua ne’i lavea, i le taimi na pa ai le pa’u,” o le vala’au mai lea o le alii inisinia ia Paulo.

Ua na o le li li vale o Paulo ma faapea atu, “Ae a fo’i.”

“Ae na fa’afefea ona e vave o’o mai?” o le fesili atu lea a Paulo i le alii inisinia.

“Oi, o la sa ou taumafai e fa’aola le ta’avale a la’u pule, e le mamao mai i le vaega o le auala na pa ai le pa’u o lau pasi a’oga,” o le tali mai lea a le alii inisinia.  “Ou te iloa na e iai le ‘spare’ i lalo o le pasi.  Ae so’u alatu e aumai le siaki la e i totonu o la’u ta’avale, e sui ai le pa’u o lau pasi,” o le tala mai lea a le inisinia ma savali atu i lana pasi.

Ina ua toe fo’i mai le alii inisinia ma le siaki, sa fa’ate’ia Paulo ina ua fesili atu, “Aisea le me aua e oso mai ai i le auala lea, ae e le o se auala lea e te masani ona e ui mai ai’.

[E FAIA PEA]