TALA I VAIFANUA

Pago Pago - AMERIKA SAMOA

OSOFAIGA A LEOLEO NA PU’E AI NI TAGATA SE TO’AONO, MAUA AI TUPE, ‘AISA MA MASINI POKA

O le vaveao o le aso Tofi o le vaiaso ua tuanai, sa fa’atino ai se osofa’iga a le Ofisa a Leoleo, i se faleoloa i Nu’uuli ma lokaina mai ai nit agata se to’aono (na aofia ai ma tagata nu’u o Saina se to’alua), lea ua faia ai nei ni su’esu’ega.

E tusa ai ma se ripoti a le Komesina o Leoleo, le susuga ia Ta’aga Saite Moliga, i le KVZK-TV, sa ia ta’ua ai le fa’amanuiaina o le osofaiga a leoleo ma le taua o lenei osofaiga, i taumafaiga o lo’o faagasolo nei, e fa’asaga tau atu i vaega o fuala’au faasaina ma soligatulafono o lo’o a’afia ai, faapea ai ma ta’aloga poka fa’asolitulafono.

Ae peitai, sa le’i mafai ona fa’asoa atu le alii Komesina i tulaga ma’oti o taumafaiga a le ofisa a leoleo, ona e pei ona sa ia ta’ua, o lo’o fa’aauau pea a latou su’esu’ega.

Sa ia ta’ua le faatinoina e leoleo o se fa’atonuga mai i le faamasinoga, ua toeititi atoa le masina o talosagaina, mo la latou osofa’iga.

 O meatotino sa mafai ona ave’esea mai i le nofoaga na osofa’ia, na aofia ai se vaega tupe o tupe ma vaega o fualaau faasaina (Aisa) ma ni masini poka, le faatulafonoina, e valu.

Ma sa saunoa Ta’aga, o se tulaga ua faapopoleina ai le latou ofisa, ona ua toe va’aaia ia ni masini poka, i totonu o le teritori, aua o nei masini, e le gaosia i totonu o le teritori.  O lona uiga, o lo’o aumaia fa’anana mai i atunu’u i fafo, e aunoa ma le iloa e taitai o le malo.

Sa ia ta’ua foi le a’afiaga o le mamalu lautele, i le iai o nei masini poka, i totonu o le teritori.

O le taeao ananafi, sa fa’atulagaina e tutula’i uma ai i latou e to’aono, i luma o le Fa’amasinoga Fa’aleitumalo, e tali i moliaga, o le aumaia fa’asolitulafono o masini poka faapea ma vaega o fuala’au faasaina, i totonu o le atunu’u.

TU TU FA’ATASI TAITAI O LE MALO E TAOFI LE MAINA INA O OGASAMI A LE TERITORI

Ua fa’alauiloa mai e le Faigamalo a Pula & Pulu, lo latou le ‘auai i le fuafuaga, mo le maina ina po o le eliina o ogasami o lo’o fa’ata’amilo i le teritori, tauala mai lea i sa latou fa’aaliga na pu’eina i se vitio, e le ofisa a le Kovana, i le fa’ai’uga o le vaiaso na se’i mavae atu.

O le susuga ia Don Maifala, lea o lo’o fa’auluulu i le Ofisa o Feso’ota’iga a le malo, sa fofogaina mai lenei fa’aaliga taua.

Sa fa’aalia e Maifala le faia o ni fonotaga i le va o le kovana ma taitai o le nu’u ma afioaga, o faalapotopotoga o lo’o puipuia le siosiomaga, e aofia ma ofisa o le malo faapea ma sui mai i kamupani ‘ese’ese, ina ia mafai ona o soalaupuleina lenei mataupu.

I nei fonotaga, sa mafai ona tagai le faigamalo i le a’afiaga o le siosiomaga ma le taua o le fa’asaoina o ogasami, i’a, figota ma ‘amu o lo’o ta’ua i le aganu’u faapea le tamaoaiga o Amerika Samoa.

Ma na fa’aleoina e Maifala, le tu tu faatasi o le afioga i le Kovana Pulaalii Nikolao Pula, le afioga i le Lutena Kovana Pulumataala Ae Ae Jr., o le afioga i le sui Faipule o Amerika Samoa i le Konekeresi, ia Uifaatali Aumua Amata, le afioga i le Peresetene o le Senate, Tuaolo M. Fruean, o le afioga i le Fofoga Fetalai, Savali Talavou Ale, e tete’e atu i le fuafuaga fa’ata’atia a le BOEM, mo le lisiina o ogasami i kamupani, atoa ai ma le fa’amautuina o la latou tu’uto i le puipuiga o alagamanuia faalenaatura a Amerika Samoa.

Ma ua fa’apea ona u’una’ia mai e le Ofisa a le Kovana, e pei ona sa faaleoina e Maifala, ia le mamalu o le atunu’u, ina ia fa’aulu atu o latou manatu ma lagona, i le 30 aso ua tatalaina mai.

O lea tulaga e mafai ona maua i luga o le uepesite www.boem.gov/American-Samoa.

SU’ESU’E E LE DMWR MAFUA’AGA NA PE PE AI I’A I LE SAMI I PAGO PAGO

Ua feagai nei le Matagaluega o lo’o gafa ma le puipuiga o alagamanuia i le Sami ma le Vaomatua (DMWR), ma ni su’esu’ega, i le mafua’aga na fa’atama’ia ai i’a e lata i le 300, lea na maua atu o opeopea i gatai o Pago Pago, i le aso 8 o Iuni, 2025.

I se fa’aaliga aloaia mai i le DMWR, o lo’o latou taumafai e saili ni faamatalaga mai i le mamalu lautele, e tusa ai ma lenei fa’alavelave. 

Ae ua faapea ona iai se vaega faapitoa, ua o latou aoina mai i’a sa fa’atama’aia, mo a latou su’esu’ega.

I ulua’i su’esu’ega na faia, sa fa’amautuina ai le le’i a’afia o isi i’a ma figota o lo’o ola i lea ogasami, ma o se tulaga lelei lea i le va’ava’ai a le vaega su’esu’e.  Ae peitai, sa le’i mafai ona ma’oti mai ai le mafua’aga o le fa’atama’ia o i’a na maua o opeopea i luga o le sami.

Ua faapea foi ona maua mai se fesoasoani mai i le Ofisa a Amerika Samoa mo le Puipuiga o le Siosiomaga, i le su’esu’ega ua fa’ataunu’uina.

Ae ua o latou ‘a’apa atu i le mamalu o le atunu’u, mo se fesoasoani i lenei mataupu.  Ina ia fa’afeso’ota’i le numera telefoni (684) 633-4456, pe afai o iai se faamatalaga po o se molimau.